«7-20-25»: Kókshetaýda jańa turǵyn úı kesheni paıdalanýǵa berildi
Saıyn kóshesiniń boıyna ornalasqan alty qabatty «Estet» turǵyn úı kesheniniń qurylysy 2017 jyly bastalǵan. Jobanyń jalpy quny - 785 mıllıon teńge. Qurylys jumystaryn «Estet Stroı» seriktestigi júrgizdi. Baspanaly bolǵandar - negizinen «7-20-25» baǵdarlamasyna qatysýshylar.
Jańa turǵyn úıdiń páter kiltin tapsyrý rásimine aımaq basshysy Málik Myrzalın qatysyp, shańyraq ıelerin qýanyshtarymen quttyqtady.
«Elbasy Nursultan Nazarbaevtyń Joldaýynda halyqty baspanamen qamtý máselesi basty oryn alady. Búgin sol «7-20-25» baǵdarlamasynyń bizdiń óńirde de oıdaǵydaı júzege asyrylyp jatqany qýantady. Aqmola oblysy atalmysh baǵdarlamany júzege asyrý kórsetkishi boıynsha respýblıkada 5-shi orynda tur. Aldaǵy ýaqytta da bul mindetter júzege asyrylyp, úı kezeginde turǵan halyq baspanaǵa qol jetkizetin bolady. Búgingi qýanyshtaryńyz qýanyshqa ulasa bersin», - deı kele, aımaq basshysy bir top qala turǵynyna jańa páterdiń kiltin tabys etti.
«Estet Stroı» seriktestiginiń dırektory Oleg Malahovtyń málimetinshe, 6 qabatty turǵyn úıdiń jalpy aýmaǵy 5200 sharshy metrdi quraıdy. Al, páterdiń 1 sharshy metri - 180-220 myń teńge shamasynda. Qazirgi kezde, turǵyn úı kesheniniń mańy abattandyrylyp jatyr.
Aıta keteıik, 2018 jyldyń 4 shildesinen bastap qolǵa alynǵan «7-20-25» memlekettik baǵdarlamasy aqmolalyqtardyń qyzyǵýshylyǵyn arttyryp otyr. Búgingi kúnge deıin Aqmola oblysy boıynsha 1,98 mıllıard teńge somasynda 222 ótinish túsken. Qazirgi kúni 1,5 mıllıard teńgeniń 171 nesıesi maquldanǵan.
