5 balanyń ólimi: Qazaqstandyqtar qaraly otbasyǵa kómek berýde

ASTANA. QazAqparat -Astanadaǵy 5 balanyń ólimi búkil halyqty eseńgiretti. Kózinen jasy, kóńilinen zary tógilgen ana men ákeni jubatar sóz tabyla qoımas-aý mundaıda. Tek bul jazbamyzda qara jamylǵan otbasynyń qaıǵysyn teń bólispekke umtylǵan barlyq qazaqstandyqtardyń bastamalaryn atap ótýdi jón kórdik, dep habarlaıdy QazAqparat.

Kóktalda búgin bes balany sońǵy saparǵa shyǵaryp saldy. Rásimge kelgen halyqtyń qarasy mol. Qabyrǵasyn bir-birlep sókseń de, qabaq shytpas erlerdiń ózi kóz jasyna erik berdi. Halyqtyń mol shoǵyry tirkelgen áleýmettik jelini ashsańyz, bul oqıǵaǵa qabyrǵasy qaıyspaǵan, kóńil aıtpaǵan adamnyń kemde-kem ekenin kóresiz. Shıetteı balalaryn asyraý úshin tún qatyp júrip, jumysqa jegilgen áke men shesheniń bir emes, tórt nesıesiniń bary belgili boldy. Áleýmettik jelide taraǵan otbasynyń shotyna halyq shama-sharqynsha aqsha aýdaryp jatyr.

Almaty jurtshylyǵy búgin Astanada úıinde órtenip ketken 5 balany eske alý úshin 28 Panfılovshylar parkindegi məńgilik alaý mańyna jınaldy. Qaıǵyly qaza qabyrǵasyn qaıystyrǵan jurtshylyq únsiz ǵana alaý basyna kelip, gúl shoqtary men oıynshyqtar, shamdar qoıa bastady.

Mundaı aza tutý sharasy elimizdiń barlyq qalalarynda júrip jatyr.

Qazaqstan Musylmandary dinı basqarmasy qaraly otbasyǵa búgin 13 mıllıon teńge aýdarylǵaly otyrǵanyn habarlady. «Hazret Sultan» meshitiniń ustazy Maqsatbek Qaıyrǵalıev búgin 13,4 mln teńge jınalǵanyn, bul soma januıaǵa tabystalatynyn aıtqan. Іzin ala Astananyń bas ımamy Naýryzbaı Ótpenov bes balasynan aıyrylǵan otbasyǵa úı alyp beretinderin jetkizdi.

«Biz olardyń ata-anasymen sóılestik. Aqyldasa kele, meshit atynan baspana satyp alyp beremiz dep sheshtik. Biz osylaı kelistik», - dedi ol.

Kaspıı bank tarapynan da otbasyǵa kómek berildi. Óz qoldaýy retinde bank qara jamylǵan otbasynyń nesıesin jabatyn boldy.

Bolǵan oqıǵaǵa qatysty memlekettik organdar da kómek qolyn sozýda. Mádenıet jáne sport mınıstrliginiń qyzmetkerleri qaıǵydaǵy otbasy shotyna bir kúndik jalaqylaryn aýdarmaq.

Bul jaqsylyqtyń bári de eseńgiregen áke-shesheniń qaıǵy júgin bir mysqal da azaıta almas. Dese de, bári de nıetimen kómek qolyn sozyp jatyr...

Eske sala keteıik, 4 aqpan kúni túnde «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanadan órt shyqty. Órtti sóndirý barysynda 2006, 2008, 2014, 2016, 2018 jyldary týǵan 5 qyz balanyń denesi tabyldy.

Qaıǵyly oqıǵa kezinde bes balanyń ata-anasy túngi jumysta bolǵan. Búgin 5 balany elordalyqtar aqtyq saparǵa shyǵaryp saldy.

Sondaı-aq, Elbasy órtte qaza bolǵan balalardyń otbasyna kóńil aıtty.