51 aýyl mektebi tirek mektepter jelisine qosylady
ASTANA. KAZINFORM - Aýyl mektepterinde alǵash ret zamanaýı STEM, art, tele stýdııa men ǵylymı kabınetter paıda bolyp, ustazdar oqý baǵdarlamasynan ótedi.
Bilim berý salasyn turaqty damytý qory, Aitas holdıngi, «Qazaqstan halqyna» qory, Nazarbaev zııatkerlik mektepteri elimizdiń Oqý-aǵartý mınıstrligi qoldaýymen «Aýyldyq aımaqtardaǵy tirek mektepterdiń áleýetin arttyrý» aýqymdy jobasynyń sońǵy kezeńin bastady.
2025 jyly jobaǵa elimizdiń ár oblysynan 51 mektep qatysady. Osylaısha, 2019 jyly bastaý alǵan joba elimizdiń ár aýdany men monoqalasynda barlyǵy 192 oqý ornyn qamtıdy. Jobanyń maqsaty – aýyl men qala mektepteri arasyndaǵy bilim sapasyndaǵy teńsizdikti joıýǵa baǵyttalǵan.
2019 jyly Aitas holdınginiń áleýmettik mıssııasy aıasynda ulttyq tirek mektepter jelisin qurý strategııasyn iske asyra bastady. Al 2022 jyly «Qazaqstan halqyna» qory qoldaýy arqasynda atalmysh joba elimizdiń ár óńirindegi aýyl mektepterine jetti. Osy aralyqta Nazarbaev zııatkerlik mektepteri jobanyń akademııalyq seriktesi bolyp keledi.
Tirek mektepter jelisine engen ár mektepte zamanaýı oqý-quraldary, STEM, robototehnıka kabınetteri, art jáne telestýdııa paıda bolady. Ustazdar elimizdiń úzdik ustazdarymen tájirıbe almasady.
Joba tolyǵymen jeke jáne qaıyrymdylyq qarjyǵa júzege asyrylady. Ár mekteptiń jabdyqtalýyna «Qazaqstan halqyna» qory 250 mln teńgeden, jalpy 12,8 mln teńge bóldi. Aitas holdıngi Bilim berý salasyn turaqty damytý qorynyń operatsııalyq shyǵyndaryn ótep berse, «Nazarbaev zııatkerlik mektepteri» DBBU aýyl ustazdaryn óz qarajatyna oqytady.
Tirek mektepter jelisin damytý aýyldaǵy bilim sapasynyń turaqty ósýine jáne balalardyń teń bilim alýyna múmkindik beredi.
2022-2024 jyldary ulttyq tirek mektepter jelisin qurý strategııasy arqasynda elimizde 141 aýyl mektebi tirek mektep statýsyn aldy. Bıylǵy 51 mekteptiń arqasynda olardyń sany 192-ge jetedi. Jalpy 1900-den astam kabınet jańadan jabdyqtalyp, 190 myńǵa jýyq zamanaýı jaǵdaıda bilim alady.
Tirek mektepter az ýaqytta joǵary nátıje kórsetip jatyr. UBT, olımpıadalar men halyqaralyq jarys jeńimpazdarynyń sany artyp keledi.
Esterińizge salsaq, 2024 jyldyń jeltoqsanynda Prezıdent Qasym-Jomart Toqaev jobaǵa qatysqan Hromtaý mektebine baryp, mektep pen ustazdarǵa joǵary baǵasyn berdi. Al premer-mınıstr Oljas Bektenov ákimdikter men Oqý-aǵartý mınıstrligine 2025 jyldyń sońyna deıin elimizde 200 tirek mektep qurýdy tapsyrǵan bolatyn.
2025 jyly qatysatyn mektepterdiń tolyq tizimin furo.kz saıtynan kóre alasyzdar.