6,6 mln-nan astam qazaqstandyq zeınetaqy shotyn ınternet arqyly tekserdi
«BJZQ» AQ salymshylardy jeke zeınetaqy shotynyń (JZSh) jaı-kúıi týraly habardar etý jumysyn turaqty júrgizip keledi. Jeke zeınetaqy shotynyń jaı-kúıi týraly aqparatty BJZQ keńsesine kelip, sondaı-aq, poshta arqyly úzindi kóshirme alýǵa jáne elektrondy tásildi paıdalana otyryp bilýge bolady.
Qazirgi kezde aqparat alýdyń eń tanymal tásili – ınternet baılanysy. Ony 6,6 mln-nan astam salymshy tańdady (barlyq JZSh-lardyń jalpy sanynyń 54,2%). Bul rette salymshylar men alýshylar 5 762 454 shottyń jaı-kúıi týraly enpf.kz saıtyndaǵy jeke kabınet nemese ENPF uıaly qosymshasy arqyly qalaǵan ýaqytynda, álemniń kez kelgen túkpirinen bile alady. Osyndaı habarlaý tásilin tańdaǵandar sany bir jylda 225 125 adamǵa (4%) artty.
BJZQ-ǵa berilgen elektrondyq poshta mekenjaıyna jiberiletin úzindi kóshirmeni 853 954 adam alady. Ol shot ıesine ózi tańdaǵan keste boıynsha aı saıyn, toqsan saıyn, jarty jylda bir ret nemese jyl saıyn kelip turady.
Úzindi kóshirmeni poshta arqyly alýdy áli kúnge deıin 1 297 726 adam qoldanady. Alaıda poshta baılanysyn aqparat alý tásili retinde 2 939 233 salymshy men alýshy tańdaǵan 5 jyl burynǵy, ıaǵnı 2015 jyldyń kórsetkishimen salystyrǵanda ol 44 % azaıǵan. Aqparat alýdyń bul túrine degen qajettiliktiń edáýir tómendeginin osydan-aq kórýge bolady.
Eger salymshy JZSh-dan úzindi-kóshirmeni jylyna bir ret dástúrli poshta arqyly alýdy qalap, biraq turǵylyqty mekenjaıyn ózgertken bolsa, onda ol jaıynda qorǵa habarlaýy tıis. «Qazaqstan Respýblıkasynda zeınetaqymen qamsyzdandyrý týraly» zańynda álgindeı talapty mekenjaıy ózgergennen keıin 10 kún ishinde oryndaýy qajet dep kórsetilgen. Bulaı bolmaǵan jaǵdaıda poshta operatory zeınetaqy shotynan úzindi kóshirmeni adresatqa jetkize almaı, ol qorǵa qaıtyp oralady. Sondyqtan BJZQ kelesi jyldan bastap habarlaý mártebesi «anyqtalmaǵan» dep belgilenetin salymshyǵa úzindi kóshirmeni jibermeıdi. Qarasha aıynyń basynda mundaı salymshylardyń sany zeınetaqy jarnasynyń barlyq túri boıynsha shottardyń jalpy sanynyń 1 mln-nan astamyn nemese 8,8% qurady.
Qor keńselerine «ózi kelgen kezde» aqparat berý tásili 3 029 417 adamda aıqyndalǵan. Al ótken jyly bul kórsetkish 1 938 547 ótinishti qurady. Ósim – 56,3%. Alaıda bul statıstıkany kóbinese jańadan ashylǵan shot ıeleriniń tolyqtyrǵanyn eskergen jón. Osyǵan baılanysty BJZQ zeınetaqy júıesine jańadan kelgenderge 2019 jyldan bastap mindetti zeınetaqy jarnalary boıynsha JZSh ashý úshin shart jasaýdyń qajeti joq ekenin eskertedi. Birinshi jarna túsken kezde shot avtomatty túrde ashylady. Jeke tulǵany sáıkestendirý mindetti zeınetaqy jarnalaryn aýdarý kezinde tólem tapsyrmasynyń elektrondyq formatynda kórsetilgen derbes derekter (TAÁ, JSN, týǵan kúni) boıynsha júzege asyrylady. Al jeke tulǵanyń jeke basyn kýálandyratyn qoldanystaǵy qujattyń derekteri, turaqty turatyn jeri týraly barlyq qajetti málimetti BJZQ memlekettik organdardyń aqparat júıesinen alady. Mundaı shotty ashý kezinde habarlaý tásili avtomatty túrde «Óz kelip, ótinish bildirgen» bolyp aıqyndalady. ıAǵnı, JZSh-sy jaqynda ashylǵan barlyq salymshylarǵa BJZQ keńsesine jeke basyn kýálandyratyn qujatpen kelip, qajetti habarlaý tásilin tańdaý usynylady. Sondaı-aq, muny elektrondyq tsıfrlyq qoltańba bolǵan jaǵdaıda enpf.kz saıty arqyly qashyqtyqtan jasaýǵa bolady.
BJZQ jeke zeınetaqy shotyn kez-kelgen yńǵaıly tásilmen únemi qadaǵalap otyrý qajettiligin eskertedi. Ol shotyńyzdyń únemi tolyǵyp otyratynyna kózińizdi jetkizip, bolashaq zeınetaqyńyzdy josparlaýda senimdi bolýǵa múmkindik beredi.