4 adamdy qutqarǵan balyqshynyń eńbegi baǵalandy - baspasózge sholý
*** Qyzylorda oblysynda qurylys qarqyny jyl sanap artyp keledi. Mysaly, byltyr aımaqta 152 nysan paıdalanýǵa berildi. Bul 2012 jylmen salystyrǵanda, 2 esege artyq. Naqtyraq aıtar bolsaq, aldyńǵy jyly 76 nysan salynǵan. Bul týraly «Egemen Qazaqstan» gazeti «Ótken jyly 152 nysan paıdalanýǵa berildi» degen maqalasynda jazady. Basylymnyń atap ótýinshe, ótken jyly boı kótergen nysandardyń ishindegi 23 ǵımarat bilim salasyna tıesili eken. Atap aıtqanda, 19 mektep pen 4 balabaqsha paıdalanýǵa berilgen. Densaýlyq saqtaý salasy boıynsha 3 emhana, 11 ambýlatorııa, 2 feldsherlik-akýsherlik pýnkt boı kótergen. Al, 8 nysan - mádenı oshaqtar. Sondaı-aq, 2 kommýnaldyq sharýashylyq nysany jáne 1 memlekettik mekeme ǵımaraty ashyldy. Budan bólek, oblysta 1 qorshaǵan ortany qorǵaý, 1 tabıǵı jáne tehnogendik baǵyttaǵy nysannyń qurylysy aıaqtalǵan. 8 nysan «Bıznestiń jol kartasy-2020» baǵdarlamasy aıasynda salyndy. Al 2013 jyly «Qoljetimdi baspana-2020» memlekettik baǵdarlamasy boıynsha 91 turǵyn úı paıdalanýǵa berildi. Osyndaı júıeli jumystyń arqasynda Qyzylorda oblysy 2013 jyldyń birinshi jarty jyldyǵynda qurylys salý qarqyny boıynsha respýblıkada birinshi orynǵa shyqqanyn da aıta ketken abzal shyǵar.
*** Quıǵan aýylynyń azamaty Myrzaly Batyrhannyń is-áreketin búkil Balqash aýdanynyń jurtshylyǵy erlik dep, oǵan úlken qurmet kórsetip otyr. Aýdan ákimi Beıseǵalı Júnisov te: «Mundaı batyl áreket baǵalanýy kerek», - dep jaqynda oǵan Balqash aýdanynyń qurmetti azamaty ataǵyn berip, keýdesine tósbelgi taqty. Bul týraly «Egemen Qazaqstan» gazeti «Batyl áreket oryndy baǵalandy» degen maqalasynda jazady. Basylymnyń atap ótýinshe, oqıǵa bylaı bolǵan. Búkil aýdan halqy erlikke balap otyrǵan is-áreketti jasaıtyn kúni Batyrhan balyq aýlaýǵa shyqqanda jel baıaý edi. Balqash kóli ádetinshe terbelip qana jatqan-dy. Tús aýa jel kúsheıip, tolqyndar aq kóbigin shashyp, minez kórsete bastady. Teńizdiń syry ózine belgili. Jýyq arada basyla qoımaıdy. Osyndaı oımen qaıtýǵa jınala bastaǵanda alystan sýǵa bir batyp, bir shyǵyp bara jatqan adamdardy kózi shalady. Oılanbastan qaıyǵyn solaı qaraı buryp barsa, qaıyqtary aýdarylyp, ómir úshin arpalysyp jatqan tórt adamdy kóredi. Birtindep, tórteýin de qaıyqqa shyǵaryp alypty. Olardyń ekeýi Almaty qalasynan kelgender eken. Bireýinde múlde jan joq tárizdi. Joldasy sýǵa batyrmaı, jandalbasalap júripti. Barlyǵy da qatty jaýrap qalypty. Myrzaly Batyrhan óziniń osy áreketin eshqandaı erlikke balamaıdy. «Meniń ornymda kim de bolsa osylaı áreket eter edi, men tek olardy kezdeısoq baıqap qaldym», - deıdi ol. Al ajal tyrnaǵynan aman qalǵan tórteýi: «Sýǵa aǵyp, asaý tolqyndarmen arpalysyp júrgende, eki qaıyq qasymyzdan ótip ketti. Olar bizdi baıqamady ma, qaıyrylǵan joq. Biz Batyrhanǵa sheksiz rızamyz», deıdi. *** Almatydaǵy iri bıznesmenniń uly izdeýge jarııalandy. Aleksandr Mıtrofanov jaıaý júrginshini kólikpen qaǵyp óltirip, oqıǵa ornynan qashyp ketken. Onymen qoımaı, ol buryn da polıtsııa nazaryna kóp ilingen bolyp shyqty dep jazady «Ekspress K» gazeti «Smert ız nıotkýda» atty maqalasynda. Bul oqıǵa jeltoqsannyń 28-nen 29-yna aýǵan túni bolypty. 49 jastaǵy Ádilǵazy Nurqasymov baǵdarshamnyń jasyl jaryǵyna joldy kesip ótip kele jatqanda, B 707 AB memlekettik nómirli qara Range Rover qaǵyp ketti. Kýálerdiń aıtýynsha, soqqynyń qatty bolǵany sonshalyq, adamdy 15 metr qashyqtyqqa ushyryp jibergen. Quzyrly organdardyń málimetinshe, kóliktiń rýlinde 23 jastaǵy Aleksandr Mıtrofanov otyrǵan. Ol - «Jeltoqsan» JShS dırektory Igor Mıtrofanovtyń uly. Oqıǵa ornynda kólik ıesi jedel járdem kelginin kútip, jábirlenýshini jedel járdem kóligine salýǵa kómektesip, sodan keıin oqıǵa ornynan izin sýytqan. Ádilǵazy Nurqasymov qalalyq aýrýhanaǵa jetkizilgenimen, esin jııa almaı, kóz jumdy. Onyń úsh balasy tul jetim qaldy, onyń úsitine eń kishi qyzy múgedek eken. Sol túni ákesi jarymjan qyzyna dári ákelmek bolyp dalaǵa shyqqan eken. Al osydan eki jyl buryn bul balalardyń sheshesi de o dúnıelik bolypty.
