5 jyldan keıin Qazaqstanda árbir besinshi taýar onlaın satyp alynady
ASTANA. KAZINFORM — Sońǵy bes jylda elektrondy saýda kólemi jeti esege ulǵaıyp, 3,2 trln teńgege jetti, bul bólshek saýdanyń barlyq kóleminiń 14,1% quraıdy. Bul týraly Saýda jáne ıntegratsııa mınıstrligi málim etti.
Pákistan Islam Respýblıkasynda ótip jatqan «Elektrondy kommertsııa arqyly logıstıka men bızneske qol jetkizý» halyqaralyq sammıti aıasynda Qazaqstan Respýblıkasy Saýda jáne ıntegratsııa mınıstrliginiń elektrondyq jáne bırjalyq saýda departamentiniń dırektory Ǵalııa-Baný Meırbaeva tsıfrlyq saýda salasynda qol jetken negizgi nátıjelerdi kórsetetin prezentatsııa usynyp, atqarylǵan jumys pen josparlar týraly baıandady.
Qazaqstandyq tarap tsıfrlyq saýdany damytý ekonomıkany jańǵyrtýǵa, eksporttyq áleýetti keńeıtýge jáne óńirlik ıntegratsııany kúsheıtýge baǵyttalǵan strategııalyq basymdyq ekenin atap ótti. Jasandy ıntellekt pen vırtýaldy assıstentterdi qosa alǵanda, tsıfrlyq sheshimderdi engizý syrtqy saýda operatsııalarynyń tıimdiligin aıtarlyqtaı arttyrýǵa jáne klıenttik servıstiń sapasyn jaqsartýǵa múmkindik beretini atap ótti.
Qazaqstan e-commerce sektorynda aıtarlyqtaı ósim kórsetti. Sońǵy bes jylda elektrondy saýda kólemi jeti esege ulǵaıyp, 3,2 trln teńgege jetti, bul bólshek saýdanyń barlyq kóleminiń 14,1% quraıdy.
— Salanyń ári qaraı ósý áleýeti zor. Bizde joǵary tsıfrlyq qoljetimdilik, damyǵan fınteh-ınfraqurylym jáne 8 mıllıonnan astam belsendi paıdalanýshylar, ıaǵnı jastar bar. Biz 5 jyldan keıin árbir besinshi satyp alý onlaın rejıminde júzege asyrylady dep josparlap otyrmyz. Ol úshin bıylǵy jyldyń naýryz aıynda elektrondy saýdany damytý jospary bekitildi. Basymdyqtardyń qatarynda zańnamany jetildirý, halyq úshin bilim berý bastamalaryn iske qosý, kásipkerler úshin qarjylyq qoldaý sharalaryn engizý jáne zamanaýı logıstıkalyq ınfraqurylymdy damytý bar, — dep atap ótti Ǵalııa-Baný Meırbaeva.
Tutynýshylardyń quqyqtaryn qorǵaý jáne naryqtyń barlyq qatysýshylary úshin teń jaǵdaı jasaý máselelerine erekshe nazar aýdaryldy. Spıker óz sózinde Qazaqstannyń halyqaralyq alańdarda — DSU, BUU, ShYU, EAEO — transshekaralyq saýdany ońaılatý jáne qolaıly tsıfrlyq orta qurý baǵytyndaǵy belsendi jumysyn atap ótti. Osy turǵyda QR Saýda jáne ıntegratsııa mınıstrligi men Pákistan IR Kommertsııa mınıstrligi arasyndaǵy elektrondyq saýda salasyndaǵy ózara túsinistik pen yntymaqtastyq týraly 2025 jylǵy sáýirde qol qoıylǵan memorandým erekshe atap ótildi, bul ekijaqty strategııalyq áriptestikti nyǵaıtýǵa jasalǵan mańyzdy qadam boldy.
Qazaqstan sammıt sheńberinde tájirıbe almasý jáne birlesken sheshimder ázirleý neǵurlym ornyqty, ınklıýzıvti jáne ózara baılanysty óńirlik saýda arhıtektýrasyn qalyptastyrýǵa yqpal etetinine senim bildirdi. QR Saýda jáne ıntegratsııa mınıstrligi ekonomıkalyq ósýdi qamtamasyz etý jáne halyqtardyń ál-aýqatyn arttyrý maqsatynda ashyqtyqqa, tehnologııalyq progreske jáne halyqaralyq yntymaqtastyqty nyǵaıtýǵa beıildiligin rastady.
Aıta keteıik, elektrondy saýda naryǵynda marketpleısterde qaı taýarlar kóp ótip jatqany týraly jazǵan bolatynbyz.