«7-20-25» baǵdarlamasy boıynsha SQO-da 500 páter paıdalanýǵa beriledi

PETROPAVL. QazAqparat - Soltústik Qazaqstan oblysynda jyl sońyna deıin «7-20-25» jeńildetilgen nesıe baǵdarlamasy boıynsha 500 páter paıdalanýǵa berilmek, dep habarlaıdy QazAqparat.

SQO ákimdiginiń qurylys, sáýlet jáne qala qurylysy basqarmasynyń málimetinshe, «Jas órken» yqsham aýdanynda ıpotekalyq nesıege beriletin 332 páterli turǵyn úıdiń bir sharshy metri 169 myń teńge turatyn bolady. Budan basqa bıyl «Bereke» yqsham aýdanyndaǵy jáne Jýkov kóshesindegi kóp qabatty turǵyn úıler, Báıterek aýylyndaǵy, Kýıbyshev orman sharýashylyǵyndaǵy baspanalar tapsyrylady.

«7-20-25» baǵdarlamasyna qatysý úshin mindetti túrde Qazaqstan Respýblıkasynyń azamaty bolýy shart, budan basqa tólem qabilettiligi eskeriledi. Baspana alǵysy keletin adamnyń eńbekaqysy arzan nesıege jetýi kerek. Basqa ıpotekalyq nesıeleri jáne atynda turǵyn úıi bolmaýy qajet», - deıdi «Qazaqstannyń Ultyq banki» SQOF dırektory Dıas Mels.

Onyń aıtýynsha, osy baǵdarlamaǵa qatysýǵa qazaqstandyqtardan búgingi kúni 4 myń 657 ótinish túsken. Olar qalaýlary boıynsha elimizdiń kez-kelgen óńirinen, mysaly, Petropavl qalasynyń turǵyny Astana qalasynan baspana ala alady.

Basqa ıpotekalyq nesıelerge qaraǵanda, «7-20-25» baǵdarlamasynyń sharttary áldeqaıda tıimdi. Alaıda, osy kúnge deıin soltústikqazaqstandyqtardyń  tek 3 ótinishi ǵana maquldanǵan. «Qazaqstannyń Ultyq banki» SQOF dırektory Dıas Melstiń aıtýynsha, baǵdarlamaǵa qatysýǵa tilek bildirýshilerdiń kóp jaǵdaıda kirisi jetpeıdi jáne kredıttik tarıhy nashar.

Esterińizde bolsa, «7-20-25» baǵdarlamasy elimizde bıyl shildeniń 4-i kúni iske qosyldy. Osy aralyqta 36,4 mlrd teńgeniń 3036 ótinish maquldanǵan.