7 aı qorytyndysynda ónerkásip óndirisiniń kólemi 1,3 paıyzǵa ósti

NUR-SULTAN. QazAqparat - 2020 jyldyń 7 aıynyń qorytyndysy boıynsha ónerkásip óndirisiniń kólemi 1,3 paıyzǵa ósti. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Elimizde 2020 jyldyń 7 aıynyń qorytyndysy boıynsha ónerkásip óndirisiniń kólemi 1,3 paıyzǵa ósti. 12 óńir oń nátıje kórsetti. Taý-ken óndirý sektorynda tústi kenderdi óndirý 2,5 paıyzǵa artty. Temir ken óndirý 0,9 paıyzǵa ósti. Kómir ónimderin tutyný kóleminiń artýyna baılanysty kómir óndirý kólemi 102,6 paıyzdy qurady. Kómir óndirýshi kompanııalar 2020 jylǵy qańtar-shilde aılarynda 62 mln tonna kómir óndirdi. Bul ótken jyldyń sáıkes kezeńimen salystyrǵanda 3 paıyzǵa arttyq», - dedi mınıstr.

Onyń dereginshe, óńdeý ónerkásibinde naqty kólem ındeksi tústi metallýrgııa, farmatsevtıka, jeńil ónerkásip, mashına jasaý, hımııa jáne basqa da salalar esebinen 3,8 paıyzǵa ósti. Tústi metallýrgııada óndiris kólemi tazartylǵan altyn óndirý kólemin 3, bastapqy alıýmınııdi 1 paıyzǵa jáne basqa da kórsetkishterdiń ósýine baılanysty naqty kólem ındeksi 3,9 paıyzǵa artty.

«Qara metallýrgııada naqty kólem ındeksi 98 paıyzdy qurady. Bul kórsetkish bolattyń 8, relsterdiń 10,6, bolat qubyrlardyń 12 paıyzǵa óndiris kóleminiń tómendeýine baılanysty boldy. Hımııa ónerkásibinde óndiris kólemi 3,6 paıyzǵa ósti. Bul dezınfektsııalyq quraldar jáne mıneraldy tyńaıtqyshtar óndirý kóleminiń ulǵaıýyna baılanysty.», - dedi Beıbit Atamqulov.