31 qańtar. Jylnama
Kazinform oqyrman nazaryna 30 qańtarǵa arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Halyqaralyq zergerler kúni
Bul merekeni qurý ıdeıasy alǵash ret 2002 jyly Kostromada ótken «Reseıdiń altyn júzigi» festıvalinde paıda boldy. Al 2008 jyly Tashkentte ótken jas zergerler festıvalinde 31 qańtardy Halyqaralyq zergerler kúni dep belgileý týraly sheshim qabyldandy.
ESTE QALAR OQIǴALAR
1991 jyly Qazaq KSR Mınıstrler Keńesiniń qaýlysymen Óskemen pedagogıkalyq ınstıtýty Shyǵys Qazaqstan memlekettik ýnıversıteti bolyp ózgertildi.
1997 jyly Almaty temirjoly basqarmasyn, Tselınnaıa temirjol basqarmasyn jáne Batys Qazaqstan temirjol basqarmasyn biriktirý arqyly «Qazaqstan temir joly» respýblıkalyq memlekettik kásiporny quryldy.
Biriktirý maqsaty – tasymaldaýdy basqarý qurylymyn ońtaılandyrý jáne qajetsiz baılanystardy joıý, temirjol salasyn qarjylyq-ekonomıkalyq damytý boldy.
2006 jyly «Samuryq» ulttyq holdıngtik kompanııasy» AQ quryldy, onyń basqarýyna ulttyq kompanııalardaǵy jáne respýblıkalyq memlekettik kásiporyndardaǵy memlekettik aktsııalar berildi.
2007 jyly Almatyda QR Ulttyq geografııalyq atlasy men «Qazaqstan Respýblıkasy» monografııasy jaryq kórdi.
«Qazaqstan Respýblıkasynyń Ulttyq geografııalyq atlasy» ǵylymı-zertteý ınstıtýttary men ortalyqtarynyń barlyq ǵylymı jáne ǵylymı-praktıkalyq jumystaryn qamtıdy. Atlastyń qundylyǵy onyń elimizdiń ekologııalyq qaýipsizdigi kartasyn birinshi bolyp shyǵarýynda.
«Qazaqstan Respýblıkasy» monografııasy úsh bólimnen turady: birinshi bólimde – «Tabıǵı jaǵdaılar men resýrstar» lıtosfera, gıdrosfera, atmosfera jáne bıosfera zertteledi. Basylymnyń ekinshi bólimi Qazaqstan Respýblıkasynyń Konstıtýtsııasy qabyldanǵannan keıingi elimizdiń áleýmettik-ekonomıkalyq damýyna, úshinshi tomy ekologııalyq qaýipsizdik máselelerine arnalǵan.
2008 jyly Almatyda belgili aqyn Muqaǵalı Maqataev atyndaǵy syılyq taǵaıyndaldy, ol aqynnyń shyǵarmashylyq murasyn zertteý men nasıhattaýǵa zor úles qosqan jazýshylar men ǵalymdarǵa beriledi.
2011 jyly Almatyda «Medeý» bıik taýly sport kesheniniń ońtústik bóliginde «Qar barysy» saıabaǵy ashyldy. Mádenı Azıada baǵdarlamasy aıasynda boı kótergen jańa oıyn-saýyq nysany almatylyqtar men qala qonaqtarynyń sporttyq rýhyn qoldaýǵa, sondaı-aq salaýatty ómir salty men belsendi týrızmdi nasıhattaýǵa qyzmet etedi.
2012 jyly Maǵjan Jumabaevtyń «Tabaldyryq. Manıfest» kitabynyń jazbasha nusqasy shyqty. Ol óz shyǵarmalarynda jazý erkindigin, shyǵarmashylyq derbestikti qorǵady.
2013 jyly ál-Farabı atyndaǵy Qazaq ulttyq ýnıversıteti Tafts ýnıversıtetinde (AQSh) qurylǵan Tallores halyqaralyq joǵary bilim ınstıtýttary qaýymdastyǵyna qabyldandy, onyń quramyna 60-tan astam elden 240-tan astam ýnıversıtetter kiredi, olardyń jalpy sany 6 mıllıon adamnan asady.
Uıym qyzmetiniń maqsaty – ýnıversıtetterdiń bilim berý baǵdarlamalarynyń joǵary standarttaryn keńeıtý jáne bekitý, joǵary oqý oryndary arasyndaǵy baılanysty keńeıtý. Qaýymdastyq saıtynda ál-Farabı atyndaǵy QazUÝ paraqshasy ashyldy.
2013 jyly qazaqstandyq Álı Amanbaev Birikken Ulttar Uıymynyń Damý baǵdarlamasynyń múgedekter quqyǵy úshin kúrestegi úzdik tabysy úshin syılyǵyn aldy. Syılyqty BUU Damý baǵdarlamasynyń ákimshisi 2013 jyly Nıý-Iorkte ótken BUU DB Dırektorlar keńesiniń birinshi otyrysynda tabys etti.
2017 jyly QR Ulttyq Banki Ulttyq Olımpıada komıtetiniń 25 jyldyǵyna arnalǵan, nomınaly 100 teńgelik «proof» sapaly eskertkish monetalaryn aınalymǵa shyǵardy. Moneta 925 synamaly kúmisten jasalǵan, massasy – 31,1 g, dıametri – 38,61 mm, taralymy – myń dana.
2018 jyly Qazaqstan Halyqaralyq azamattyq avıatsııa uıymynyń (ICAO) avıatsııalyq qaýipsizdik aýdıtinen sátti ótip, halyqaralyq standarttarǵa sáıkestiktiń joǵary deńgeıin rastady.
ICAO aýdıti memlekettiń azamattyq avıatsııa qaýipsizdigi júıesin baǵalaýdyń mańyzdy obektıvti quraldarynyń biri.
2020 jyly Slovakııa Respýblıkasy Ǵylym Akademııasynyń Ortalyq kitaphanasynda Abaı shyǵarmalarynyń 40 basylymyn, sondaı-aq onyń ómiri men qyzmetine arnalǵan jumystardy syıǵa tartý rásimi ótti.
Іs-shara fılosof, kompozıtor, saıası qaıratker, aqyn, aǵartýshy, aýdarmashy, qazaq jazba ádebıetiniń negizin qalaýshy jáne onyń alǵashqy klassıgi, orys jáne eýropalyq mádenıetke jaqyndaý rýhyndaǵy mádenıet reformatory Abaıdyń 175 jyldyǵyn (1845-1904) merekeleý aıasynda ótti.
2020 jyly Qazaqstandyq halyqaralyq qatynastar keńesi álemdegi taldaý ortalyqtarynyń jahandyq reıtıngine endi.
Halyqaralyq qatynastar jónindegi Qazaqstan keńesiniń (QASMO) «2019 jyly Ortalyq Azııadaǵy eń mańyzdy 10 oqıǵa» atty jyl saıynǵy taldamalyq sholýy 2019 jylǵy «Saıasatty zertteýdiń úzdik esebi» atalymy boıynsha álemdegi eń úzdik analıtıkalyq jumystardyń biri sanalady.
