600 mlrd teńgeniń jeńil nesıeleri qaı salaǵa beriledi
Palata tóraǵasy Abylaı Myrzaxmetovtyń aıtýynsha, búginde ishki naryqqa qajetti ónimderdi shyǵara alatyn kásiporyndar bar. Biraq olardyń basym bóligi tolyqqandy jumys istep jatqan joq. Sebebi tapsyrys az. Oǵan qosa, ózimiz shyǵyra alatyn taýarlardyń birazy shetelden tasymaldanady. Bankterden nesıe alý da ońaı emes.
«Ashyǵyn aıtý kerek, búginde orta jáne shaǵyn bıznes úshin nesıe alý máselesi qıynǵa soǵyp otyr. 18-19 protsenttik nesıemen óndiristi kóterý qıyn. Elbasy 600 mlrd teńgeni bólip berýdi tapsyrdy. Ol qarjy bárine jappaı berilmeıdi, tek xalyq tutynatyn taýarlardy shyǵaratyn kásiporyndarǵa ǵana beriledi. Úkimet baqylaıdy. Biz de osy saladaǵy kásiporyndardyń tizimin usynýǵa daıynbyz. Prezıdent shıkizattyq emes sektorda xalyq kóp tutynatyn tamaq, kıim-keshek, aıaq kıim, jıhaz jáne taǵy basqa taýarlar ózimizde jasalaýy qajet dep naqty tapsyrma berdi. Sonyń barlyǵy teńgemen shyǵarylady. Sondyqtan xalyqqa da tıimdi bolady. Al shetelden keletin taýarlardyń baǵasy, kóp jaǵdaıda, valıýtanyń baǵamyna baılanysty bolyp jatady. Negizi, barlyq taýarlar ózimizde shyǵarylsa, otandyq kásiporyndar tapsyrys alady, bıýdjetke salyq tólenedi, jergilikti xalyqqa da jumys tabylady», - dedi A.Myrzaxmetov.
Onyń sózine qaraǵanda, elimizde shıkizattyq emes sektorǵa jatatyn negizgi 8 sala bar. Sonyń ishinde tamaq, kıim-keshek, jıhaz, dári-dármek, mashına jóndeý, qurylys materıaldary bar.
«Biz jyl basynan beri pasporttaý sharalaryn atqaryp shyqtyq. Atalǵan kásiporyndar 55 protsentke ǵana jumys istep tur. Demek, olarǵa memleket tarapynan, tutynýshylardan jańa tapsyrystar qajet»,- dep atap kórsetti A.Myrzaxmetov.
Aıta keteıik, QR Prezıdenti Nursultan Nazarbaev xalyqqa arnaǵan sońǵy Joldaýynda ishki naryqty otandyq taýarlarmen toltyrýdy tapsyrdy. Osyǵan baılanysty Úkimet óńdeý ónerkásibi men shıkizattyq emes eksportty qoldaý maqsatynda aldaǵy 3 jylda qosymsha 500 mıllıard teńge bólip beredi. Al Ulttyq bank basymdy jobalarǵa qoljetimdi nesıe berý úshin keminde 600 mıllıard teńge kóleminde uzaq merzimge qarjy beredi.
«Halyq tutynatyn taýarlardyń aýqymdy nomenklatýrasyn ıgerip, «qarapaıym zattar ekonomıkasyn» damytý úshin kásiporyndarymyzǵa kómektesý kerek. Bul eksporttyq áleýetimizdi júzege asyrý turǵysynan ǵana emes, sondaı-aq ishki naryqty otandyq taýarlarmen toltyrý úshin de mańyzdy», - dep atap kórsetti Prezıdent.
