550 mln teńge jymqyrǵan: bóliminiń basshylary jáne 8 býhgalter sottaldy

ASTANA. KAZINFORM — Sybaılas jemqorlyqqa qarsy qyzmet bilim berý salasyndaǵy zańdylyqty qamtamasyz etý jónindegi jumystyń nátıjesinde Túrkistan oblysynda júıeli sybaılas jemqorlyq faktileriniń jolyn kesti. 

Saryaǵash aýdandyq soty aýdandyq bilim bóliminiń basshylary B. Maırıhovqa, N. Ýsıpbekovke, D. Akatovqa jáne 8 býhgalterge qatysty úkim shyǵardy.

— Olar bilim berý salasynda naqty jumys istemegen adamdarǵa jalaqy retinde aýdarý arqyly 550 mln teńge somasynda bıýdjet qarajatyn jymqyrǵany úshin kináli dep tanyldy. Akatov pen Maırıhov 7 jylǵa, Ýsıpbekov 2 jylǵa bas bostandyǵynan aıyryldy, — delingen Antıkor habarlamasynda.

Sol úkimmen býhgalterler bas bostandyǵynan aıyrý, shartty túrde bas bostandyǵynan aıyrý jáne bas bostandyǵyn shekteý túrindegi túrli jazalarǵa sottaldy.

Budan basqa, sottalǵandar memlekettik qyzmette jáne kvazımemlekettik sektorda laýazymdardy, sondaı-aq qarjy uıymdarynda 5 jyldan 10 jylǵa deıingi merzimge belgili bir laýazymdardy atqarý quqyǵynan ómir boıy aıyrylady.

Sot aktisi zańdy kúshine engen joq.

«Bultty býhgalterııa» jobasy iske asyrylyp jatyr

Jymqyrý táýekelderin azaıtý maqsatynda barlyq derlik óńirde táýekelderdi basqarý júıeleri bar býhgalterlik baǵdarlamalarǵa biryńǵaı tehnıkalyq talaptar kózdelgen, olar joǵary jalaqy men «Óli jandardy» esepteı otyryp, alaıaqtyqty ýaqtyly toqtatýǵa, jalǵan derekterdiń engizilýine tosqaýyl qoıýǵa múmkindik beredi.

Budan basqa, «Bultty býhgalterııa» jobasy iske asyrylyp jatyr, ol býhgalterlik eseptiń barlyq júıelerin ortalyqtandyrýdy jáne memlekettik organdardyń, onyń ishinde qazynashylyqtyń derekqorlarymen ıntegratsııalaýdy kózdeıdi.

Joba bıýdjetti josparlaýdyń ashyqtyǵyn qamtamasyz etýge, sondaı-aq tólem qujatyna jalǵan derekterdi engizý táýekelderin jáne basqa da qarjylyq buzýshylyqtardy boldyrmaýǵa múmkindik beredi.

Kez kelgen sáıkessizdikter eki ret tekseriledi

Qazir ákimdikter aı saıyn bilim berý uıymdarynyń býhgalterlik esep júıelerin qazynashylyq esepterimen avtomatty túrde salystyryp otyrady. Kez kelgen sáıkessizdikter eki ret tekseriledi.

Sonymen qatar, Іshki memlekettik aýdıt komıteti jáne onyń aýmaqtyq departamentteri aǵymdaǵy jyldyń tamyz aıynan bastap jalaqyny negizsiz aýdarý turǵysynan tólemderdi kameraldyq baqylaýdy júzege asyrady.

Barlyq kúdikti operatsııa Sybaılas jemqorlyqqa qarsy qyzmetke, bilim basqarmasyna jáne aýdarym jasaǵan uıymnyń ózine taldaý jasaý úshin túsedi.

Bul barlyq kúdikti operatsııany baqylaýǵa jáne quqyq buzýshylyqtardy anyqtaýǵa múmkindik beredi. Aqshalaı tólemderdi alýshylardyń derbes derekteriniń durystyǵyna tólem qujattaryn avtomatty tekserý tetigin engizý ınnovatsııalardyń biri.

Máselen, bıyl 1 naýryzdan bastap Jol kartasynyń 9-tarmaǵyn iske asyrý sheńberinde qarjy mınıstrligi Qazynashylyq komıtetiniń aqparattyq júıesin ıntegratsııalaý júrgizildi.

— 1 naýryzdan bastap Jol kartasynyń 9-tarmaǵyn iske asyrý sheńberinde qarjy mınıstrligi Qazynashylyq komıtetiniń aqparattyq júıesin Ádilet mınıstrliginiń jeke tulǵalardyń memlekettik derekter bazasymen ıntegratsııalaý júrgizildi. Endi muǵalimderge tólenetin barlyq tólem — jalaqy, issapar, syılyqaqylar jáne demalys aqysy JSN jáne TAÁ boıynsha resmı derekterge sáıkestigi avtomatty túrde tekseriledi, — delingen habarlamada. 

Qosymsha, ekinshi deńgeıdegi bankter JSN boıynsha túsken tólemderdi bank shotynyń derekterimen salystyrady. Bul úshinshi tulǵanyń banktik shoty qazirgi jumysshynyń atymen kórsetilgen kezde jalǵan málimetter boıynsha qarajat aýdarý múmkindigin tolyǵymen joıady.

— Engizilgen tetik tek bilim berý uıymdaryna ǵana emes, qazynashylyq júıesi arqyly tólemderdi júzege asyratyn basqa da memlekettik mekemelerge de qoldanylatynyn atap ótken jón. Qazirdiń ózinde biz úlken ózgerister týraly aıta alamyz jáne qabyldanǵan sharalardyń áserin kóremiz. Eger 2023 jyly osy saladaǵy jymqyrý 17 mlrd teńgeden assa, 2024 jyly jańa jymqyrý sharalarynyń arqasynda 22 mıllıon teńgege deıin aıtarlyqtaı azaıtyldy, — delingen Antıkor habarlamasynda.

Aıta ketelik Aýyl sharýashylyǵy mınıstrliginiń burynǵy qyzmetkeri tergeýge alynǵan edi. 

Osy baǵyttaǵy jumys jalǵasatyn bolady.