4 mln berseń, seni ákim qylam: Astanada alaıaq áıel laýazymdy qyzmetterdi satqan

ASTANA. QazAqparat – Elordanyń qylmystyq ister jónindegi aýdanaralyq soty alaıaqtyq jasaý faktisi boıynsha úkim shyǵardy, dep habarlaıdy QazAqparat sottyń resmı saıtyna silteme jasap.

«D. esimdi azamat A-dan Kentaý qalasynyń ákimi laýazymyna jumysqa ornalastyram degen ýádemen 4 mln teńge somasynda aqshalaı syıaqy surap, onyń 650 myń teńgesin aldyn ala alǵan. Odan bólek, atalǵan azamat M-dan 3,6 mln teńge kóleminde aqsha alyp, jalpy somasy 4 mln teńgege bank dırektory laýazymyna ornalastyrýǵa ýáde etken. Sottalýshy óz kinásin tolyq moıyndamady. D-nyń kinási jábirlenýshiler men kýágerlerdiń aıǵaqtarymen, hat-habar skrınshottarymen, aýdıohabarlama jáne qylmystyq istiń basqa materıaldarymen dáleldendi», - delingen sot úkiminde.

Úkimde aıtylǵandaı, aıyptalýshyǵa jaza taǵaıyndaý barysynda kelgen shyǵynnyń jartysyn qaıtarǵany jáne 3 kishkentaı balasynyń bary eskerildi.

«Sot úkimimen D-ǵa 3 jyl 6 aı merzimge bas bostandyǵyn shekteý túrindegi jaza taǵaıyndalyp, Qylmystyq kodekstiń 190-babynyń 1, 4 tarmaqtarynyń 3-tarmaqshasyna sáıkes kináli dep tanyldy. Jábirlenýshilerdiń azamattyq talaptary tolyǵymen qanaǵattandyryldy» dep jazylǵan elorda sotynyń resmı resýrsynda.

Sot úkimi zańdy kúshine engen joq.