7 naýryz. Jylnama
Kazinform oqyrman nazaryna 6 naýryzǵa arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1994 jyly Táýelsiz Qazaqstannyń tuńǵysh Parlamenttik saılaýy ótti. 176 depýtattyń 42-si prezıdent tizimi boıynsha, 75-i qoǵamdyq birlestikterden, sondaı-aq 59-y ózin-ózi usyný arqyly saılandy. 1994 jylǵy sáýirde jańa Parlament jumysyn bastady.
2003 jyly Mınskide Joǵary deńgeıdegi top qurý týraly hattamaǵa qol qoıyldy. Mundaı sheshim Belarýs, Qazaqstan, Reseı Federatsııasy jáne Ýkraına prezıdentteriniń 2003 jylǵy 23 aqpandaǵy kelisimi boıynsha qabyldandy.
2005 jyly Parıjde, ıÝNESKO-nyń shtab-páterinde, qazaqstandyq tanymal sýretshi Erbolat Tólepbaıdyń kórmesi ashyldy. Qazaqstan Respýblıkasynyń ıÝNESKO janyndaǵy turaqty ókiliniń bastamasymen uıymdastyrylǵan bul kórmeniń saltanatty ashylý rásimine Parıjde tirkelgen dıplomattar, Frantsııanyń tanymal saıasatkerleri men óner qaıratkerleri, sheteldegi qazaq dıasporasynyń ókilderi, ónersúıer qaýym qatysty. Erbolat Tólepbaı – Qazaqstan Memlekettik syılyǵynyń laýreaty, Qazaqstan Respýblıkasynyń eńbek sińirgen qaıratkeri, Qyrǵyzstannyń Kórkem akademııasynyń naqty múshesi, Masarık atyndaǵy Cheh kórkem akademııasynyń múshesi, «Platına Tarlanynyń» ıegeri.
2013 jyly «Eır Astana» AQ men Turkish Airlines kodsherıngtik kelisim jasasýǵa nıet hatyna qol qoıdy.
2015 jyly Qarlag tutqynyndaǵy ıspandyqtar týraly «Zabytye v Karagande» fılmi «Eýropalyq úzdik derekti fılm» nomınatsııasynda syılyq aldy. Fılmge osy kúnge deıin ıspandyqtardyń kópshiligine beımálim bolyp kelgen Qarlagtaǵy jaǵdaı, kózkórgenderdiń estelikteri arqaý etildi.
2017 jyly qazaqstandyq áýe kompanııalaryna Transsibir baǵyttary júıesin qoldaný arqyly ushý quqyǵy berildi. Ulan-Batyr men Tokıoǵa jańa baǵyttar ashyldy.
2019 jyly L.N.Gýmılev atyndaǵy Eýrazııa ulttyq ýnıversıtetiniń tarıh fakýlteti kafedrasynyń múshesi Dýman Aıtmaǵambetov Astananyń memlekettik muraǵatyna sırek kezdesetin estelikterdi, tarıhı qujattardyń kóshirmelerin, atap aıtqanda 1909 jylǵy halyq sanaǵynyń málimetterin, rarıtetti fotolardy saqtaýǵa tapsyrdy.
2019 jyly ál-Farabı atyndaǵy Qazaq ulttyq ýnıversıteti Qarashı (Pákistan) ýnıversıtetinde birlesken ǵylymı ortalyq-ınnovatsııalyq zertteýler zerthanasyn ashty. Joba Ońtústik elderiniń turaqty damýy úshin ǵylym jáne tehnıka jónindegi komıssııanyń (COMSATS) kómegimen júzege asyryldy.
2020 jyly «Radio Stereo Mundo La Mega» Ekvador radıosynda jergilikti ýaqyt boıynsha 12:00-den 15:00-ge deıin Dımash Qudaıbergenniń ánderi efırge shyǵaryldy. «Biz Dımashty álemdegi eń úzdik ánshi dep sanaımyz, onyń erekshe daýysy bizdiń elimizde estilýi kerek dep bilemiz. Ol bizge mýzyka – óner men mahabbattyń shynaıy kórinisi, onyń eshqandaı tili jáne shekarasy joq ekenin úıretti. Sondyqtan biz Dımashtyń shyǵarmashylyǵyn nasıhattaý jumystaryn belsendi túrde jalǵastyra beremiz», – dep jazdy ánshiniń fan-klýb paraqshasy. «Radio Stereo Mundo La Mega» radıosy – 90,5 FM jıiliktegi Ekvador ulttyq radıosy. Bul eldegi eń tanymal jáne jıi tyńdalatyn áýe tolqynynyń biri.
