300-den astam shetel azamaty qazaqstandyq ýnıversıtetke qujat tapsyrdy

ALMATY. QazAqparat - Kóptegen sheteldik azamattar sapaly bilimdi ál-Farabı atyndaǵy Qazaq ulttyq ýnıversıtetinde alǵysy keledi. Oǵan jetekshi qazaqstandyq JOO-nyń álemdik reıtingilerdegi orny, bilim berýdiń aǵylshyn tilinde bolýy jáne de sheteldik seriktes ýnıversıtettermen 70-ten astam qosdıplomdy baǵdarlamalardyń júzege asyrylýy óz yqpalyn tıgizýde, dep habarlaıdy QazAqparat ýnıversıtettiń baspasóz qyzmetine silteme jasap. 

Alys-jaqyn shetelderdiń 150-den astam talapkeri QazUÝ-ǵa túsý úshin ýnıversıtettiń onlaın júıesi arqyly tirkelip, qujattaryn tapsyrdy. Olar rastaý aldy, endigi kezekte JOO-ǵa qashyqtyqtan qabyldana alady. Qyzmettiń bul túrin Brazılııa, AQSh, Frantsııa, Germanııa, Indonezııa, Ońtústik Koreıa, Túrkııa, Úndistan jáne taǵy basqa memleketterdiń azamattary  qoldanyp úlgerdi.

Oqý isi jónindegi prorektor Asqar Hıkmetov atap ótkendeı, bıyl sheteldik stýdentterdiń úlken legi kútilýde. Olar joǵary halyqaralyq standarttarǵa saı keletin bilim berý baǵdarlamalary, aǵylshyn tilinde oqý múmkindigi jáne zamanaýı kitaphana, stýdentterge qyzmet kórsetý ortalyǵy, sport kesheni jáne jaıly jataqhanalar ornalasqan biregeı ýnıversıtet kampýsyna qyzyǵýshylyq tanytyp otyr. QazUÝ-da olar sapaly bilim jáne biliktilik alyp, ózderiniń ǵylymı jáne shyǵarmashylyq áleýetin júzege asyra alady.

Búginde 300-den astam sheteldik azamat QazUÝ-da bilim alý úshin qujattaryn tapsyrdy. Jalpy jańa oqý jylynda 600 sheteldik stýdentti qabyldaý kútilýde. Úlken suranysqa ıe mamandyqtardyń qatarynda: jalpy medıtsına, aqparattyq júıeler, halyqaralyq qatynastar, menedjment, bıotehnologııa, qazaq jáne orys tilderi bar.