52 myń tonna: Túrkistan oblysynda alǵashqy baıaldy ónimi jınaldy
TÚRKІSTAN. KAZINFORM — Bıyl Túrkistan oblysynda baıaldy ónimin egýge 2,3 myń gektar aýyl sharýashylyǵy jeri bólindi. Negizgi egis alqaptary Saryaǵash, Saıram, Jetisaı, Keles jáne Túlkibas aýdandarynda shoǵyrlanǵan. Bul týraly AShM málim etti.
— Boljam boıynsha, baıaldy ónimin jınaý kólemi shamamen 52 myń tonnany quraıdy. Búgingi tańda óńirdiń dıqandary alǵashqy ónimniń 2,9 myń tonnasyn jınap úlgerdi. Kókónis ósirýshiler memlekettik qoldaý sharalaryn belsendi paıdalanyp keledi, — delingen habarlamada.
Atap aıtqanda, sýbsıdııalaý baǵdarlamasy aıasynda mıneraldy tyńaıtqyshtarǵa jumsalǵan shyǵynnyń 50–60%-y, sondaı-aq pestıtsıdterge, gerbıtsıdterge jáne bıologııalyq kúres quraldaryna ketken shyǵynnyń 50%-y óteledi.
Budan bólek, salanyń damýyna septigin tıgizetin ózge de qoldaý túrleri kórsetilýde. Agrarshylardyń úılesimdi jumysy men memlekettik qoldaýdyń arqasynda Túrkistan oblysynda kókónis sharýashylyǵy turaqty damý qarqynyn kórsetip, óńirdiń azyq-túlik qaýipsizdigin qamtamasyz etýge úles qosyp otyr.
Aıta keteıik, bıyl aýyl sharýashylyǵynyń jalpy ónim kólemi 4%-ǵa artty.