Qalalardy 5G tehnologııasymen qamtý deńgeıi qandaı
ASTANA. KAZINFORM — Búgin Májilistiń jalpy otyrysynda 2024 jylǵy respýblıkalyq bıýdjettiń atqarylýy týraly Úkimet esebin talqylaý kezinde QR Qarjy mınıstri Mádı Takıev ulttyq jobalardy iske asyrý qorytyndysyn jarııalady.
— «Jaıly mektep», «Aýylda densaýlyq saqtaýdy jańǵyrtý» jáne «Qoljetimdi ınternet» úsh ulttyq jobany iske asyrýǵa 751 mlrd teńge bólindi. «Jaıly mektep» ulttyq jobasyn iske asyrýǵa óńirlerge 647 mlrd teńge aýdaryldy. 254 myń oqýshy orny ashyldy, 105 mekteptiń qurylysy aıaqtaldy. 2025 jyly taǵy 112 mektepti paıdalanýǵa berý josparlanǵan, — dedi M. Takıev.
Onyń aıtýynsha, «Aýylda densaýlyq saqtaýdy jańǵyrtý» ulttyq jobasyn iske asyrýǵa 91,3 mlrd teńge bólindi. 460 nysannyń qurylysy aıaqtaldy. 2025 jyldyń sońyna deıin 195 densaýlyq saqtaý obektisiniń qurylysy aıaqtalyp, 32 kópsalaly ortalyq aýdandyq aýrýhana jańǵyrtylatyn bolady. Medıtsına kadrlarynyń tapshylyǵyn tómendetý boıynsha oń serpin baıqalady. 2023 jylmen salystyrǵanda dárigerler tapshylyǵy 17 paıyzǵa tómendedi.
— «Qoljetimdi ınternet» ulttyq jobasyn iske asyrýǵa 13 mlrd teńge bólindi. 5G-men respýblıkalyq mańyzy bar qalalar 30 paıyzǵa, oblystyq mańyzy bar qalalar 15 paıyzǵa qamtyldy, — dedi mınıstr.
Aıta keteıik, 2027 jyldyń sońyna deıin baılanys operatorlary 5G tehnologııasyn damytýǵa 450 mıllıard teńge ınvestıtsııa salady.
Birneshe jyl buryn elimizde 5G jańa uıaly baılanys jelisin engizý bastaldy. Joba aıasynda 2027 jylǵa qaraı respýblıkalyq mańyzy bar qalalardyń 75 paıyzynda, oblys ortalyqtarynyń 60 paıyzynda 5G tehnologııasy qosylady.