Modernızatsııadan ótken «Astrahan-Mańǵyshlaq» magıstraldy sý qubyry iske qosyldy
13 jeltoqsanda Atyraý oblysynda rekonstrýktsııalaǵan jáne keńeıtilgen «Astrahan-Mańǵyshlaq» magıstraldy sý qubyryn iske qosý saltanaty ótti. Qazaqstan Respýblıkasynyń Premer-Mınıstri Álıhan Smaıylov beınebaılanys arqyly nysan jumysyn resmı bastady, dep habarlaıdy Kazinform.
Saltanatty sharaǵa beınebaılanys arqyly QR Premer-Mınıstriniń birinshi orynbasary Roman Sklıar, QR Sý resýrstary jáne ırrıgatsııa mınıstri Nurjan Nurjigitov, «Samuryq-Qazyna» AQ Basqarma Tóraǵasy Nurlan Jaqypov qatysty.
Sonymen birge sý qubyryn iske qosý rásimin tikeleı sol óńirde Atyraý oblysynyń ákimi Serik Shápkenov, «QazMunaıGaz» UK AQ Basqarma Tóraǵasy Maǵzum Myrzaǵalıev, «QazTransOıl» AQ bas dırektory Talǵat Qurmanbaev jáne «Magıstraldy sý qubyry» JShS ardageri Hamıt Qabylov iske asyrdy.
«Sý qubyryn kúrdeli jóndeý belgilengen merzimnen buryn aıaqtaldy. Oǵan tıimdi jobalyq sheshimder men joǵary qurylys qarqyny nátıjesinde qol jetkizildi. Bul joba sońǵysy emes, óńirde sýmen qamtamasyz etýge baılanysty basqa da aýqymdy jobalar bar», — dedi QR Premer-Mınıstri Álıhan Smaıylov.
Maǵzum Myrzaǵalıev el Prezıdenti Qasym-Jomart Toqaevtyń tapsyrmasymen QazMunaıGaz búginde Atyraý jáne Mańǵystaý oblystarynyń halqyn sýmen qamtamasyz etý úshin úsh iri jobany iske asyryp jatqandyǵyn atap ótti.
«Bıyl „Astrahan-Mańǵyshlaq“ magıstraldy sý qubyryn qaıta qurý jáne keńeıtý jobasy iske qosylyp jatyr. Joba sý qubyrynyń ótkizý qýatyn táýligine 110 myń tekshe metrden 170 myń tekshe metrge deıin arttyrady. Qubyr arqyly kelgen Edil sýy halyqty, ónerkásipti jáne aýyl sharýashylyǵyn sýmen qamtamasyz etedi. Kúrdeli jóndeý jumystary sý qubyrynyń 177 shaqyrymyna júrgizildi», — dedi M.Myrzaǵalıev.
«Astrahan-Mańǵyshlaq» magıstraldy sý qubyryn qaıta qurý jáne keńeıtý, I kezeń» jobasynyń qurylys-montaj jumystary 2022 jyldyń tórtinshi toqsanynda bastaldy. Uzyndyǵy 176 shaqyrymdaı Astrahan-Mańǵyshlaq magıstraldy sý qubyrynyń eki ýchaskesin aýystyrý jáne tozyǵy jetken jabdyqtardy jańartý jumystary aıaqtaldy.
Qurylysqa 500-den astam adam jumyldyryldy. Jobany iske asyrý nátıjesinde «Astrahan — Mańǵyshlaq» magıstraldy sý qubyrynyń ótkizý qabileti «Astrahan — Atyraý» ýchaskesinde táýligine 110 myń tekshe metrden 170 myń tekshe metrge deıin artady.
Infraqurylymdyq jobany «QazMunaıGaz UK» AQ basshylyǵymen «Magıstraldy sýaǵyzǵysy» JShS («QazTransOıl» AQ qatysý úlesi 100%) júzege asyrdy.
QMG byltyr Mańǵystaý oblysynyń Qarajanbas ken ornynda test rejıminde qabat sýyn tuşytý zaýytyn iske qosqanyn atap ótken jón.
Sonymen qatar QMG Mańǵystaý oblysynyń Kendirli kentinde qýaty táýligine 50 myń tekshe metr sý tuşytý zaýytyn salý jobasymen aınalysady.
Joba aıasynda sý tuşytý zaýytynan Jańaózen qalasyna uzyndyǵy 105 shaqyrym bolatyn magıstraldy sý qubyryn tartý josparlanýda.
Qazirgi ýaqytta zaýytty jobalaý jumystary júrgizilýde, ınjenerlik-geodezııalyq, ınjenerlik-geologııalyq, batımetrııalyq izdestirý jumystary, zerthanalyq jáne kameralyq jumystar atqaryldy. Bolashaqta bul tuşytý zaýyty Astrahan-Mańǵyshlaq sý júıesine túsetin júktemeni azaıtady dep kútilýde.
Aıta keteıik, «Astrahan — Mańǵyshlaq» magıstraldy sý qubyry — strategııalyq mańyzdy nysan, ol Atyraý oblysynyń Qurmanǵazy, Isataı jáne Jylyoı aýdandarynyń tutynýshylary, sondaı-aq Jańaózen, Beıneý, Mańǵystaý oblysynyń Mańǵystaý, Qaraqııan jáne Túpqaraǵan aýdandary úshin jalǵyz ortalyqtandyrylǵan sý kózi bolyp otyr.
Sýdy tutynatyn halyq sany Mańǵystaý oblysy halqynyń 35% jáne Atyraý oblysynda 28%. Jyl saıyn halyqtyń sý tutynýy 4-5 paıyzǵa artyp keledi.
«Astrahan-Mańǵyshlaq» magıstraldy sý qubyrynyń sý kózi Edil ózeniniń saǵalyq salasy — Qıǵash.
Atyraý oblysyndaǵy munaı-gaz óndirý jáne ónerkásiptik kásiporyndardyń, sondaı-aq «Ulttyq ındýstrıaldy munaı-hımııa tehnoparki» arnaıy ekonomıkalyq aımaǵynda ornalasqan munaı-hımııa óndirisi jobalarynyń jumysy men damýy Edil sýynyń úzdiksiz jetkizilýine baılanysty.
