5 aqpan. Tulǵalar týǵan kún
Búgin, 5 aqpan kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
67 jyl buryn (1957) «H.Dosmuhamedov atyndaǵy Atyraý ýnıversıteti» KEAQ dırektorlar keńesiniń tóraǵasy, táýelsiz dırektory, «JAŃARÝ» respýblıkalyq qoǵamdyq birlestigi tóraǵasynyń orynbasary Beıbit Baımaǵambetuly MAMRAEV dúnıege keldi.
Qaraǵandy oblysynda týǵan. Qaraǵandy Memlekettik ýnıversıtetiniń fılologııa fakýltetin bitirgen.
Eńbek jolyn 1973 jyly jumysshy bolyp bastaǵan. 1980 jyly Qaraǵandydaǵy Tsentrosoıýz kooperatıvtik ınstıtýtyna oqytýshy retinde shaqyrylǵan. 1986 jyly Abaı atyndaǵy Qazaq pedagogıkalyq ınstıtýtynyń aspırantýrasyn mezgilinen buryn aıaqtap, kandıdattyq dıssertatsııasyn qorǵady. Qaraǵandy memlekettik ýnıversıtetine dotsent bolyp qyzmet etti.
1989 jyly QR Ulttyq ǵylym akademııasynyń ǵylymı-zertteý jumystaryna aýysty. M.Áýezov atyndaǵy Ádebıet jáne óner ınstıtýtynda basshylyq qyzmetter atqardy.
1998 jyly fılologııa ǵylymdarynyń doktory ǵylymı dárejesin alý dıssertatsııasyn qorǵady. 2000 jyly professor ǵylymı ataǵy berildi. Akademık Zeınolla Qabdolovtyń shaqyrýymen ál-Farabı atyndaǵy Qazaq memlekettik ýnıversıtetiniń ádebıet kafedrasynyń professory qyzmetin atqardy.
2000-2004 jyldary QR Prezıdent Ákimshiliginde bilim jáne ǵylym sektoryn, keıin Іshki saıasat basqarmasynyń áleýmettik saıasat sektoryn basqardy. Ǵylym, bilim, mádenıet («Mádenı mura») sport jáne týrızm densaýlyq saqtaý, turǵyn úı qurylysyn damytý salalaryndaǵy memlekettik baǵarlamalardy ázirleýge belsendi atsalysty.
2004 jyly dıplomatııalyq qyzmetke jiberildi. Qazaqstan Respýblıkasynyń Reseı Federatsııasyndaǵy Elshiliginde Keńesshi-Elshi boldy. Bul qyzmeti kezinde Memleket basshysynyń tapsyrmasymen, QR-diń RF-daǵy Tótenshe jáne Ókiletti Elshisi Q.E.Kósherbaevtyń jetekshiligimen mańyzdy gýmanıtarlyq-mádenı jobalar júzege asyryldy – Moskva qalasynda qazaqtyń uly aqyny Aaı Qunanbaıuly men Keńes Odaǵynyń batyry Álııa Moldaǵulovaǵa, Volokolamskide Keńes Odaǵynyń batyrlary Baýyrjan Momyshuly men I.V.Panfılovqa eskertkish ornatyldy. Moskvadaǵy Qazaqstan Elshiliginde Abaı ınstıtýty ashyldy.
2006-2008 jyldary QR Prezıdenti Ákimshiliginiń Memlekettik ınspektory laýazymynda respýblıka óńirleriniń ekonomıkalyq saıasaty men damýyn júzege asyrý baǵytynda belsendi jumys istedi. 2008-2012 jyldary S.Amanjolov atyndaǵy Shyǵys Qazaqstan memlekettik ýnıversıtetiniń rektory, 2012-2016 jyldary «H.Dosmuhamedov atyndaǵy Atyraý memlekettik ýnıversıtetiniń» rektory boldy.
2014 jyly AQSh-ta Kalıfornııalyq Berklı ýnıversıtetinde ǵylymı taǵylymdamadan ótti. 2016-2021 jyldary QR Parlamenti Májilisiniń VI shaqyrylym depýtaty, Áleýmettik-mádenı damý jónindegi komıtettiń tóraǵasy boldy. «Qurmet» (2011) ordenimen jáne birneshe medalmen marapattalǵan.
59 jyl buryn (1965) Shekara áskerleri qolbasshylary keńesiniń úılestirý qyzmeti tóraǵasynyń orynbasary Naıl Faıyzrahmanuly ALDAEV dúnıege keldi.
Almaty oblysynda týǵan. 1987 jyly F.E.Dzerjınskıı atyndaǵy KSRO MQK Joǵary shekara komandalyq ýchılışesin, 2002 jyly Qazaqstan Respýblıkasy Qarýly Kúshteriniń Áskerı akademııasyn, 2018 jyly «Belarýs Respýblıkasynyń Áskerı akademııasy» bilim berý mekemesiniń Qarýly Kúshter Bas shtabynyń fakýltetin támamdaǵan.
