5G engizý isin jedeldetip, 2000 aýyl mektebin Starlink joǵary jyldamdyqty ınternetke qosý máselesi talqylandy
Úkimette Premer-Mınıstr Álıhan Smaıylovtyń tóraǵalyǵymen ótken keńeste 5G tehnologııasyn engizý jáne shalǵaı eldi mekenderdegi mektepterdi joǵary jyldamdyqty ınternetpen qamtamasyz etý máseleleri talqylandy, dep habarlaıdy Kazinform Úkimettiń baspasóz qyzmetine silteme jasap.
Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın búginde Astana, Almaty, Shymkent qalalarynda jáne oblys ortalyqtarynda baılanys operatorlarynyń 800-den astam 5G bazalyq stansasy ornatylǵanyn baıandady.
Bul rette tehnologııany engizýdi jedeldetý úshin baılanys stansalaryn iske qosý merzimine aıtarlyqtaı áser etetin retteýshi birqatar kedergilerdi joıý qajet. Bul jabdyqty montajdaý rásimderin jeńildetýge, sanıtarııalyq erejelerdi halyqaralyq standarttarǵa sáıkestendirýge, jer telimderin ýaqtyly berýge jáne t.b. qatysty.
Álıhan Smaıylov Memleket basshysynyń tapsyrmasyna sáıkes respýblıkalyq mańyzy bar qalalar men oblys ortalyqtarynda 5G jelisin engizý jumystary 2025 jyldyń sońyna deıin aıaqtalýy tıis ekenin eske saldy. Osyǵan baılanysty Premer-Mınıstr artyq ákimshilik kedergilerdi jedel joıyp, halyqty sapaly joǵary jyldamdyqty ınternetpen qamtamasyz etý qajettigin basa aıtty.
Sondaı-aq jıynda bıylǵy qazan aıynda 10 aýyldyq mektep SpaceX kompanııasynyń Starlink tehnologııasy arqyly testilik rejımde keń jolaqty ınternetke qosylǵany aıtyldy. Bul jelidegi derekterdi berý jyldamdyǵy sekýndyna 200 Mbıt-ke jetedi.
Jalpy, osylaısha, respýblıkanyń shalǵaı eldi mekenderindegi 2000 bilim berý nysanyn joǵary jyldamdyqty ınternetke qosý josparlanyp otyr. Atalǵan jumys sheńberinde tıisti jabdyqtardy jetkizý jáne olarǵa tehnıkalyq qyzmet kórsetý júzege asyrylatyn bolady.
Premer-Mınıstr zamanaýı baılanys jelilerin engizýmen qatar aýyl mektepterine arnalǵan bilim berý baǵdarlamalaryn damytýǵa nazar aýdarý qajet ekenin basa aıtty. Atap aıtqanda, jańa tsıfrlyq formattar men tásilder arqyly oqýshylardyń belsendiligin jáne jalpy bilim berý úderisiniń tıimdiligin arttyrýǵa bolady.
