«7-20-25» baǵdarlamasyna ózgerister engizildi

ASTANA. QazAqparat - Búginde «7-20-25» baǵdarlamasy boıynsha tek daıyn qujattary bar baspanaǵa ǵana ıpoteka beriledi. Al páterlerdiń basym bóligi qurylys jumystary kezinde satylyp ketedi. Sodan jańa baǵdaralamaǵa baspana az qalady. Osyǵan baılanysty «7-20-25» aıasynda arnaıy turǵyn úıderdi salý josparlanǵan, dep xabarlaıdy QazAqparat tilshisi.

«Baspana» ıpotekalyq kompanııasynyń basshysy Qaırat Altynbekovtyń aıtýynsha, búginde baǵdarlamaǵa ózgerister engizildi. Soǵan sáıkes, «7-20-25» aıasynda jergilikti ákimdikterge 150 mlrd teńge bólinedi. Ol aqshaǵa jańa úıler salynýy tıis.

«Máselen, qazirgi kezde Soltústik Qazaqstan men Túrkistan oblystarynda «7-20-25» baǵdarlamasy boıynsha berilgen ıpotekanyń kólemi tym az. Sebebi, atalǵan óńirlerde jańa turǵyn úıler kóp emes. Osyǵan baılanysty Ulttyq bank «Baspana» ıpotekalyq kompanııasymen birlese otyryp, «7-20-25» baǵdarlamasyna ózgeris engizdi. Oǵan sáıkes, biz baǵdarlama aıasynda salynatyn jańa úılerdi arttyrý úshin shamamen 150 mlrd teńgeni bólýge ázirmiz»  - dedi Q.Altynbekov Astanada ótken baspasóz máslıxatynda. 

Onyń sózine qaraǵanda, jańa baǵdarlamaǵa suranys joǵary. Alaıda, usynys mardymsyz bolyp tur. Máselen, osy ýaqytqa deıin ekinshi deńgeıli bankterge 26 mlrd teńgege ótinimder tústi. Sonyń ishinde 18 mlrd teńgeniń ıpotekasy maquldandy. Ol - shamamen 1 500 páter. 

Aıta keteıik, búginnen bastap «Baspana-Hıt» atty jańa ıpoteka berile bastady. Oǵan qaıtalama naryqtan páter satyp alýǵa bolady. Alǵashqy jarnanyń kólemi ózgermeıdi. Alaıda, protsenttik mólsherleme Ulttyq banktiń stavkasyna baılanysty bolady.

«Máselen, Ulttyq banktiń bazalyq stavkasy 9 protsentti quraıdy. Oǵan taǵy 1,7 protsent qosylady. Osylaısha, «Baspana-Hıt» baǵdarlamasy boıynsha protsenttik mólsherleme 10,7 bolady. Ipotekanyń merzimi - 15 jyl. Al bastapqy jarnanyń mólsheri 20 protsent bolyp qala beredi», - deıdi Q.Altynbekov.