6 naýryz kúni 9 óńirde dabyl júıesi qosylady

9 óńirinde 6 naýryzda saǵat 11.00-de barlyq dybystyq elektr dabyldary qosylady. Bul týraly Tótenshe jaǵdaılar mınıstrliginiń baspasóz qyzmeti habarlady. 

— 6-7 naýryzda elimizdiń soltústik, shyǵys jáne ortalyq óńirlerinde «Sý tasqyny kezeńi jaǵdaılaryndaǵy tótenshe jaǵdaılardy joıý kezindegi is-qımyldarǵa azamattyq qorǵaýdyń memlekettik júıesiniń basqarý organdaryn, kúshteri men quraldaryn daıyndaý» taqyryby boıynsha «Kóktem-2025» respýblıkalyq komandalyq-shtabtyq oqý-jattyǵýdyń 2-shi kezeńi ótedi, — delingen habarlamada. 

Oqý úılestirý jáne jetekshilik etý jónindegi respýblıkalyq shtab Qostanaıda ornalasady. Oqý-jattyǵý sheńberinde eki kún boıy Astana qalasynda, Aqmola, Shyǵys Qazaqstan, Qostanaı, Qaraǵandy, Pavlodar, Soltústik Qazaqstan, Abaı jáne Ulytaý oblystarynda profılaktıkalyq is-sharalar kesheni ótkiziledi.

— Sonymen qatar «Barshanyń nazaryna!» dabyly boıynsha aýmaqtyq deńgeıdegi qulaqtandyrý júıesiniń daıyndyǵyn tekserý maqsatynda elimizdiń 9 óńirinde 2025 jylǵy 6 naýryzda saǵat 11.00-de barlyq dybystyq elektr dabyldary qosylatyn bolady. Osyǵan oraı tynyshtyq saqtap, úreıge boı aldyrmaýlaryńyzdy suraımyz, — delingen TJM habarlamasynda.

Eske salsaq jer silkingende ala shyǵatyn «dabyl shabadanyna» ne salý kerektigi týraly jazǵan edik.