300-den astam rezervshi basshylyq qyzmetke taǵaıyndaldy
ASTANA. KAZINFORM — Memleket basshysynyń bastamasymen elimizde 2023 jyldan bastap jańa formattaǵy basshylar quramyn irikteý men daıyndaýǵa baǵyttalǵan «Bilim berýdegi ózgeristerdiń 1000 kóshbasshysy» jobasy júzege asyrylyp keledi. Búgingi kúnge joba aıasynda daıyndalǵan 327 rezervshi basshylyq qyzmetke taǵaıyndaldy. Bul týraly Oqý-aǵartý mınıstrliginiń baspasóz qyzmeti habarlady.
Joba júzege asyryla bastaǵan alǵashqy jyly kadrlyq rezervke 207 úmitker qabyldanyp, onyń 181-i memlekettik bilim berý uıymdaryna basshy bolyp taǵaıyndaldy. Al 2024 jyly ótken ekinshi kezeńde 376 pedagog rezervke alyndy. Onyń ishinde 110 pedagog mektep dırektory, al 36-sy dırektordyń orynbasary boldy.
— Oqý-aǵartý mınıstrligi bilim sapasyn arttyrý maqsatynda bes negizgi baǵytty aıqyndady. Ásirese, tıimdi menedjment pen kadrlyq rezerv qurýǵa basymdyq berilýde. Memleket basshysynyń tapsyrmasymen biz «Bilim berýdegi ózgeristerdiń 1000 kóshbasshysy» jobasyn iske qostyq. Jarty jyl boıy olar túrli irikteý kezeńderinen ótip, ózderiniń kóshbasshylyq, kásibılik jáne basqarýshylyq qabiletterin jetildirdi, — deıdi Oqý-aǵartý mınıstrliginiń Orta bilim berý komıtetiniń tóraǵasy Qanybek Jumashev.
Prezıdenttik jastar kadr rezerviniń úlgisinde jasalǵan joba mınıstrlikpen 2023 jyldan bastap júzege asyrylyp keledi. Bastapqy kezeńinde oǵan barlyǵy 13 796 ótinim kelip túsken bolatyn. Oqý baǵdarlamasyna balabaqshalar, mektepter jáne kolledjder pedagogteri qatysa alady.
Kadrlyq rezervke irikteý bes kezeń boıynsha júrgizildi: kásibılik jáne basqarý daǵdylaryn baǵalaýǵa arnalǵan testileý, oqytý, elimizdiń jetekshi mektepterinen taǵylymdamadan ótý, qorytyndy baǵalaý jáne respýblıkalyq komıssııamen áńgimelesý.
Aıta ketelik kadrlyq rezervke alynǵan pedagog mektepke konkýrssyz dırektor bolyp taǵaıyndalatyny týraly jazǵan edik.