7-20-25: Jataqxanada turatyndarǵa ıpoteka berile me

ASTANA. QazAqparat - QR Ulttyq banki tóraǵasynyń orynbasary Oleg Smolıakov «7-20-25» ıpotekalyq baǵdarlamasynyń shekteýleri týraly aıtyp berdi, dep xabarlaıdy QazAqparat tilshisi.

«Árıne, talap boıynsha adamnyń atynda baspana bolmaýy shart. Degenmen, jataqxanada turatyndar ótinish bere alady. Sebebi jataqxanada bir otbasynyń múshesine 15 sharshy metrden de kelmeıdi. Ondaıda ótinish bergen adam baspananyń ıesi retinde qarastyrylmaıdy. Jataqxana bólmesi páter emes qoı. Sosyn eski jáne apattyq jaǵdaıda turǵan úılerdiń turǵyndary jańa baǵdarlamaǵa qatysa alady», - dedi O.Smolıakov jýrnalıstrge bergen suxbatynda.

Onyń aıtýynsha, ótinish bergen azamattardyń tólem qabilettiligine basa nazar aýdarylady. Bul - basty talap. Basqa bankterde ıpotekasy bar adamdarǵa taǵy bir nesıe berilmeıdi.

Aıta keteıik, «7-20-25» ıpotekalyq baǵdarlamasy aıasynda ázirshe jańa baspanaǵa nesıe beriledi. Aldaǵy ýaqytta atalǵan júıe arqyly qaıtalama naryqtaǵy páterlerdi satyp alý tetikteri ázirlenetin bolady. Biraq onyń sharttary ózgeshe bolady.