66 kadet aýyryp jatyr: Kókshetaýdaǵy áskerı kolledjde qyzylsha derti tarady

ASTANA. KAZINFORM – QR Qorǵanys mınıstrligine qarasty Shoqan Ýálıhanov atyndaǵy Áskerı kolledjde bilim alýshylar arasynda qyzylsha aýrýynyń jaǵdaılary tirkeldi.

Vedomstvo málimetinshe, kadetterdiń kanıkýldyq demalystan oralýynan keıin olardyń bir bóliginde juqpaly aýrý belgileri baıqalǵan. Qalyptasqan epıdemıologııalyq jaǵdaıdy eskere otyryp, aýrýdyń boljamdy túrde syrttan ákelinýi múmkin ekeni anyqtalyp jatyr.

- Qazirgi ýaqytta 66 kadet beıindi medıtsınalyq uıymdardyń baqylaýynda. Onyń ishinde eki jaǵdaıda aýrý asqynýmen ótýde. Atalǵan naýqastar mamandandyrylǵan medıtsınalyq kómek alyp jatyr, olardyń jaǵdaıy turaqty, oń dınamıka baıqalady.

Kolledj aýmaǵynda baılanysta bolǵan tulǵalar anyqtalyp, oqshaýlanǵan. Barlyq patsıentterge qajetti medıtsınalyq kómek kórsetilip jatyr, olardyń densaýlyq jaǵdaıy turaqty dep baǵalanyp otyr, - delingen mınıstrlik aqparatynda.

Infektsııanyń odan ári taralýyna jol bermeý maqsatynda oqý ornynda karantın jarııalandy.

Medıtsınalyq jáne sanıtarııalyq-epıdemıologııalyq baqylaýdy kúsheıtýge baǵyttalǵan qosymsha sharalar uıymdastyrylyp, jeke quramnyń densaýlyq jaǵdaıyna monıtorıng kúsheıtildi.

Jaǵdaı Qazaqstan Respýblıkasy Qorǵanys mınıstrliginiń jáne densaýlyq saqtaý organdarynyń turaqty baqylaýynda.

Aıta keteıik, Astanada bıyl 380-nen astam adam qyzylsha dertine shaldyqty.