Eńbek joly: 2015-2018 jyldary – QR UQK-de shekara zastavasynyń bastyǵy, shekara komendatýrasynyń komendanty, jasaq bastyǵy, shekara qyzmeti bastyǵynyń orynbasary, óńirlik basqarma bastyǵy, dırektor orynbasary.
Qazirgi qyzmetin 2019 jyldan bastap atqaryp keledi. KSRO, Reseı Federatsııasy, Qazaqstan Respýblıkasy úkimettik men vedomstvolyq nagradalarymen marapattalǵan.
55 jyl buryn (1969) jazýshy, mádenıettanýshy, jýrnalıst Dıdar AMANTAI dúnıege keldi.
Qaraǵandy oblysynyń Qarqaraly aýdanynda týǵan. 1986 jyly Qazaq polıtehnıkalyq ınstıtýtyna túsedi. 1989-1994 jyldary ál-Farabı atyndaǵy Qazaq Ulttyq ýnıversıtetiniń fılosofııa jáne saıasattaný fakýltetin úzdik bitirgen. 1994-1997 jyldary Teatr jáne kıno ınstıtýtyn kınodramatýrg mamandyǵy boıynsha úzdik bitirip shyǵady.
1987-1989 jyldary «Jas alash», «Zaman Qazaqstan» gazetterinde tilshi, bólim meńgerýshisi, 1997-2002 jyldary – «Habar» agenttiginde baǵdarlama redaktory, «Maıdan» tok-shoý redaktorlar bóliminiń jetekshisi, «Betpe-bet» baǵdarlamasynyń júrgizýshisi, 2002-2004 jyldary «Zerde» jobalaý tobynyń jetekshisi bolǵan. 2004 jyly Sh.Aımanov atyndaǵy «Qazaqfılm» ulttyq kınokompanııasynyń bas redaktory, 2005-2006 jyldary «El men jer» jáne «Azamat kz» gazetiniń dırektory, 2004-2008 jyldary «Nachnem s ponedelnıka» gazetiniń bas dırektory jáne bas redaktory, 2008 jyly iskerlik «Azamat» gazetiniń dırektory qyzmetin atqardy. 2006-2008 jyldary «31 arnanyń» «Abaıtaný» jáne «Zamandastar» televızııalyq baǵdarlamalarynyń avtory jáne júrgizýshisi, 2009-2016 jyldary Sh. Aımanov atyndaǵy «Qazaqfılm» Ulttyq kınokompanııasynyń bas redaktory qyzmetinde. 2016 jyldan – «Qazaqstan-Semeı» RTRK AQ fılıalynyń dırektory.
Alǵashqy kitaby 1996 jyly «Postskrıptým» degen atpen jaryq kórdi. Keıinnen «Qasterle meni» (2000), «Gúl men kitap» (2003), «Kúzgi randevý» (2005) kitaptarymen qatar «Nurǵısa Tilendıev», «Áljappar Ábishev» derekti fılmderiniń, «FEF» kórkem fılmderiniń stsenarııin jazǵan.
«Daryn» memlekettik Jastar syılyǵynyń (1999), Táýelsiz «Tarlan» syılyǵynyń laýreaty (2007).
43 jyl buryn (1981) Atyraý oblysy Qyzylqoǵa aýdanynyń ákimi Qanat Qadyrjanuly AZMUHANOV dúnıege keldi.
Atyraý qalasynda týǵan. Ortalyq Azııa ýnıversıtetin zańger mamandyǵy, H.Dosmuhamedov atyndaǵy Atyraý memlekettik ýnıversıtetin «qarjyger» mamandyǵy boıynsha bitirgen. Reseı Federatsııasynyń Astrahan memlekettik ýnıversıtetinde magıstratýrada oqydy, zań ǵylymdarynyń magıstri. Chehııanyń Praga qalasyndaǵy Central Bohemia Institute of Applied Science and Management oqý ornynda bilim aldy, iskerlik ákimshilendirý doktory.
Eńbek joly: 2010-2012 jyldary «Júze» JShS zań keńesshisiniń kómekshisi, zańger; «CaspianProjectServices» JShS dırektorynyń orynbasary, dırektory, «RegionTransCom» JShS bas dırektory; «Nur Otan» partııasy Atyraý oblystyq fılıaly qoǵamdyq-saıası jumys bóliminiń konsýltanty, uıymdastyrý-partııalyq jumys bóliminiń meńgerýshisi bolyp qyzmet atqarǵan. 2012-2013 jyldary «QazTransOıl-Logıstık» JShS dırektory, 2013-2016 jyldary «Nur Otan» partııasy qalalyq fılıaly tóraǵasynyń birinshi orynbasary, 2016-2018 jyldary Atyraý qalasy máslıhatynyń hatshysy, 2018-2020 jyldary «Region Trans Com» JShS kadrlar jónindegi dırektory, 2020 jyly QR Eńbek jáne halyqty áleýmettik qorǵaý mınıstrligi Áleýmettik áriptestik departamentiniń dırektory bolyp jumys atqardy. 2020-2022 jyldary Atyraý oblysynyń ishki saıasat basqarmasynyń basshysy qyzmetinde boldy.
