5 aıda 1,3 trln teńgeniń aýyl sharýashylyǵy ónimi jınaldy

ASTANA. KAZINFORM – Bıyl 5 aıda 1,3 trln teńgeniń aýyl sharýashylyǵy ónimi jınaldy. Bul týraly Aýyl sharýashylyǵy vıtse-mınıstri Erbol Tasjúrekov aıtty.

- Búginde agrarlyq sala oń dınamıkany kórsetip otyr. El qoljetimdi azyq-túlikpen tolyqtaı qamtamasyz etilgen. Osy jyldyń 5 aıynyń qorytyndysynda aýyl sharýashylyǵy jalpy óniminiń kólemi 4 paıyzǵa ulǵaıyp, 1,3 trln teńgeni qurady. Biz jyl saıyn ishki qajettilik shamamen 10 mln tonna bolǵan kezde 20 mln tonnadan astam astyq óndiremiz. Ótken jyly astyq ónimi boıynsha rekordtyq jyl bolyp, 26,7 mln tonna astyq bastyryldy. Bul 2023 jylǵy deńgeıden 1,5 ese artyq, - dedi ol Ortalyq kommýnkatsııalar qyzmetindegi brıfıngte.

Onyń aıtýynsha, óndiristiń ósýi kúrish, qaraqumyq, maıly daqyldar, kartop sııaqty basqa da negizgi daqyldarda baıqalady. Máselen, kúrish 2023 jyldan 16 paıyz artyq bastyrylyp, 563,1 myń tonna ónim alyndy. 118,1 myń tonna qaraqumyq jınaldy. Maı tuqymdarynyń jalpy túsimi 3,2 mln tonna boldy. Bul ótken jylǵy deńgeıden 46 paıyzǵa kóp. Onyń ishinde kúnbaǵys ótken jylmen salystyrǵanda – 35, kartop 40 paıyzǵa mol jınaldy.

- Mal sharýashylyǵy salasynda da osyndaı jaǵdaı baıqalady. Bıyl 5 aıda iri qara mal basy - 23,4, qoı men eshki - 7,8, jylqy - 12,2, qus 2,2 paıyzǵa artty. Et óndirisi – 3, qus eti 6,2 paıyzǵa ulǵaıdy. Jyl basynan beri 1,3 mln tonna sút óndirildi. Bul ótken jyldyń uqsas kezeńiniń deńgeıinen 7,5 paıyzǵa kóp. Taýyq jumyrtqasy 200 mln danaǵa artyq, - dedi Erbol Tasjúrekov.

Aıta keteıik, elimizde mal sharýashylyǵyna arnalǵan jańa nesıe baǵdarlamasy iske qosylady.