5 bala Qazaqstannyń 20 mıllıonynshy turǵyny atandy
2023 jylǵy 14 qarashada Qazaqstan Respýblıkasynyń halyq sany 20 mıllıon adamǵa jetti, dep habarlaıdy Kazinform Ulttyq statıstıka bıýrosyna silteme jasap.
«20 mıllıonynshy azamattyń týǵan kúni barlyq qolda bar demografııalyq derekterdi eskere otyryp aıqyndaldy: Qazaqstan Respýblıkasyna turaqty turýǵa kelgen jáne odan shyqqan, týǵandar men qaıtys bolǵandardyń sany. Buryn halyq sany týraly málimetter qolmen óńdeletin jáne bul kóp ýaqytty qajet etetin. Memlekettik aqparattyq júıelerdiń ıntegratsııasy bul protsesti jedeldetýge jáne 20 mıllıonynshy azamattyń týǵan kúnin joǵary dáldikpen jáne qysqa merzimde anyqtaýǵa múmkindik berdi», - delingen Ulttyq statıstıka bıýrosynyń habarlamasynda.
Halyqtyń derekter bazasynyń kórsetkishterine sáıkes, 2023 jylǵy 14 qarashada tańǵy saǵat 8.10-da týǵan 5 bala elimizdiń 20 mıllıonynshy turǵyny atandy.
Qazaqstannyń mereıli azamattary Ulytaý, Jetisý, Atyraý, Aqmola jáne Túrkistan oblystarynda dúnıege keldi. Olardyń ishinde 3 ul jáne 2 qyz bar.
Esterińizge sala keteıik, 1991 jyly Qazaqstan Respýblıkasynyń halyq sany 16,4 mln adamdy qurady. Táýelsizdik jyldarynda el halqy 22,3% ósti. Máselen, 2022 jyly 1991 jylmen salystyrǵanda týý sany 353,2 myńnan 403,9 myń adamǵa deıin nemese 14,7% ósti.
Bala týýdyń eń joǵary máni 2021 jyly tirkelip, 446 myń balany kórsetken. Tabıǵı ósimniń artýy, onyń ishinde náreste óliminiń azaıýy nátıjesinde qamtamasyz etildi. Jalpy ólim-jitim 1991 jylǵy 8,20-dan 2022 jyly 1000 turǵynǵa shaqqanda 6,8 adamǵa deıin tómendedi. Sábıler óliminiń koeffıtsıenti 3,5-ten astam ese tómendegen.
Halyqtyń 1000 adamǵa shaqqandaǵy týý kórsetkishin kórsetetin jalpy týý koeffıtsıenti Táýelsizdik jyldary 1991 jylǵy 21,6-dan 2021 jyly 23,6-ǵa deıin ósti. 2022 jyly bul kórsetkish 20,7 boldy.
Eń mańyzdy demografııalyq kórsetkishterdiń biri bolyp tabylatyn týýdyń jıyntyq koeffıtsıenti 1991 jylǵy 2,7-den 1999 jyly 1,8-ge deıin tómendedi. Keıinnen onyń birtindep ósýi baıqaldy. 2022 jyly týýdyń jalpy koeffıtsıenti 1 áıelge 3,05 balany qurady.
Ortasha ómir súrý uzaqtyǵy 1991 jylmen salystyrǵanda 2022 jyly 6,8 jylǵa ósti, bul rette erler arasynda 7,7 jylǵa, áıelderde – 6 jylǵa ósti. Osylaısha, 2022 jyly Qazaqstanda ómir súrý uzaqtyǵy 74,4 jyldy qurady. Bul kórsetkish pandemııaǵa deıingi deńgeıden 1,3 jylǵa asady.
Buǵan deıin Memleket basshysy Qasym-Jomart Toqaev qazaqstandyqtardy halyq sanynyń 20 mıllıonǵa jetýimen quttyqtaǵan edi.