2021 jyly Almaty qalasy Jetisý aýdanynyń Kókjıek shaǵyn aýdanynda alǵashqy áıelder alleıasy ashyldy. «Qazirgi zamanda áıeldiń róli erlermen qatar mańyzdy. Qazir názik jandar saıasat, ekonomıka, medıtsına men basqa da salalarda jumys isteıdi. Osy alleıany biz áıelder alleıasy dep ataımyz. Ol – aqyl, parasattyń sımvoly», - dedi ashylý saltanatynda qalalyq Jasyl ekonomıka basqarmasynyń basshysy Natalıa Lıvınskaıa.
2022 jyly Aqtaý qalasynda Kórkem gımnastıka ortalyǵy ashyldy. Ortalyqty ashýdaǵy maqsat – bolashaq álem, Azııa, Olımpıada oıyndarynyń chempıondaryn tárbıeleý.
2024 jyly Memleket basshysy Saýd Arabııasy Koroldiginiń Energetıka mınıstri Abdýlazız ben Salman Ál Saýdty qabyldady. Kezdesý barysynda Qazaqstan men Saýd Arabııasy arasyndaǵy energetıkalyq jáne ınvestıtsııalyq yntymaqtastyqty damytý perspektıvalary talqylandy. Qasym-Jomart Toqaev Qazaqstan-Saýd Arabııasynyń qarym-qatynasy buryn-sońdy bolmaǵan deńgeıge jetkenin atap ótti. Ol taq murageri jáne premer-mınıstr Muhammed ben Salman Ál Saýdpen kelisimderi barlyq salalardaǵy ekijaqty yntymaqtastyqqa qýatty serpin bergenin eske saldy.
2024 jyly Memleket basshysy Halyqaralyq áıelder kúnine arnalǵan merekelik sharaǵa qatysty. Memleket basshysy óz sózinde áıelderdi kele jatqan merekemen quttyqtady.
Memleket basshysy sondaı-aq «Arý-Ana» úzdik áıelder jobasy baıqaýynyń jeńimpazdaryna syılyqtar tabys etti. Bul joly marapat túrli saladaǵy áleýmettik mańyzy bar jobalardy júzege asyrǵany jáne azamattyq qoǵamdy damytýǵa qosqan úlesi úshin alty nomınatsııa boıynsha tabys etildi. «Arý-Ana» úzdik áıelder jobalary baıqaýynyń jeńimpazdary bolyp Elchıbaeva Baqytgúl Qazezbaıqyzy (Aýyl áıelderin damytýǵa arnalǵan úzdik joba), Shakýlıkova Gúlzada Táńirbergenqyzy (Ǵylym salasyndaǵy úzdik joba), Ahmedjanova Álııa Serikbolqyzy (Azamattyq ózin-ózi tanýdy damytý salasyndaǵy úzdik joba), Mıhaleva Anastasııa Anatolevna (Ulttyq mádenı murany dáripteý salasyndaǵy úzdik joba), Arqashbaeva Botagóz Mahambetqalıqyzy (Agrobıznes salasyndaǵy úzdik joba), Edilbekova Madına Edilbekqyzy (Shyǵarmashylyq ındýstrııa salasyndaǵy úzdik joba) tanyldy.
2024 jyly «Slovakııa kitaphanalary aptalyǵy» naýqany aıasynda Slovakııanyń Ulttyq kitaphanasynda Maǵjan Jumabaıdyń slovak tilinde alǵash ret jaryq kórgen poezııalyq jınaǵynyń tusaýkeseri ótti. Sharaǵa Slovakııa Jazýshylar odaǵynyń músheleri – aqyn-jazýshylar men ádebıettanýshylar, «Matica slovenská» mádenı birlestiginiń músheleri, Slovakııa kitaphanalar qaýymdastyǵy jáne kitap shyǵarýshylar qoǵamy, stýdentter men baspasóz ókilderi qatysty.