30 jylǵa jýyq tájirıbesi bar súńgýir-qutqarýshy: Sý – tilsiz jaý

QYZYLORDA. QazAqparat – Qyzylordalyq Andreı Fedosııadı 1996 jyldan beri oblystyq Tótenshe jaǵdaılar departamentinde qyzmet atqarady. Tosyn jaǵdaıǵa tap bolǵandarǵa qol ushyn sozyp, olardy qutqarý baǵytynda tynbaı ter tógip keledi. Qaı kezde de jaýapkershilik, yjdaǵattylyq pen qaýipsizdikti qajet etetin mamandyq ıeleriniń tynys-tirshiligi qandaı? QazAqparat tilshisi osy oraıda Qyzylorda oblysy Tótenshe jaǵdaılar departamenti Jedel qutqarý jasaǵy súńgýir-qutqarý bóliminiń bas qutqarýshysy Andreı Fedosııadıdi áńgimege tartqan edi.

- Andreı ıÝrıevıch, tótenshe jaǵdaılar salasy mamandarynyń qyzmeti ońaı emes. Qashan da azamattarǵa qol ushyn sozýǵa daıyn júrý qajet. Bul mamandyqty tańdaýyńyzǵa ne sebep boldy?

- Bala kezimnen adamdarǵa kómektesýge asyǵatyn edim. Sondyqtan qutqarýshy mamandyǵy qyzyqtyratyn. Mektep qabyrǵasynda júrgende atalǵan mamandyqtyń qyr-syryna qanyǵýǵa tyrystym. Ol jaıynda túrli derekter izdep, bilimimdi tolyqtyrdym. Bul meni qutqarýshy mamandyǵyna jetelep alyp keldi. Nebári 18 jasymda tótenshe jaǵdaılar salasynda súńgýir qutqarýshy qyzmetinde eńbek jolymdy bastadym. 1996 jyldan beri atalǵan qyzmette taban aýdarmastan jumys jasap kelemin. Bala kezgi armanym oryndaldy. Qandaı qıyndyqpen betpe-bet kelsem de oǵan esh qajyǵan joqpyn. Bul mamandyǵyma degen qyzyǵýshylyqtyń áserinen shyǵar.

- Jumys barysynda qandaı qıyndyqtar kezdesedi?

- Bul sala eshqashan jeńildikti kótermeıdi. Tótenshe jaǵdaı týyndaǵan sátte bizge barlyq jaýapkershilik júkteledi. Árbir sátti tıimdi paıdalanyp, adam ómiriniń qaýipsizdigine basa nazar aýdaramyz. Qaı kezde de zardap shegýshilerdiń jaǵdaıyn túsinip, soǵan saı áreket etýge kúsh salamyz. Bilimimmen qatar, biliktiligimdi jetildirýge mán beremin. Tájirıbem de arta tústi. Qazirgi ýaqytta jumys barysynda barynsha tııanaqty eńbek etýge kóńil bólemiz.

Ras, turǵyndar arasynda kóp jaǵdaıda qaýipsizdik sharalary umyt qalyp jatady. Ásirese, sýdyń jaǵasynda bolǵan sátte árbir adam óz ómirine nazar aýdarǵany oryndy. Ókinishtisi, azamattar tarapynan keıde mundaı saqtyq sharalaryna nazar aýdarý umyt qalady. Onyń saldary nege aparyp soǵatyny belgili.

- Súńgýir qyzmetin atqarý barysynda qandaı qaǵıdaǵa súıenesiz?

