«7 arna» jańa telemaýsymdy jańa mazmunmen bastady

ASTANA. QazAqparat – Qazaqstannyń «Jetinshi arnasy» naýryz qarsańynda televızııalyq maýsymyn tyń baǵdarlamalarmen jańartty, dep habarlaıdy QazAqparat tilshisi.

Transformatsııa arnanyń kontentimen birge vızýaldyq sheshimderin de qamtydy. Naqtyraq aıtsaq, rebrendıng júrgizilip, efırdiń árleýi ózgerdi, logotıpi men kórsetilim kestesi de jańardy.

«Biz barlyq jastaǵy kórermen úshin zaman talabyn eskerip, qaıta jańardyq. Túrlendik. Ártúrli túrge endik. Kóńildi kúıge endik. Bunyń bári Siz úshin patsha kóńil kórermen. Erekshe jobalarymyzdyń biri – «Qyzdar-aı». Óıtkeni, áıelder – árdaıym otbasynyń uıytqysy, bereke-birliktiń shyraqshysy», - deıdi arnanyń bas dırektory Ánııa Baıoraz.

Atalǵan «Qyzdar-aı» baǵdarlamasy búgin saǵat 14:30-da alǵash ret kórermenge jol tartady. Júrgizýshileri – Janar Aıjanova men Asha Mataı. Baǵdarlama názik jandardyń jan júregin terbep, kórermenge kún saıyn stýdııaǵa kelgen alýan keıipkerdiń alýan túrli ómiri men ózekti máselelerin tolǵaıdy. Taǵdyr talaıymen birge olardyń qýanyshy men jubanyshy, jetistigi men jetpeı jatqan tustary, ómirlik tájirıbeleri men tálim-túsinigi talqyǵa túsedi.

Taǵy bir jańalyq – tanymal tulǵalar týraly «Juldyzdy shańyraq» jáne «Qyzyqty weekend» baǵdarlamalary. Ár senbi men jeksenbi kúnderi Anna Danchenko júrgizetin jobada tanymal shoý bıznes, teatr jáne kıno juldyzdarynyń ómirine syr aıtylyp, estelikter tyńdalady.

Buǵan qosa jaqyn arada 7 arna efırinde qazaq jáne orys tilderinde balamasy joq aptalyq keshki shoý bastalady. Avtorlar onyń stsenarııin ázirge qupııa ustap otyr.

Jalpy bul kóktemde 7 arna kórermenge serıaldar men sapaly fılmder usynbaqshy. Telearna kınosúıer qaýymdy Qazaqstan, Túrkııa, Reseı, Ýkraına, Brazılııa jáne AQSh túsirgen eksklıýzıvti fılmdermen, serıaldarmen tamsandyrmaq.