5 aqpanda eldegi qaı joldar ashyq, qaısysy jabyq

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady. 

2026 jylǵy 5 aqpan saǵat 08:30-daǵy jaǵdaı boıynsha, qolaısyz aýa raıyna baılanysty respýblıkalyq mańyzy bar kelesi avtojol ýchaskelerinde barlyq kólik túri úshin qozǵalysqa shekteldi:

Qostanaı oblysy

• «Qostanaı – Áýlıekól – Surǵan» avtojoly, 8-108-shaqyrym (Tobyl qalasy – Áýlıekól eldi mekeni ýchaskesi).

Mańǵystaý oblysy

• «Taýshyq – Shetpe» respýblıkalyq mańyzy bar avtojoly, 0-70-shaqyrym;

• «Dossor – Qulsary – Beıneý – Saı-Ótes – Shetpe – Jetibaı – Aqtaý» avtojoly, 338-638-shaqyrym (Beıneý aýyly – Shetpe aýyly ýchaskesi);

• «Beıneý – Aqjigit – Ózbekstan shekarasy» avtojoly, 0-85-shaqyrym.

Sondaı-aq myna joldarda júk jáne qoǵamdyq kólikteriniń qozǵalysy shekteldi:

Aqtóbe oblysy

• «RF shekarasy – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy» avtojoly, 776-1240-shaqyrym (ECO oil janarmaı beketi – Qyzylorda oblysynyń shekarasy ýchaskesi).

Qyzylorda oblysy

• osy joldyń 1240-1362-shaqyrymy (Aqtóbe oblysy shekarasy – Aral qalasy ýchaskesi).

Sondaı-aq «Astana – Shiderti – Pavlodar – Ýspenka – RF shekarasy» avtojolyndaǵy kópir ótkeliniń shetki arqalyqtary zaqymdanýyna baılanysty «Qalqaman» jol aıryǵy ýchaskesi – Qalqaman aýylyna kireberis jáne Astana baǵytyna shyǵatyn jol jabyldy.

Al Osınov asýynda tirkemesi bar jáne jartylaı tirkemeli júk kólikteriniń qozǵalysy ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys aıaqtalǵansha saqtalady.

Buǵan deıin Qazgıdromet 5 aqpanda qar, tuman jáne kóktaıǵaqqa baılanysty birqatar óńirde eskertý jasaǵan edi.