40 ýnıversıtettiń ishinen tańdaý jasaý qıyndyq týdyrǵan joq - Islam Abdýrahmanov
TÚRKІSTAN. KAZINFORM - Túrkistandyq túlek Islam Abdýrahmanovqa álemdegi alpaýyt 6 memlekette ornalasqan 40-tan astam joǵary oqý ornynan shaqyrtý keldi. ıAǵnı, jas túlek BAÁ, AQSh, Anglııa, Polsha, Malaızııa, Shveıtsarııa elderindegi álemge tanymal joǵary oqý oryndarynyń grantyn jeńip aldy.
KAZINFORM tilshisi Islammen suhbattasyp, aldaǵy josparlaryn bilip qaıtty.
- Islam, seni bıylǵy jetistigińmen shyn júrekten quttyqtaımyz! Jalpy qaı elde oqýdy josparlap otyrsyń ?
- Rahmet! Qazir AQSh-tyń Tehas shtatyndaǵy Hıýston qalasynda ornalasqan «North American University (NAU)» oqý ornyn tańdap otyrmyn. Bıznes-fınans mamandyǵyn meńgersem deımin. Basty maqsatym - shet elde bilim alyp, biliktiligimdi arttyrý. Sodan óz Otanyma oralyp, elimizdiń damýyna úles qosý. Qazir vıza alyp, qujattarymdy daıyndap jatyrmyn. Tamyz aıynyń 12 juldyzy kúni Amerıkada bolýym kerek. 21 tamyzda sabaq bastalady. Oǵan deıin jataqhanaǵa ornalasyp, jan-jaqpen tanysamyn.
- Grant ıelengen 40 ýnıversıtettiń ishinen tańdaý jasaý qıyndyq týdyrmady ma ?
- Joq, tańdaý qatty qıyn bolǵan joq. Sebebi, men 10-shy synyptan bastap «North American University (NAU)» ýnıversıtettinde oqýdy aldyma maqsat etip qoıdym. Atalǵan oqý orny bıznes-fınans mamandyǵy boıynsha joǵary nátıje kórsetedi. Basqa joǵary oqý oryndarymen salystyrǵanda reıtıngi de joǵary. Sondyqtan mamandyǵym bıznes-fınans bolǵandyqtan, birden «North American University (NAU)» oqý ornyn tańdadym.
Jalpy ózime senimdimin. 5 til bilemin. Aǵylshyn tilinde jetik sóıleımin. Sondyqtan, Amerıkada júrý, bilim alý qıyndyq týdyrmaıdy dep oılaımyn. Ýaıymdap júrgenim joq.
- Shet elde bilim alýyńa ata-ananyń kózqarasy qalaı ?
- Árıne, 40 ýnıversıtetten shaqyrtý túskende qatty qýandy. Sodan qoldady. Eshqandaı qarsylyq bildirmedi. Munyń barshasy maǵan degen ata-anamnyń úlken senim bildirgeni dep uqtym. Qudaı buıyrtsa, senim údesinen shyǵyp, eń úzdik stýdent atanýǵa ýáde beremin.
- Estýimizshe shahmat pen ІT salasyna qatty qyzyǵady ekensiń ?
- Jetinshi synypta ıntellektýaldy jarystarǵa qyzyǵa bastadym. Olardyń ishinde shahmatqa erekshe nazarym aýdy. Nátıjesinde qalalyq jáne oblystyq deńgeıde ótken túrli jarystardan júldeli oryndardy ıelenip júrdim. Al, segizinshi synypta ІT salasyn meńgere bastadym. Respýblıkalyq deńgeıde ótken «Hackathon» atty jarystan altyn medaldy jeńip aldym. Osy is-sharadan alǵan tájirıbem «Qazaqstan bilim olımpıadasynan» birinshi oryn ıelenýime sebepker boldy.
Toǵyzynshy synypta qoǵamdyq istermen aınalysamyn dep sheshtim. Túrkistan qalasynyń «Eco Turkistan» klýbynyń múshesi boldym jáne ol jerde biraz tájirıbe jınaı otyryp, Kentaý qalasynda ózimniń «Green Team» atty jeke eko klýbymdy ashtym. Onyń negizgi maqsaty – qala tazalyǵyna kóńil bólý. Qazir klýbta 50 múshe bar. Oqýshylar jazǵy demalysta bolǵan soń, ýaqytsha jumysymyz toqtap tur. Al, kúzde ekologııalyq jumystardy qaıta bastalady.
- Jalpy 40 ýnıversıtetke qujatty qalaı tapsyrdyń ? Shaqyrtý saǵan qalaı keldi ?
- Men 11 synypty oqyp júrip joǵary oqý ornyna túsýdi qolǵa aldym. Bul baǵytta aǵylshyn tilinen IELTS testin tapsyrdym. Óte jaqsy nátıje kórsettim. Sodan, myqty degen ýnıversıtetterge onlaın túrde emtıhan tapsyryp, qujattarymdy usyndym. Nátıjesinde, elektrondy poshtama 40-tan astam joǵary oqý ornynan shaqyrtý keldi. Bul múmkindikti 5 jyldyq eńbek pen izgi nıettiń jemisi dep bilemin. Sebebi, sońǵy bes jyldyqta kóp izdendim. Baǵyt-baǵdar bergen jáne bar bilimin úıretken ustazdarym Arǵyn Bastamı men Aıdos Qýatovqa aıtar alǵysym sheksiz.
- Rahmet, sáttilik tileımiz!
