540 jańa medıtsınalyq nysan paıdalanýǵa berildi
ASTANA. KAZINFORM – Qazaqstanda el Prezıdentiniń tapsyrmasy boıynsha bastamashylyq jasalǵan jáne medıtsınalyq ınfraqurylymdy damytýǵa, aýyldyq jerlerdiń turǵyndary úshin medıtsınalyq kómektiń sapasy men qoljetimdiligin arttyrýǵa baǵyttalǵan «Aýyldyq densaýlyq saqtaýdy jańǵyrtý» ulttyq jobasyn aýqymdy iske asyrý jalǵasyp jatyr. Bul týraly DSM baspasóz qyzmeti habarlady.
Nysandardy salý jáne iske qosý
Búgingi tańda josparlanǵan 655 nysannyń 540 medıtsınalyq nysany paıdalanýǵa berildi. Jobada barlyǵy 655 aýyldyq densaýlyq saqtaý nysandaryn — dárigerlik ambýlatorııalardy, feldsherlik-akýsherlik pýnktter men medıtsınalyq pýnktterdi salý jáne jańǵyrtý kózdelgen.
Bul ortalyqtar buryn medıtsınalyq kómekke turaqty qol jetkize almaǵan 1 mıllıonǵa jýyq aýyl turǵyndaryn qamtýǵa arnalǵan.
Infraqurylym men jabdyqty jańartý
36 oblystyq aýrýhana men 17 perınataldyq ortalyq jańartylyp jatyr.
Balalar bólimsheleriniń tósek qory 38%-ǵa ulǵaıdy, bul balalarǵa statsıonarlyq kómektiń qoljetimdiligin aıtarlyqtaı arttyrdy.
Sońǵy eki jylda 2,1 myńǵa jýyq zamanaýı medıtsınalyq jabdyq satyp alyndy, bul medıtsınalyq uıymdardyń jabdyqtalý deńgeıin 62%-dan 86%-ǵa deıin arttyrýǵa múmkindik berdi.
Kadrlyq qamtamasyz etý
Joba sheńberinde aýyl medıtsınasynyń kadrlyq áleýetin keńeıtý kózdelgen:
* aýyldarǵa qosymsha 1 100-den astam dáriger jáne 2 500 orta býyn mamany tartyldy;
* jas dárigerler úshin turǵyn úımen qamtamasyz etý boıynsha jeńildikti baǵdarlamalar jáne kóterme tólemder engizildi;
* MSAK mamandary men arnaıy beıindi dárigerlerge basa nazar aýdara otyryp, úzdiksiz kásibı damý júıesi quryldy.
— «Aýyldyq densaýlyq saqtaýdy jańǵyrtý» ulttyq jobasy — turǵylyqty jerine qaramastan, barlyq azamat úshin medıtsınalyq kómekke teń qoljetimdilikti qamtamasyz etýge baǵyttalǵan strategııalyq qadam. Buryn ınfraqurylymy bolmaǵan aýyldarda nemese eskirgen jáne jaramsyz úı-jaılardyń ornyna jańa medıtsınalyq nysandar salynyp jatyr. Bizdiń maqsatymyz — aýyldyq óńirlerdiń turǵyndaryna úıdiń janynda zamanaýı deńgeıdegi medıtsınalyq qyzmetterdi alý, — dep atap ótti Densaýlyq saqtaý mınıstri Aqmaral Álnazarova.
Medıtsınalyq ınfraqurylymdy damytý aýyl deńgeıinde ǵana emes, óńirlik deńgeıde de jalǵasyp jatyr.
Bıyl Mańǵystaý oblysynyń Munaıly aýylynda aýdandyq aýrýhananyń qurylysy aıaqtaldy.
Qyzylorda qalasynda 300 tósektik kópbeıindi aýrýhananyń qurylysy júrgizilip jatyr.
Jyl sońyna deıin Rıdder qalasyndaǵy kópbeıindi aýrýhana men Óskemen qalasyndaǵy gematologııa ortalyǵynyń qurylysyn aıaqtaý josparlanyp otyr.
Bul nysandardy qarjylandyrý arnaýly memlekettik qordyń qarajaty esebinen qamtamasyz etilgenin atap ótý mańyzdy.
Sonymen qatar, 32 aýdandyq aýrýhana kóp beıindi aýdandyq ortalyq aýrýhanalar deńgeıine deıin jańǵyrtylyp jatyr.
Bul kúrdeli jóndeý, qaıta qurý, aýyr medıtsınalyq tehnıkany ornatý — KT, MRT, angıograftar.
Insýlt jáne júrek ortalyqtary, medıtsınalyq ońaltý, hırýrgııa, travmatologııa, qarqyndy terapııa bólimsheleri ashylyp jatyr.
Aýdandyq aýrýhanalardy jańǵyrtý ınsýlt pen ınfarkt kezinde «altyn saǵatta» kómek kórsetýge múmkindik beredi, bul júrek-qan tamyrlary aýrýlarynan bolatyn ólimniń 20%-ǵa tómendeýi, bul 4 mıllıonnan astam aýyl turǵyndary úshin joǵary tehnologııalyq kómekke qol jetkizý.
Jobany iske asyrý qysqa merzimde qala men aýyl arasyndaǵy medıtsınalyq kómekke qol jetkizýdegi alshaqtyqty edáýir qysqartýǵa, sondaı-aq Qazaqstannyń densaýlyq saqtaý júıesiniń kadrlyq, ınfraqurylymdyq jáne tehnologııalyq áleýetin nyǵaıtýǵa múmkindik beredi.