4 jasar balanyń ólimi: Atyraýda balabaqsha dırektory men tárbıeshi úıqamaqta otyr
ATYRAÝ. KAZINFORM — Atyraýda 4 jasar bala balabaqshanyń káriz qudyǵyna qulap, mert bolǵan edi. Osy iske baılanysty balabaqshanyń dırektory men tárbıeshisi úıqamaqqa alyndy.
Oqıǵa 10 shildede Atyraý qalasynyń mańyndaǵy Qursaı aýylynda bolǵan.
Kúndizgi saǵat 11:05–te osyndaǵy «Chebýrashka» balabaqshasynda 4 jasar bala káriz qudyǵyna qulap qaıtys bolǵan.
Atyraý oblystyq prokýratýrasynyń málimetinshe, qazir qylmystyq is tergelip jatyr.
Qylmystyq is balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý, abaısyzda balanyń ólimine ákep soqtyrý faktisi boıynsha qozǵalǵan.
«Bala quqyǵyn qorǵaý — prokýratýranyń qadaǵalaý qyzmetiniń basym baǵyty. Kámeletke tolmaǵandardyń quqyqtaryn buzý faktileri, onyń ishinde olarǵa qarsy qylmystyq quqyqbuzýshylyq jasaý faktileri erekshe baqylaýda ustalyp otyr. Sol sebepten Atyraý qalalyq prokýratýrasynyń nusqaýymen balabaqsha dırektory men tárbıeshisi ustaldy. Olar Atyraý qalalyq polıtsııa basqarmasynyń ýaqytsha ustaý ızolıatoryna qamaýǵa oqshaýlandyryldy. Cot sheshimimen 12 shilde kúni úıqamaq túrindegi bultartpaý sharasy qoldanyldy», -dep habarlady oblystyq prokýratýradan.
Eske sala ketelik, buǵan deıin Atyraýda 4 jasar bala balabaqshanyń káriz qudyǵyna qulap, mert bolǵanyn habarlaǵan edik.
