5 jyl ishinde aýyl sharýashylyǵy kooperatıvteriniń sany 1,5 ese ósti
ASTANA. KAZINFORM — Qazaqstanda aýyl sharýashylyǵy kooperatsııasy turaqty damyp keledi. Úkimet aýyl sharýashylyǵy kooperatsııasyna baǵyttalǵan keshendi yntalandyrý sharalaryn júzege asyryp jatyr, dep habarlaıdy AShM baspasóz qyzmeti.
Olardyń qatarynda, barlyq memlekettik qoldaýǵa teń qoljetimdilik, salyqtyq jeńildikter, aýyl sharýashylyǵy jerlerin bólý kezinde qosymsha upaı berý, fermerler men jeke qosalqy sharýashylyq ókilderin (JQSh) bilim taratý ortalyqtary bazasynda oqytý bar.
— 2023 jyldan bastap aýyldyq turǵyndardyń tabysyn arttyrý maqsatynda «Aýyl amanaty» baǵdarlamasy júzege asyrylyp jatyr. Baǵdarlama aýyldyq eldi mekender men shaǵyn qala turǵyndarynyń bıznes-jobalaryn 2,5% mólsherlememen 5 jylǵa deıingi merzimge, al mal sharýashylyǵy salasynda — 7 jylǵa deıin kredıtteý jáne lızıngteýdi qarastyrady. Kooperatıvter úshin qarjylandyrý kólemi ulǵaıtylǵan. Asyl tuqymdy mal sharýashylyǵyn damytýdy sýbsıdııalaý erejeleri aıasynda sýbsıdııalaý sharttary jeńildetilgen. Máselen, jeke sharýa qojalyqtarynan kooperatıvter úshin keıbir baǵyttar boıynsha tirkeý nómir men aýyl sharýashylyǵy jeriniń bolýy talap etilmeıdi. Júıeli memlekettik qoldaýdyń arqasynda aýyl sharýashylyǵy kooperatıvteriniń sany 2019 jyly 2 840-ten 2024 jyly 4 465-ke deıin, ıaǵnı 1,5 ese artty, — delingen habarlamada.
Memleket basshysynyń AÓK-taǵy kooperatsııany damytý jónindegi tapsyrmasy aıasynda jer resýrstary men ınfraqurylymǵa qajettilikti anyqtaý, agrokompetentsııany arttyrý, jobalardy súıemeldeý jáne basqa da sharalardy qamtıtyn keshendi is-sharalar ázirlendi.
2029 jylǵa deıin kooperatsııany damytýdy yntalandyrý jónindegi is-sharalar jospary bekitildi. Qujat úzdik tájirıbelerdi taratý, kooperatıvterdi oqytý jáne agrosúıemeldeý, sondaı-aq fermerler men sharýa qojalyqtary úshin túsindirý jáne oqytý is-sharalaryn ótkizýdi qarastyrady.
Kooperatsııanyń uzaq merzimdi damýy úshin asyraý jáne ónimdik baǵyttaǵy kooperatıvterdi sýbsıdııalaý jáne jeńildetilgen qarjylandyrý tetikteri engizilip jatyr. 2025 jylǵy qyrkúıekten bastap «Agrarlyq nesıelik korporatsııa» jelisi boıynsha asyraý alańdaryna aınalymdyq qarajatty tolyqtyrýǵa 5% mólsherlememen 12 aıǵa deıingi merzimge, menshik túrine shekteýsiz jeńildetilgen baǵdarlama iske qosylǵan.
Mal sharýashylyǵyn keshendi damytý jospary aıasynda nesıelerdi kepildendirý tetigin engizý jáne nesıe merzimin 15 aıǵa deıin ulǵaıtý josparlanǵan, bul qarjylandyrýdyń qoljetimdiligin arttyrady. Sondaı-aq tirkeý nómirin alý úshin veterınarlyq-sanıtarlyq talaptardy jeńildetý qarastyrylady, bul qoldaý baǵdarlamalaryna qatysýshylardyń sanyn arttyrady.
Aýyl sharýashylyǵy mınıstrligi aýyl sharýashylyǵy kooperatsııasynyń turaqty damýy men aýyl turǵyndarynyń tabysyn arttyrý úshin qolaıly jaǵdaı jasaý jumystaryn jalǵastyrady.
Buǵan deıin AShM jer komıssııalarynyń jumysy toqtatylatynyn jazǵanbyz.