6 maýsym. Týǵan kún ıeleri

NUR-SULTAN. QazAqparat – Búgin, ıaǵnı 6 maýsymda tulǵalardan kimder dúnıege kelgen? QazAqparat oqyrmandaryna esimder kúntizbesin usynady.

ESІMDER

86 jyl buryn (1936) belgili sýretshi, Qazaqstannyń eńbek sińirgen óner qaıratkeri, Qazaqstan Respýblıkasy Sýretshiler odaǵynyń múshesi Tursyn ÁBÝOV dúnıege keldi.

Almaty oblysynyń Іle aýdanynda dúnıege kelgen. 1966 jyly N.V.Gogol atyndaǵy Almaty kórkemsýret ýlışesin, 1976 jyly Abaı atyndaǵy Qazaq pedagogıkalyq ınstıtýtyn bitirdi.

Ábýov Tursynnyń keskindemeshi retinde shyǵarmashylyq qalyptasýy óte bir qyzǵylyqty zaman – ótken ǵasyrdyń 60-shy jyldarynyń aıaǵyna saı keldi. 70-shi jyldardaǵy eń úzdik jumystary dep Á.Qasteev atyndaǵy MÓM qorynda saqtaýly turǵan «Kóktemgi Alataý», «Gúlder», «Kóne ydys-aıaq», «Іle», «Shatqal», «Taý baǵbany» degen eńbekterin aıtýǵa bolady. T.Bıgeldınovtyń portreti Máskeýde Qarýly kúshter murajaıynda saqtaýly tur. 80-90-shy jyldary T. Ábýov keń túrdegi taqyryptyq serııalarǵa, «Іle tuqym sharýashylyǵy trıptıhy», «Qazaqstan trıptıhy. Tyń», «Abaı halyq arasynda» (1984), «Qıyn jyldar», «Meıramdar» (1987), «Kólsaı» men «Ómir ótkelderi» trıptıhteri (N.Á.Nazarbaevty jeke toptama qorynda) sııaqty kópfıgýraly kompozıtsııalarǵa kóbirek den qoıa bastaıdy, onyń ishinde «Ómir-Ózen» atty trıptıhy aıryqsha. Bul mazmuny jaǵynan da, kólemi jaǵynan da (bıiktigi 170 sm, uzyndyǵy 23 m) kólemdi kartınalardyń biri. Sýretshi óz taǵdyrynyń belesteri arqyly týǵan jeriniń kórinisterin, ulttyq dástúrlerdi kórsetedi.

50 jyl buryn (1972) Qostanaı oblysynyń ákimi Arhımed Begejanuly MUHAMBETOV dúnıege keldi.

Aqtóbe oblysynda týǵan. Samara memlekettik tehnıkalyq ýnıversıteti men Qazaqstan-Reseı halyqaralyq ýnıversıtetin bitirgen. Mamandyǵy boıynsha ınjener-elektrık, qarjy bakalavry. Eńbek jolyn Aqtóbe qalasynyń kommertsııalyq qurylymdarynda bastaǵan. Aqtóbe oblysynyń syrtqy ekonomıkalyq baılanys jáne ınvestıtsııalar basqarmasynyń bastyǵy, «Shaǵyn kásipkerlikti damytý qory» AQ óńirlik dırektory, Aqtóbe qalasy ákiminiń orynbasary, Aqtóbe qalasynyń ákimi qyzmetterin atqardy. 2011 jylǵy 22 shildeden 2015 jylǵa deıin Aqtóbe oblysynyń ákimi boldy.

2015 jylǵy 11 qyrkúıekte Qostanaı oblysynyń ákimi bolyp taǵaıyndaldy.

45 jyl buryn (1977) Qazaqstan Respýblıkasy Ulttyq banki tóraǵasynyń orynbasary Danııar Valerevıch VAGAPOV dúnıege keldi.

Almaty qalasynda týǵan. 1998 jyly Qazaq memlekettik zań ýnıversıtetin «quqyqtaný» mamandyǵy boıynsha bitirgen. 1999 jylǵy sáýirden jeltoqsanǵa deıin – Qazaqstan Respýblıkasynyń Qarjy mınıstrligi Zań qyzmeti departamentiniń Zańnamany quqyqtyq saraptaý, kodtaý jáne júıeleý basqarmasynyń jetekshi mamany. 1999 jyldan 2000 jylǵa deıin – Qazaqstan Respýblıkasynyń Kólik jáne kommýnıkatsııa mınıstrliginiń Zań departamenti Normatıvtik-quqyqtyq qamtamasyz etý basqarmasynyń Zańnamany taldaý bóliminiń bas mamany. 2000 jyldan 2001 jylǵa deıin – Qazaqstan Respýblıkasynyń Qarjy mınıstrligi Zań qyzmeti departamenti Quqyqtyq saraptama, zańnamany júıeleý jáne quqyqtyq jalpyǵa mindetti oqý basqarmasynyń quqyqtyq saraptama bóliminiń bastyǵy. 2001 jyldan 2002 jylǵa deıin – Qazaqstan Respýblıkasy Prezıdent Ákimshiliginiń Memlekettik-quqyqtyq bóliminiń konsýltanty. 2002 jyldan 2003 jylǵa deıin – Qazaqstan Respýblıkasynyń Premer-Mınıstri Keńsesi Zań bóliminiń azamattyq jáne sharýashylyq zańnama sektorynyń meńgerýshisi. 2003 jyldan 2006 jylǵa deıin – Qazaqstan Respýblıkasy Qarjy mınıstrligi Zań qyzmeti departamentiniń dırektory. 2006 jyldan 2007 jylǵa deıin kommertsııalyq uıymdarda jumys istegen. 2007 jyldan 2008 jylǵa deıin – Qazaqstan Respýblıkasy Prezıdentiniń Qazaqstan Respýblıkasy Parlamentindegi ókildigi basshysynyń orynbasary. 2008 jyldan 2013 jylǵy qyrkúıekke deıin – «Nur Otan» HDP Zań basqarmasynyń basshysy, «Nur Otan» HDP Ortalyq apparaty basshysynyń orynbasary. 2013 jylǵy qyrkúıekten bastap Qazaqstan Respýblıkasynyń Ekonomıka jáne bıýdjettik josparlaý mınıstrliginiń Saýda komıtetiniń tóraǵasy. 2014 jylǵy tamyzdan bastap 2018 jylǵy mamyrǵa deıin – Qazaqstan Respýblıkasynyń Ulttyq ekonomıka mınıstrliginiń jaýapty hatshysy. 2018-2020 jyldary Memleket basshysynyń Ókimimen Qazaqstan Respýblıkasy Prezıdenti Ákimshiligi Memlekettik quqyq bóliminiń meńgerýshisi qyzmetin atqardy,

2020 jyldyń maýsymynan bastap qazirgi qyzmetinde.