31 jeltoqsan. Tulǵalar týǵan kún
Búgin, 31 jeltoqsan kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
57 jyl buryn (1967) Aqtóbe oblysy Qoǵamdyq keńesiniń tóraıymy Táttigúl Jaqsybaıqyzy TALAEVA dúnıege keldi.
Almaty halyq sharýashylyǵy ınstıtýtyn «Qarjy jáne nesıe» mamandyǵy boıynsha bitirgen.
Eńbek joly: Shevchenko qalasynyń salyq basqarmasynda jumys istegen; 1993-1996 jyldary kommertsııalyq qurylymdarda jumys atqardy, 1996 jyly Aqtaýda, 2001 jyly Aqtóbede, 2004 jyly Atyraýda alǵashqy jeke radıostantsııanyń negizin qalaýshy boldy. 2004 jyly «Tandem» TRK JShS bas dırektory qyzmetin atqarǵan. QR Prezıdentiniń janyndaǵy BAQ isteri jónindegi qoǵamdyq keńestiń múshesi, Aqtóbe oblysynyń úkimettik emes uıymdary qaýymdastyǵynyń prezıdenti, Aqtóbe oblysynyń isker áıelder qaýymdastyǵynyń tóraıymy, QR Prezıdenti janyndaǵy Ulttyq Qoǵamdyq senim keńesiniń múshesi, QR Prezıdentiniń janyndaǵy Ulttyq Quryltaıdyń depýtaty boldy.
Mereıtoılyq medaldarmen marapattalǵan.
53 jyl buryn (1971) «Problemalyq nesıe qory» AU Basqarma tóraǵasy Qalılla Nasyrollauly ABDÝLLAEV dúnıege keldi.
Jambyl oblysynyń týmasy. Jambyl jeńil jáne tamaq ónerkásibi tehnologııalyq ınstıtýtyn (ınjener-ekonomıst) jáne M.H.Dýlatı atyndaǵy Taraz memlekettik ýnıversıtetin (zańger) bitirgen.
1994-2002 jyldary Jambyl oblysynda qarjy júıesi mekemelerinde ár túrli basshylyq qyzmet atqardy. 2002-2004 jyldary QR Qarjy mınıstrliginiń Salyq komıteti salyqtyq ákimshilendirý basqarmasynyń bastyǵy, 2004-2005 jyldary Astana qalasy boıynsha salyq komıteti tóraǵasynyń orynbasary, 2005-2008 jyldary Qostanaı oblysy boıynsha salyq komıtetiniń tóraǵasy, 2008-2012 jyldary Soltústik Qazaqstan, Pavlodar, Mańǵystaý oblystary boıynsha salyq departamentiniń bastyǵy, 2012-2013 jyldary Mańǵystaý oblysy ákiminiń orynbasary boldy. 2014-2017 jyldary QR Qarjy mınıstrliginiń Memlekettik satyp alýlar komıteti tóraǵasy, 2018 jyly QR Prezmdent Ákimshiligi Memlekettik baqylaý jáne uıymdastyrý-aýmaqtyq jumys bóliminiń memlekettik ınspektory, 2021-2024 jyldary ál-Farabı atyndaǵy QazUÝ Basqarma múshesi – qarjy qyzmeti jónindegi prorektory laýazymyn atqarǵan.
Qazirgi qyzmetin 2024 jyldyń shildesinen beri atqaryp keledi.
«Qurmet» ordenimen marapattalǵan (2015).
111 jyl buryn (1913-1975) ádebıetshi-ǵalym Ábýsaǵıt (Ábish) Musylmanqululy JIRENShIN dúnıege kelgen.
Semeı oblysynda (qazirgi Abaı oblysy Abaı aýdanynda) týǵan. Tashkenttegi Ortalyq Azııa ınstıtýtyn, Máskeýdegi Gorkıı atyndaǵy Ádebıet ınstıtýtyn bitirgen.
Atalary qolyna bılik ustaǵan, myqty áýletten boldy. Atasy Abaıdyń kómekshisi, nıettesi edi. Ózi bala kúninde moldadan saýat ashyp, 11 jasynda orys mektebinen bilim alǵan. 1928 jyly Semeıdegi aýyl sharýashylyǵy tehnıkýmynda oqydy.
Qazaq halqynyń basyna túsken zobalań jyldary, asharshylyq pen qýǵyn-súrginniń saldarynan Jırenshınder otbasy 1930-jyldary Termezge ketip, 1933 jyly Tashkentke barǵan. Ol jaqtan Qazaqstanǵa 1930 jyldardyń aıaǵynda oralǵan.
Ol Qazaqstan ǵylymı-zertteý qoǵamynyń tóraǵasy, Qazaq KSR Ortalyq murajaıynyń dırektory, Qazaqstan Memlekettik kitaphanasynyń dırektory bolyp, respýblıkalyq kitap saýda birlestigin basqarǵan. Abaı murasyn alǵash zertteýshilerdiń biri. «Abaı – qazaq halqynyń oıshyly», «Abaı jáne orystyń uly demokrattary», «Qazaq kitaptarynyń tarıhynan» atty monografııalyq eńbekteri jaryq kórgen.
110 jyl buryn (1914-1974) jazýshy, aýdarmashy, ǵalym, fılologııa ǵylymdarynyń kandıdaty Áben SATYBALDIEV dúnıege keldi.
Taraz qalasynda týǵan. Qazaq memlekettik ýnıversıtetin (ál-Farabı atyndaǵy Qazaq ulttyq ýnıversıteti) bitirgen.
1939-1962 jyldary «Ońtústik Qazaqstan» oblystyq gazetiniń ádebı qyzmetkeri, bólim meńgerýshisi, «Sotsıalıstik Qazaqstan» («Egemen Qazaqstan») gazetiniń menshikti tilshisi, bólim meńgerýshisi, «Ara» - «Shmel» jýrnalynyń jaýapty hatshysy, «Juldyz» jýrnaly bas redaktorynyń orynbasary, «Qazaq ádebıeti» gazetiniń bas redaktory bolyp qyzmet atqardy.
1968-1974 jyldary Qazaq KSR Ǵylym akademııasy Til bilimi ınstıtýtynyń aǵa ǵylymı qyzmetkeri, Qazaq Keńes entsıklopedııasy bas redaktorynyń birinshi orynbasary qyzmetinde boldy.
«Rýhanı qazyna» ǵylymı eńbekter jınaǵynyń, «Aqmaral» áńgime, ocherkter jınaǵynyń avtory. I. Goncharovtyń «Jar» romanyn, B. Polevoıdyń «Naǵyz adam týraly ańyz», F. Gladkovtyń «Balalyq shaq» povesterin, A. Qahardyń «Qyshtaq», Sh. Rashıdovtyń «Daýyldan da kúshti» romandaryn qazaq tiline aýdarǵan.