7 aıda 176 bala kólik apatynan kóz jumǵan

ASTANA. KAZINFORM — Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev elimizde 7 aıda kólik apattarynan 176 bala qaıtys bolǵanyn málim etti.

— Ókinishke qaraı, jeti aıda jol apattarynda 176 bala qaza boldy. Bul — orny tolmas shyǵyn. Bizdiń qolymyzdaǵy eń qymbat baǵaly dúnıe — balalardyń ómirin saqtap qalý úshin qoldan kelgenshe aıanbaýymyz kerek. Zardap shekken balalardyń jartysynan kóbisi jolaýshy retinde qaıtys bolǵan. Qalǵandary — jaıaý júrginshiler, sonyń ishinde velosıpedshi, samokatshy nemese moped júrgizgender, — dedi ol.

Komıtet basshysynyń sózinshe, kóp jaǵdaıda balalar kólik ishinde balaǵa arnalǵan qaýipsizdik qurylǵylary men (avtokreslo, býsterler, adapterler jáne t. b.) qaýipsizdik beldikterin qoldanbaý saldarynan qaza bolǵan.

— Jol apatynda kóbine jaıaý júrginshi-balalardyń ózderi kináli bolyp jatady, Al eń ókinishtisi, joldy kez-kelgen jerden nemese baǵdarshamnyń qyzyl túsine ótip ketý jıi tirkeledi. Keıbir balalar tipti joldan óterde jan-jaǵyna qaraý kerek ekenin umytyp ketedi, sebebi burylystan kólik shyǵyp qalýy múmkin. Al qarańǵy mezgilde, ásirese ymyrt túskende júrgizýshiler jaıaý júrginshilerdi baıqamaı qalýy múmkin. Óıtkeni olar kıimderine jaryq shaǵylystyratyn elementterdi qoldanbaıdy. Sondyqtan balalarǵa óte saq bolýdy jáne kólik júrgizýshisi jol beregenine kóz jetkizýin únemi túsindirip otyrýymyz kerek, — dedi Qaısar Sultanbaev.

Resmı málimet boıynsha, 2024 jyly jol-kólik apatynan 2 452 adam mert bolǵan.