54 kıiktiń eti men 224 múıiz: Aýdarylǵan kólikti tastaı qashqan brakonerler izdestirilýde
«2020 jyldyń 11 sáýirinde saǵat 10.00 shamasynda reıdte júrgen ınspektorlar Qyzylorda oblysynyń Dosan aýylynyń mańynda qaladaǵy blokpostty aınalyp ketip bara jatqan Toıota Lend Krýzer markaly eki kólikti baıqap qalǵan. Avtokólikterdiń júrgizýshileri «Ohotzooprom» qyzmetkerlerin kórip, kúrish egilgen dalamen iz sýytpaq bolǵan. Qýǵyn kezinde kólikterdiń biri aýdarylǵanymen ondaǵylar ekinshi kólikke minip alyp, qashyp ketken», - dep jazady Facebook paraqshasynda orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet.
Aýdarylǵan avtokólikti tekserý kezinde 54 kıiktiń tutas eti men 224 múıiz, MR-153 markaly ańshy qarýy, 25 patron men pyshaq, dúrbi tabylǵan.
«Avtokólik ańshylyq úshin arnaıy jabdyqtalǵan bolyp shyqty. Іshinen oryndyqtyń bári alynyp tastalyp, salon plastık paketpen oralǵan. Avtokólikke taǵylǵan nómir esepten baıaǵyda-aq shyǵyp qalǵan kóliktiki ekeni anyqtaldy. Kıikterdi ábden daıyndalǵan ári kásibı brakonerler aýlaǵan», - deıdi ol.
Qazirgi ýaqytta Qyzylorda oblysynyń polıtsııa departamenti jedel izdestirý sharalaryn júrgizip jatyr. Qylmystyq kodekstiń 339-baby boıynsha qylmystyq is qozǵaldy.
