40 jylǵa jýyq ómirin energetıkaǵa arnaǵan ınjener qazir 5 myń abonentke qyzmet kórsetedi
22 jeltoqsan – energetıkter kúni. Ótken ǵasyrda bolǵan meıram elektr energııasyn berý jáne taratýmen aınalysatyn kásip ıeleriniń basyn biriktirgen. Búginde energııasyz ómirdi elestetýdiń ózi qıyn, otbasyndaǵy jaılylyqtyń ózin aıtpaǵanda, ekonomıkanyń barlyq salasy elektr qýatyna táýeldi, dep habarlaıdy Kazinform.
«Soltústik Qazaqstan elektr jelilerin taratý kompanııasy» AQ Petropavl qalalyq elektr jelileri basqarmasy taratý tobynyń jetekshi ınjeneri Gúlnara Markasarına bul salada 30 jyldan astam ýaqyt eńbek etip keledi. 1986 jyly alǵash ret Sergeevka qalasyndaǵy elektr energııasyn satý kompanııasynyń tabaldyryǵyn attaǵan ol sodan beri bul tańdaýyna ókingen emes. Qazir tájirıbeli maman elektr energııasynyń úzdiksiz berilýin jáne onyń tutynýshylar arasynda bólinýin qamtamasyz etýdi baqylaıdy.
Mamannyń aıtýynsha, qalanyń zańdy tulǵalary 5 ınjener arasynda bólingen. Gúlnár Markasarına osy sanattaǵy 5 myńnan astam tutynýshyǵa jaýapty.
«Biz zańdy tulǵalar men turmystyq tutynýshylar arasynda elektr energııasyn esepke alýdy jáne bólýdi júrgizemiz. Biz barlyq aktilerdiń, sharttardyń durystyǵyn tekseremiz, eseptegish quraldardyń durys jumys isteýin, elektr energııasynyń urlanbaýyn baqylaımyz. Óıtkeni biz úshin árbir kılovatt taýar ispettes, sondyqtan onyń joǵalýyna jáne urlanýyna jol bermeý mańyzdy», – deıdi Gúlnara Markasarına.
Oblys ortalyǵynda turmystyq tutynýshylar sany 90 myńnan asady. Olarǵa 3 ınjener, sondaı-aq baqylaýshylardyń úsh brıgadasy jáne 20 elektromonter qyzmet kórsetedi.
«Baqylaýshylar eseptegishterdi tekserip, kórsetkishterdi alady, plombalaýmen aınalysyp, tutynýshylarǵa esep aıyrysý túbirtekterin tapsyrady, bereshek týraly habarlamalar beredi. Al ınjenerlerdiń mindeti – barlyq osy qujattamanyń durystyǵyn tekserý, durys esepteýler júrgizý, nátıjesinde tutynýshy durys málimettermen túbirtek alady», - deıdi Gúlnara Markasarına.
Byltyr jetekshi ınjener «Qazaqstan Elektr energetıkalyq qaýymdastyǵynyń eńbegi sińirgen energetıgi» ataǵyn aldy.
«Jumysym da, ujymym da unaıdy. Tutynýshylarmen únemi qarym-qatynastamyn. Men óz jumysymdy biliktilikti arttyrýǵa múmkindik beretindigi úshin de jaqsy kóremin. Biz kún saıyn derlik jańa nárseni úırenemiz, zaman aǵymynan qalmaýǵa tyrysamyz, elektr energııasyna qatysty jańa baǵdarlamalardy jumysymyzda qoldanamyz, álsiz jaqtarymyzdy taýyp, ony jetildiremiz. Shynymdy aıtsam, men basqa eshteńe isteı almaımyn – bul sala meniń ómirimniń ajyramas bóligine aınaldy. Jumys barysynda másele týyndap jatady, biraq biz olardy sheshý úshin barlyq kúshimizdi, bilimimizdi jumsaımyz», – deıdi Gúlnara Markasarına.
