«7-20-25»: SQO-da bıýdjet qyzmetkerlerine alǵashqy jarna tómendetiledi
Eldiń basty baılyǵy - adam. Elbasynyń jańa Joldaýynda osy máselege ekpin berildi. Qumar Aqsaqalovtyń aıtýynsha, óńirde soltústikqazaqstandyqtardyń ál-aýqatyn arttyryp, ómir sapasyn joǵarylatý úshin jospar aıqyn.
Qazaqstan Prezıdenti jańa jyldan bastap tómengi eńbekaqy mólsherin 28 myńnan 42 myń teńgege deıin ósirýdi tapsyrdy. Soltústik Qazaqstanda 43 myń adamnyń eńbekaqysy ósedi. Jeńildetilgen salyq 200 myń turǵynǵa oń yqpalyn tıgizedi. Medıtsınalyq qyzmetkerlerdiń de eńbekaqysy 20% ulǵaımaq. Oblysta 300 ýchaskelik dáriger men 750 medbıkeniń jalaqysy artady.
Jalpy, densaýlyq saqtaý salasynda aýrýhanalar men emhanalardy qarjylandyrý 3 esege kóbeıedi - 800 mıllıonnan 2,8 mıllıard teńgege deıin. Bul qarajatqa joǵary tehnologııalyq qondyrǵylar alynady. Oblys ortalyǵynda kópsalaly aýrýhana salý da kózdelgen.
Memleket basshysy «7-20-25» ıpotekalyq baǵdarlamasyn júzege asyrýǵa da toqtaldy. SQO-da bıýdjettik sala ókilderine ıpoteka odan saıyn qolaıly bolmaq. Jergilikti bıýdjetten alǵashqy jarnanyń bóligin sýbsıdııalaýǵa 200 mıllıon teńge bólinedi. Qazir oblysta 2011 páterge shaqtalǵan 16 turǵyn úı salynýda. 2019 jyly 1500 páter bolatyn 12 úı boı kóteredi.
Bilim sapasyn arttyrý da basym baǵyttardyń biri. Petropavlda qazir 1500 oryndyq eki mektep salynýda. Keshendi jospar aıasynda oblys ortalyǵynda taǵy bir mektep turǵyzý josparlanǵan. Budan bólek, 120 bilim oshaǵy jóndelmek. Mektepterde 4 myń kompıýter jańartylady. Elbasy barlyq mektepter men balabaqshalardy beınebaqylaýmen qamtamasyz etýdi tapsyrdy. Búginde 625 nysannyń 174-de kameralar ornatylǵan. Qumar Aqsaqalov aýdan ákimderine qalǵan 451 bilim oshaǵyn beınebaqylaýmen qamtamasyz etý úshin qarjy bólýdi tapsyrdy.
Bıyl 25 myń adam turatyn 38 aýyl taza aýyzsýǵa qol jetkizdi. Kelesi jyly qarjylandyrý kólemi 9,6 mıllıard teńgege deıin ósedi. Óńirde ortalyq sý júıesine taǵy 29 eldimeken qosylmaq.
Elbasy Joldaýynda týrızmdi damytýǵa da kóńil bólindi. Imantaý-Shalqar kýrort aımaǵy Týrıstıfıkatsııa kartasynyń úzdik 10 jobasyna endi. Aımaqty keshendi damytý úshin «McKinsey&Company» halyqaralyq konsaltıngilik kompanııasymen birge jospar daıyndalýda. Kýrortty damytýǵa 8 mıllıard teńge bólý josparlanǵan.
Petropavlda jáne aýdanda dene shynyqtyrý-saýyqtyrý keshenderi salynady. Kóshe sport keshenderin, basketbol, voleıbol alańdaryn salý da jalǵasady.
