5G tehnologııa ınternet tarıfine qalaı áser etedi

ASTANA. QazAqparat – «Qazaqtelekom» aktsıonerlik qoǵamynyń Innovatsııalar jónindegi bas dırektory Nurlan Meıirmanov 5G-ınternettiń paıda bolýy tarıf qunyna qalaı áser etetinin túsindirdi, dep habarlaıdy QazAqparat tilshisi.

«5G-diń qosylýy tikeleı tarıfti ósirmeıdi. Tek jelini paıdalanýdyń jańa joly usynylady. Onyń trafık kólemi áldeqaıda úlken, jyldamdyq kórsetkishi áldeqaıda joǵary bolady. ıAǵnı, ınternet qoldanýshylar jyldamdyq nemese trafık kólemi boıynsha qazirgi tarıfterge kóńili tolmasa, jańa deńgeıdegi tarıfke ótý múmkindigi týyndaıdy. Bul qalypty praktıka búkil álemde bar», - dedi ol «Qazaqtelekom» kompanııasynyń 2022 jylǵy jumysy talqylanǵan qoǵamdyq keńes otyrysynda.

Nurlan Meıirmanovtyń aıtýynsha, aldaǵy 5 jylda oblystyq deńgeıdegi qalalardyń bárinde 5G ınternet paıda bolady.

«Josparda ár qalada neshe bazalyq stansa bolý kerektigi de kórsetilgen. Mynadaı shart qoıylyp otyr. Bıyl bizdegi operatorlardyń árqaısysy 390 bazalyq stansadan salyp shyǵady. Jalpy sany shamamen 800-deı bolady. Jyl saıyn 780 bazaly stansa salynyp otyrýy kerek. Osynyń arqasynda 5 jyldyń ishinde 7 myńdaı bazalyq stansa 5G ınternet tarata alady. 2027 jylǵa qaraı búkil qalalar besinshi býyndaǵy uıaly baılanys jelisimen qamtamasyz etiledi dep úmittenemin», - dedi ulttyq kompanııanyń Innovatsııalar jónindegi bas dırektory.