4 balanyń anasy, 70 adamnyń panasy: Qaraǵandylyq otbasy qarttar úıin ashý úshin baryn satqan
QARAǴANDY. KAZINFORM — Qaraǵandyda qarttar úıin ashý úshin óz úıin satqan qaısar jan bar. 80 jandy panalatqan Lázzat Mýsınanyń ózi páter jaldap turady. Qazir Lázzat 4 balaǵa ana, 70 adamǵa pana bolyp otyr.
Lázzat Mýsınanyń negizgi mamandyǵy zańger. «Kıeli shańyraq» qamqorlyq ortalyǵyn ashý ıdeıasy oǵan sol salada jumys istep jergen kezde kelgen.
Alǵashynda ol turǵyndarǵa tegin zańgerlik kómek kórsetken. Keıin qujattary túgendelmegenderge úı jaldap bergen. Járdem surap kelýshiler sany kóbeıgen kezde úlken mekeme ashýdy sheshken.
— Eń basynda Jandarbekov kóshesinen bir úı taýyp, ony jalǵa aldyq. Sol eki ortada qys tústi. Ony estip taǵy adamdar kele bastady. Ár nárseniń bir nesibi bolady ǵoı, osylaısha jumys bastalyp ketti, — deıdi «Kıeli shańyraq» Qamqorlyq ortalyǵynyń quryltaıshysy Lıazzat Mýsına.
«Kıeli shańyraq» alǵashqy 4 jylda kóshpeli ortalyq bolǵan. Osy ýaqyt aralyǵynda Lázzat jubaıy Ásetpen birge birneshe jaldamaly páter aýystyryp úlgergen. Qazir qarııalar turyp jatqan úıden olardy bank bir kúnde qýyp shyqpaq bolǵanda ony satyp alýdy sheshken.
Degenmen ol úshin Áset Mýsın sharýa qojalyǵyn, al otbasy óz úıin satýyna týra kelgen. Al jetpegen qarjynyń nesıesin olar áli tólep otyr.
— Basynda úı satyp alamyz degen oıda joq edi. Osyndaı jaǵdaı bolǵan soń malymyzdy sattyq, fermamyzdy sattyq. Jetpegen aqshany olaı da, bylaı izdep kórdik, bolmady. Kredıt alaıyq desek oǵan shamamyz kelmeıdi eken, aı saıyn 3 mln tóleý kerek boldy. Sodan keıin turyp jatqan úıimizdi sataıyq dedim. Sodan eki etajdy penthaýsymyz bar sony satatyn boldyq. Basynda joldasym qarsy boldy, óıtkeni bes balamen qaıda baramyz? Ońaı emes. Biraq tarazyǵa salǵanda 5 adam álde 50 adammen kóshken qalaı dedik te, men ruqsatymdy berdim, — deıdi Lıazzat Mýsına.
Qarttar úıine kelýshiler sany artyp kele jatqandyqtan erli-zaıypty Mýsınder úlken ortalyq ashýdy armandaıdy. Birneshe jyldan beri ǵımarat salar jer surap ákimdiktiń tabaldyryǵyn tozdyrǵan.
Al ákimdiktegiler jer usyndyq, biraq ony rásimdeýge eshkim kelmedi deıdi.
— Lázzat Mýsına áleýmettik nysannyń (qarttar úıi) qurylysyna jer ýchaskesin berý máselesi boıynsha jergilikti atqarýshy organǵa aýyzsha júgindi. Kezdesý barysynda Qazaqstan Respýblıkasy Jer kodeksiniń 48-babyna sáıkes memlekettik menshiktegi jáne jer paıdalanýǵa berilmegen jer ýchaskelerin nemese jer ýchaskelerin jaldaý quqyǵyn berý saýda-sattyqta (konkýrstarda, aýktsıondarda) júzege asyrylatyny túsindirildi. Aýktsıonǵa shyǵarylatyn jer telimderiniń tizimine engizý úshin ótinishpen jáne jer telimin ornalastyrýdyń qosa berilgen shemasymen Qaraǵandy qalasy ákiminiń apparatyna júginýi qajet. Búgingi tańda Qaraǵandy ákiminiń apparatyna Mýsına ótinish bergen joq, — dep habarlady Qaraǵandy qalasynyń ákimdigi.
Alaıda, Lázzattyń aıtýynsha, ákimdikte usynylǵan ýchaskede kommýnıkatsııa joq. Al qarttar úshin, ásirese tósek tartyp jatqan qarııalar úshin sý men kárizdiń bolýy óte mańyzdy.
— Biz jer máselesin surap Astanaǵa da bardyq. Osyndaı bir jer berińdershi, biz óz kúshimizben sol kisilerge ǵımarat salamyz dedik. Ol ǵımartty bizdiń atymyzǵa bermeı-aq qoısyn, melekettiń atyna bereıik dedik. Áli de jer buıyrmady. Bir jerdi Kúngeı jaqta, bir tóbeshiktiń basynan beripti. Endi bizde qarttar bolǵannan, ol jerde jaryq ta, sý da, káriz de bolǵany kerek. Alaıda ol jerge qarııalarymyz aýyryp qalatyn bolsa, jedel járdem de jete almaıdy. Biz ol jerge ǵımaratty qalaı salamyz? — deıdi «Kıeli shańyraq» Qamqorlyq ortalyǵynyń dırektoryÁset Mýsın.
Ázirge baspanasy joqtar men qarııalar qarttar úıinde turyp jatyr. Alaıda Lázzat pen Áset Mýsınder osyndaı muqtaj jandarǵa keń ǵımarat salyp bersek dep armandaıdy.
Al Lázzat pen Ásettiń ózderi bala-shaǵasymen 1 bólmeli jaldamaly páterde turady. Іshki arpalysyna qaramastan qaısar sheshim qabyldaǵan Lázzat bar múlkin satyp, qarttar úıin ashqanyna esh ókinbeıtinin aıtady.
— Birinshi kúni jaldamaly páterge kóship, sol bir bólmeli úıde qonǵan kúni tańerteń tursam meniń kishkentaı qyzym domalap baryp ústeldiń astyna kirip ketip, edende uıyqtap jatyr eken. Sodan kóńilim bosap jylap, «óz múddemdi oılap, qatelik jasadym ba, qalaı? balalarymdy nege oılamadym?» dep kúızeliske túsip qaldym. Biraq bizge senip otyrǵan 50 adamdy oılaǵanda birden esimdi jınap aldym. 50 adamnyń kóshkeni qalaı, 5 adam kóshkeni qalaı dedim de, sodan beri jasap jatqanymyz durys dep senip kelemiz, — deıdi «Kıeli shańyraq» qamqorlyq ortalyǵynyń quryltaıshysy Lázzat Mýsına.
Qarttar úıi — Mýsınder ashqan jalǵyz ortalyq emes. Budan bólek analar men balalarǵa arnalǵan mekeme bar. Onda turmystyq zorlyq-zombylyq qurbandary men qujatsyz kóshede qalǵan áıelder turady.
Eske salsaq, Aqsý qalasynda «Qamqor» áleýmettik qyzmetter ortalyǵynyń turǵyndaryna qatysty qatygezdik kórsetý jónindegi rezonans týdyrǵan is boıynsha sot úkimi shyqty. Bul týraly Pavlodar oblysynyń prokýratýrasy málim etti.