5 jyl ishinde aýyl sharýashylyǵy ónimderin qaıta óńdeýdi damytýǵa 372 mlrd teńge baǵyttalady
ASTANA. KAZINFORM - Memleket basshysynyń tapsyrmasymen aýyl sharýashylyǵy ónimderin qaıta óńdeýdi damytýdyń 2028 jylǵa deıingi Keshendi jospary ázirlenip, Úkimetke bekitýge usynyldy, dep habarlaıdy QR Aýyl sharýashylyǵy mınıstrliginiń baspasóz qyzmeti.
Qujat óńdeýdi qoldaýdyń jańa sharalaryn, jańa naryqtardy ashýdy, sondaı-aq qazaqstandyq óńdeýshilerdi qoldaýdyń qorǵaý sharalaryn qoldanýdy kózdeıdi.
Atap aıtqanda, shıkizat máselesin júıeli sheshý úshin SQO-nyń agroónerkásiptik keshendegi iri ındýstrıaldy ınvestıtsııalyq jobalardy áleýmettik-kásipkerlik korporatsııalar arqyly iske asyrý tájirıbesin molaıtý boıynsha sharalar qabyldanýda.
100 mlrd teńgege 65 sút-taýar fermasyn qarjylandyrý josparlanýda. Bul jylyna 372 myń tonna sútti qosymsha óndirýdi qamtamasyz etedi.
«Bul sharalar aýyl sharýashylyǵy salasynda buryn-sońdy bolmaǵan jáne jalǵasyn tabady. Sonymen qatar, Memleket basshysynyń tapsyrmasy boıynsha 2024 jyldan bastap baǵdarlama taǵy da birqatar salany qamtıtyn bolady. Endi STF, sýarý, kókónis qoımalary men qus fabrıkalaryn qarjylandyrýmen qatar taǵy 8 sala, onyń ishinde aýyl sharýashylyǵy ónimderin qaıta óńdeý kásiporyndary da qarjylandyrylatyn bolady», - dedi Aıdarbek Saparov.
Shıkizat qunyn tómendetý boıynsha keshendi sharalar qabyldandy.
Osylaısha, óńdeýge arnalǵan shıkizat qunynyń 70%-ǵa deıingi bóligin jemge ketetin shyǵyn quraıdy.
Olardyń ózindik qunyn arzandatý maqsatynda óndiristi ıntensıfıkatsııalaý, egin sharýashylyǵyn ártaraptandyrý jáne sýarý sharalary júzege asyrylýda.
Bıyl alǵash ret egis jumystaryna jeńildikpen nesıelendirý kólemi 580 mıllıard teńgeni qurap, 9 mıllıon gektar alqapty nemese aýyl sharýashylyǵy daqyldarynyń 38 paıyzyn qamtýǵa múmkindik berdi.
Mal azyqtyq daqyldardyń egis kólemi 3,4 mıllıon gektarǵa deıin ulǵaıtyldy, bul 2023 jylǵy deńgeıden 314 myń gektarǵa artyq. 2026 jylǵa qaraı mal azyqtyq daqyldardyń egis kólemin 3,6 mıllıon gektarǵa jetkizý josparlanýda.
«Ónimdilikti arttyrýdyń basty quraly – mıneraldy tyńaıtqyshtardy qoldaný. Máselen, ótken jyly jyl boıyna 670 myń tonna tyńaıtqysh engizilse, bıyl 1,5 mıllıon tonna tyńaıtqysh engizý josparlanyp, qazirdiń ózinde 962,5 myń tonna tyńaıtqysh satyp alyndy. Azyq-túlik korporatsııasy arqyly 235 myń tonna kóleminde jeńildetilgen baǵamen sharýalarǵa satý úshin turaqty jem-shóp qory jasaqtaldy. Bul sharalar óńdeý ónerkásibin joǵary sapaly, qoljetimdi shıkizatpen jetkilikti kólemde qamtamasyz etýge múmkindik beredi», - dedi mınıstr.
Ónerkásiptiń tehnologııalyq artta qalýyn sheshý, onyń ishinde ónimdi ótkizý arnalary qalyptasqan iri jahandyq ınvestorlardy tartý arqyly da sharalar qarastyrylǵan.
Mınıstrlik mal sharýashylyǵy ónimderiniń eksporttyq naryqtaryn ashý boıynsha belsendi jumys júrgizýde. EAEO, TMD, Eýropalyq Odaq, Mońǵolııa, Grýzııa, Iran, Saýd Arabııasy, Birikken Arab Ámirlikteri jáne basqa da birqatar elge qazaqstandyq mal sharýashylyǵy ónimderiniń jekelegen túrlerin eksporttaýǵa qoıylatyn veterınarııalyq talaptar kelisildi.
Tájikstan, Bahreın, Katar, Kýveıt jáne Omanǵa mal men mal sharýashylyǵy ónimderiniń eksporty jeńildetilgen tártippen júzege asyrylady.
Qytaı naryǵyn ashý boıynsha úlken jumys júrgizildi, sonyń nátıjesinde Qazaqstannyń barlyq aýmaǵynan qus eti men ilespe ónimderdi, elimizdiń ońtústik-shyǵys aýmaǵynan ashatuıaqty janýarlar men tıisti ónimderdi ákelýge engizilgen shekteýler alynyp tastaldy.
Qytaıǵa teri, ishek-qaryn ónimderine eksporttyq naryqtaryn ashý jónindegi jumys jalǵasýda.
Jalpy, Keshendi jospar aıasynda aýyl sharýashylyǵy ónimderin qaıta óńdeýdi damytýǵa 5 jyl ishinde 372 mıllıard teńgeden astam, onyń ishinde ınvestıtsııalyq maqsatqa 150 mıllıard teńge, aǵymdaǵy maqsattarǵa 222 mıllıard teńge bólý josparlanýda.
Jospardy iske asyrý tamaq jáne qaıta óńdeý ónerkásibin damytýǵa jaqsy septigin tıgizedi, qaıta óńdeý ónimderiniń jalpy óndirisin 1,4 esege arttyrýǵa, sondaı-aq agroónerkásiptik keshenniń aýyl sharýashylyǵy ónimderin qaıta óńdeý úlesin ulǵaıtýǵa múmkindik beredi.
