338 bloger 256 mln tg salyq tóledi

ASTANA. KAZINFORM — Kameraldyq baqylaý nátıjesinde kirisin tolyq kórsetpegen 854 bloger anyqtaldy.

Salyq organdary sáıkessizdikter týraly habarlama jibergennen keıin ǵana olar tabysyn deklaratsııalap, salyq tóleı bastaǵan. Bul týraly QR Qarjy mınıstrligi málimdedi.

— 2025 jyly kameraldyq baqylaý nátıjesinde dara kásipkerlerdi qosa alǵanda 80 000 jeke tulǵaǵa anyqtalǵan aýytqýshylyqtardy joıý týraly habarlama joldandy. Áleýmettik jelilerge monıtorıng júrgizilip, 80 000 jeke tulǵanyń ishinde 854 bloger habarlama alǵany anyqtaldy. Habarlamalardy alǵannan keıin blogerler tarapynan belsendilik tanytyldy, — deıdi mınıstrlik mamandary agenttik tilshisiniń resmı saýalyna bergen jaýabynda.

Dese de, 854 blogerdiń bári birdeı bul sheshimmen kelispeıtin kórinedi. Vedomstvo málimetinshe, habarlamany alǵan ınflıýenserlerdiń 338-i ǵana óz betinshe deklaratsııa tapsyryp, salyq tólegen.

— Aǵymdaǵy jyldyń 23 sáýirindegi jaǵdaı boıynsha 338 bloger 10 mlrd 585,4 mln teńge somasyna kiristerdi óz betinshe deklaratsııalady jáne 256,7 mln teńge somasynda jeke tabys salyǵyn tóledi, — deıdi Qarjy mınıstrligi.

Aıta keteıik, buǵan deıin 53,3 mlrd teńgege tabysyn jasyrǵan blogerler anyqtalǵanyn habarlaǵan edik.

Jaýapty organdardyń habarlamasynan keıin blogerler mıllıardtaǵan kirisin kórsete bastaǵan.