31 jeltoqsan. Jylnama
Kazinform oqyrman nazaryna 31 jeltoqsanǵa arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1943 jyly Pavlodarda Qurmanǵazy atyndaǵy mýzykalyq mektep ashyldy. Munda soǵys jyldary fashıster basyp alǵan qalalardan kóshirilgen adamdar sabaq berdi. Sol kezde jeńiske jetýge áli bir jarym jyl ýaqyt bar edi, qalany ashtyq pen sýyq jalmady, alaıda turǵyndar jeńisten úmit úzbeı, óz balalaryn mýzyka oqýyna berdi.
1994 jyly akademık Zeınolla Qabdolovqa «Qazaqstannyń halyq jazýshysy» qurmetti ataǵy berildi.
1994 jyly ánshi Maqpal Júnisovaǵa «Qazaqstannyń halyq ártisi» qurmetti ataǵy berildi.
1996 jyly QR Prezıdentiniń Jarlyǵymen «Shet elderde turyp jatqan otandastarymyzdy qoldaý jónindegi memlekettik baǵdarlama» bekitildi.
2004 jyly Almatyda Qazaqstannyń tarıhy, mádenıeti jáne óneri týraly «World Discovery Kazakhstan» jýrnalynyń birinshi sany jaryq kórdi. Jańa jýrnalda tarıh, mádenıet, qazirgi Qazaqstan qoǵamy týraly túrli taqyryptar qozǵaldy.
2013 jyly Eýropalyq bıznes assambleıasy men álemniń 54 eliniń ǵalymdary kiretin Eýropa rektorlarynyń klýby «Ǵylymdaǵy esim» qurmetti ataǵyn alǵan «Qazaqstan Ǵarysh Sapary» UK» AQ prezıdentiniń mindetin atqarýshy, tehnıkalyq ǵylymdar doktory Marat Nurǵojındi «Álemdik ǵylymǵa qosqan úlesi» úshin ordenimen marapattady. Qazaqstandyq ǵalymnyń esimi XXI ǵasyrdyń kórnekti ǵalymdarynyń halyqaralyq tizimine jazyldy.
2014 jyly qoǵamnyń túrli áleýmettik mańyzdy salalaryn aqparattyq nasıhattaýǵa úles qosqany úshin jýrnalıst, «QazAqparat» HAA Almaty tilshiler bıýrosynyń basshysy Sara Mustafınaǵa «Bes qarý» zańdy tulǵalar birlestigi altyn medal tabystady.
2021 jyly Ankarada qazaq balýany Qajymuqan Muńaıtpasulynyń 150 jyldyǵyna arnalǵan erkin kúresten halyqaralyq ashyq týrnır ótti. Qazaqtyń tuńǵysh kásipqoı balýanyna arnalǵan halyqaralyq jarys Anadoly jerinde alǵash ret uıymdastyryldy. 13-17 jas aralyǵyndaǵy kil myqtylar jınalǵan sport dodasynda 100-den astam sańlaq kúsh synasty. Olardyń arasynda Qazaqstan men Túrkııadan basqa, Germanııa men Bolgarııanyń ulttyq qurama sportshylary boldy. Balýandar boz kilemde 10 salmaq kategorııasy boıynsha beldesti.
2023 jyly Qazaqstan quramasynyń qaqpashysy Igor Shatskıı bedeldi Transfermarkt portalynyń nusqasy boıynsha Ortalyq Azııadaǵy eń qymbat qaqpashylar tizimine endi. TizimdeTájikstan quramasynyń jáne «Istıklol» qaqpashysy Rýstam ıAtımov kósh bastady, ol 900 myń eýroǵa baǵalandy.
Qazaqstan ulttyq quramasy men Qaraǵandynyń «Shahter» klýbynyń qaqpashysy Igor Shatskıı naryqtyq quny 600 myń eýromen 4-shi orynda boldy. Ótken maýsymda Igor «kenshiler» sapynda 26 match ótkizdi, sonymen qatar Qazaqstan quramasynyń EÝRO-2024 irikteý kezeńindegi barlyq oıyndarynda 90 mınýt oınady.
2024 jyly sý tasqynyn boljaý jáne modeldeýge arnalǵan Tasqyn.gov.kz aqparattyq júıesin ázirleý aıaqtaldy. Aqparattyq júıeni ázirleýge otyz toǵyz maman qatysty. Júıe tórt kezeńnen turady: derekterdi jınaý, taldaý, boljaý jáne modeldeý. Derekqorǵa Qazgıdromet meteostantsııalary men ólsheý beketterinen alynǵan tarıhı gıdrometeorologııalyq derekter, jer betiniń sandyq modeli, sý tasqyny kezinde túsirilgen muraǵattyq spýtnıktik sýretter jáne ózen arnalarynyń batımetrııalyq zertteý derekteri kiredi. Taldaý bul derekterdi júıeleýdi jáne olardy sandyq formatqa túrlendirýdi qamtıdy. Taldaý GloFAS jahandyq sý tasqynynyń aldyn alý júıesinen alynǵan sý aǵyny boljamdaryna negizdelgen. Aqparattyq júıeniń derekterin modeldeý sý tasqynynan 30 kún buryn Qazaqstandaǵy barlyq ózenderdegi sý deńgeıiniń kóterilý qaýpi týraly aqparat jınaýǵa múmkindik beredi. Sondaı-aq, sý tasqyny qaýpi bar aımaqtardy boljaýǵa múmkindik beredi.
2024 jyly Qazaqstan Prezıdentiniń «2024 jyly jas qazaqstandyq jazýshylar men aqyndarǵa arnalǵan Prezıdenttik arnaıy ádebı syılyqty berý týraly» Jarlyǵymen jas qazaqstandyq jazýshylar men aqyndarǵa arnalǵan Prezıdenttik arnaıy ádebı syılyq 2024 jyly «Proza» nomınatsııasy boıynsha Sotsıalhan Esbolǵa «2026» shyǵarmasy úshin; Álimanov Jánibek Baqytulyna «Boz ushqat» óleńder jınaǵy úshin «Poezııa» nomınatsııasy boıynsha; Aıtýar Álisher Jeńisulyna «Apataı» dramalyq shyǵarmasy úshin; Syzdyqov Áset Júkenulyna «Balalar ádebıeti» nomınatsııasy boıynsha «Roket dáýiri. Sınopsıs» áńgimesi úshin berildi.