- Basty mindetimiz - adam ómirine arashashy bolý. Tótennen kelgen oqıǵa kim-kimge de aýyr zardabyn tıgizedi. Qıyndyqpen betpe-bet kelemiz. Oǵan esh moıymaımyz. Bul - bizdiń basty qaǵıdamyz. Tájirıbeli maman kez kelgen sátte óziniń kásibı biliktiligin kórsetedi. Sonyń nátıjesinde adam ómirin saqtap qalýǵa múmkindik týyp jatady. Adamdarǵa qýanysh syılap jatsaq, ol – bizdiń maqsatymyzdyń oryndalǵany. Mine, meniń súńgýir mamandyǵyn atqaryp kele jatqanyma otyz jylǵa jýyqtady. Qanshama oqıǵany bastan ótkerdik. Azammattyq qorǵanys zańyna súıenip qaýipsizdik erejelerin esten shyǵarmaı, saqtap árkez jumys jasaımyz. Áriptesterimmen birge joǵary deńgeıde qyzmet jasap, talaı márte eldiń alǵysyn arqaladyq.

- Turǵyndarǵa sýdan saqtanýǵa baılanysty qandaı aqyl-keńes beresiz?

- Óz ómirin saqtaý - árbir adamnyń qolynda. Ókinishtisi, soǵan nemquraıly qaraýdyń saldarynan keıbir kisilerdiń ómiri kelteden úzilip jatady. Keıde jas balalar qaraýsyz qalady. Sonyń saldarynan kóz aldyńda júrgen baladan kóz jazyp qalýyń ǵajap emes. Janyńa jaqyn adamnan aıyrylý kim-kimge aýyr zardabyn alyp keledi. Sondyqtan jaqynymyzǵa janashyr bolaıyq. Tótenshe oqıǵanyń aldyn alýǵa umtylaıyq.

Aıta keterligi, jylma-jyl oblysta sýǵa ketý oqıǵalary tirkeledi. Oqıǵanyń oryn alý saldaryna úńilip kórseńiz, turǵyndar arasynda qaýipsizdik sharalary saqtalmaıtynyn ańǵarý qıyn emes. Іshkilik ishý saldarynan sýǵa ketý jaǵdaıy bolady. Sol sebepti azamattarǵa árbir sátte óz ómirińizge jaýapkershilikpen qarasańyz degim keledi. Qysqasy, qaýipsizdik erejesin qaı kezde de qaperde ustaǵan durys. Ot pen sý degenińiz - aıtyp kelmeıtin apat, tilsiz jaý.

- Azamattar sýǵa shomylǵan ýaqytynda qandaı qaýipsizdik erejesine nazar aýdarǵany jón?

- Negizinde sýda uzaq shomylý sharshap-shaldyǵýǵa ákep soǵady. Osyndaı jaǵdaıda nemese tońsańyz tez arada jaǵaǵa qaıtýǵa keńes beremin. Qaı ýaqytta da sabyr saqtaǵan jón. Eger óz kúshińizben jaǵaǵa jete almaıtynyńyzdy sezseńiz qol bulǵap, ózgelerdi kómekke shaqyrǵanyńyz artyq emes. Sýǵa shomylatyn jerdi, sýdyń tazalyǵyn, tereńdigin muqııat tekserip alý - tótenshe jaǵdaıdyń aldyn alady. Negizinde tamaq ishkennen keıin birden shomylýǵa bolmaıdy. Sýǵa tek ruqsat etilgen jerler men jaǵajaılarda shomylǵan jón.

- Áńgime barysynda qazaq tilinde taza sóıleıtinińizdi ańǵardyq...

- Men 1978 jyly dúnıe kelgenmin. Bıyl 45 jasqa tolamyn. Qyzylordada uzaq jyldan beri turamyn. Áıelim, eki balam bar.

Jergilikti ult ókilderi arasynda áriptesterim, dostarym az emes. Olarmen qarym-qatynas barysynda qazaqsha sóıleýge tyrysamyn. Bul meniń qazaq tilin jetik meńgerýime oń yqpalyn tıgizdi.

Men kezinde №13 kásiptik-tehnıkalyq ýchılışesinde bilim aldym. Odan úsh aı boıy súńgýir mamandyǵy boıynsha biliktiligimdi arttyrdym.

- Áńgimeńizge raqmet.