300 mlrd teńgeden astam qarjy ekologııa salasyndaǵy jobalardy damytýǵa baǵyttaldy
ASTANA. KAZINFORM — Úkimet kádege jaratý alymy qarajaty esebinen iske asyrylatyn qatty turmystyq qaldyqtarmen jumys isteý salasyndaǵy ınvestıtsııalyq jobalardy jeńildikpen qarjylandyrý tetigin bekitti. Bul týraly Ekologııa jáne tabıǵı resýrstar mınıstrligi málim etti.
Vedomstvonyń málimetinshe, bul joba 2024 jylǵy shildede qabyldanǵan № 604 qaýlyǵa saı júzege asyp otyr.
— Qarjylandyrý jyldyq 3% syıaqy mólsherlemesimen 15 jylǵa deıingi merzimge beriledi. Baǵdarlamaǵa qatysýdyń mindetti sharty bıznes tarapynan keminde 20% mólsherinde qosa qarjylandyrý bolyp tabylady, onyń ishinde keminde 10% — aqshalaı nysanda, — delingen habarlamada.
Búgingi tańda jalpy somasy 307,1 mlrd teńgege 64 joba maquldandy, onyń ishinde:
- 53,8 mlrd teńge somasyna 16 joba «Ónerkásipti damytý qory» AQ («ÓDQ» AQ) maquldandy, onyń ishinde 9 joba 42,5 mlrd teńge somasyna «Jasyl damý» AQ qarjylandyryldy.
- 35,2 mlrd teńge somasyna 10 joba «ÓDQ» AQ-da saraptama satysynda tur.
Qalǵan 38 joba boıynsha 165,9 mlrd teńge somaǵa ınvestorlar qujattamany daıyndaýdy júzege asyrady.
«Jasyl damý» AQ kádege jaratý alymynyń operatory retinde QTQ qaıta óńdeý, suryptaý jáne kádege jaratý salasyndaǵy ınfraqurylymdy damytýǵa baǵyttalǵan jobalardy iske asyrýǵa tolyq qoldaý kórsetedi. Jobalar QR Ekologııa jáne tabıǵı resýrstar mınıstrligimen (QR ETRM), jergilikti atqarýshy organdarmen (JAO) jáne «Atameken» UKP-men kelisýdi qosa alǵanda, kóp satyly tekserýden ótedi.
Qarjylandyrý tártibi kelesi kezeńderdi qamtıdy:
1. «ÓDQ» AQ-ǵa ótinim berý;
2. Qujattar toptamasyn QR ETRM-ne joldaý jáne jobanyń qajettiligin rastaý;
3. Investıtsııalyq shtab otyrysyn ótkizý jáne qorytyndy berý;
4. Qujattardyń tolyq toptamasy bolǵan kezde 30 jumys kúni ishinde «ÓDQ» AQ-da jobaǵa saraptama júrgizý.
Jobalarǵa qoıylatyn negizgi talaptar bar:
— kommertsııalyq usynystyń, tehnıkalyq qujattamanyń, básekege qabilettilikti rastaıtyn balamaly usynystardyń jáne táýelsiz saraptamalardyń, onyń ishinde Ekologııalyq jáne tehnıkalyq saraptamalardyń qorytyndylary bolýy tıis.
«Jasyl damý» AQ baǵdarlamany iske asyrý qaldyqtarmen jumys isteý júıesin jańǵyrtýǵa ǵana emes, qaıta óńdeý salasyn damytý jáne jańa jumys oryndaryn qurý arqyly el ekonomıkasyn yntalandyratynyn atap ótti.
Aıta ketý kerek, QTQ zaýyttaryn salý boıynsha jobalar kapıtaldy qajet etetin jobalar jáne kóp jaǵdaıda greenfield-jobalar. Mundaı jobalardy qarjylandyrý qurylymdaýdyń kúrdeli shemasy, usynylatyn kepildikterdiń táýekelderin muqııat baǵalaý, ońtaıly qarjylyq júktemeni aıqyndaý maqsatynda ótinish berýshide bar ózge kredıtorlarmen ózara is-qımyl jáne ózge de mańyzdy faktorlar sııaqty faktorlarmen ushtasady.
Jalpy somasy 35 mlrd teńgege órt sóndirý tehnıkasyn satyp alýdy qarjylandyrý da aıaqtaldy. Qarajat nesıelik kelisim boıynsha «Ónerkásipti damý qory» AQ-na aýdaryldy. Qarjylandyrý Qazaqstan Respýblıkasynyń Ekologııalyq kodeksiniń talaptaryna sáıkes óndirýshiler men ımporttaýshylardan alynǵan qaıta óńdeý tólemderi esebinen júzege asyryldy.
Bul qarjylandyrý 1000-ǵa jýyq órt sóndirý tehnıkasyn satyp alýǵa múmkindik beredi. Orman sharýashylyǵy jáne janýarlar dúnıesi komıtetiniń uıymdaryna jalpy somasy 15 mıllıard teńgege 400-ge jýyq tehnıka jetkizilse, jergilikti atqarýshy organdar jalpy somasy 20 mıllıard teńgege 600-ge jýyq tehnıka satyp ala alady dep kútiledi.
«Jasyl Damý» AQ ınnovatsııalyq tehnologııalar men ınfraqurylymǵa ınvestıtsııa salý arqyly turaqty damýǵa, kómirtegi izin azaıtýǵa jáne halyqtyń ómir súrý sapasyn jaqsartýǵa baǵyttalǵan jobalardy qoldaıdy.
Eske sala keteıik, buǵan deıin qaldyqty qaıta óńdeý jobalary nege baıaý atqarylatynyn Ekologııa mınıstri túsindirgen bolatyn.