30 naýryzda máslıhat depýtattarynyń saılaýy ótedi
Barlyǵy Astana qalalyq máslıhatyna 1, oblystyq máslıhattarǵa 7, qalalyq máslıhattarǵa 12 jáne aýdandyq máslıhattarǵa 39 depýtat saılanady. Saılaý naýqany qajetti qarjylyq jáne materıaldyq-tehnıkalyq resýrstarmen qamtamasyz etilgen. Jalpy, saılaýǵa 188 kandıdat usynyldy, olardyń 61-in saıası partııalar, 2-in qoǵamdyq birlestikter usyndy jáne taǵy 125-i ózin-ózi usynǵandar.
Qazirgi sátte máslıhattar depýtattyǵyna kandıdattardy tirkeý aıaqtaldy. Barlyǵy 170 kandıdat tirkeldi. Olardyń 120-sy (70,6%) er adamdar jáne 50-i (29,4%) áıel adamdar. 67 kandıdat Qazaqstan Respýblıkasy saıası partııalarynyń músheleri bolyp tabylady, 43-i óziniń partııaǵa tıesililigin kórsetpegen. Tirkelgen kandıdattardyń ishinde 6 ulttyń ókili bar. Úmitkerlerdiń ortasha jasy - 41-de.
Sondaı-aq 140 (82,4%) kandıdattyń joǵary bilimi bar, 20-synyń (11,8%) arnaıy orta jáne 10-ynyń (5,9%) orta bilimi bar. Kandıdattardyń 43 % memlekettik mekemelerde, uıymdarda jáne kásiporyndarda, 30 % kommertsııalyq qurylymdarda qyzmet jasaıdy. Qazirgi ýaqytta saılaýshylarǵa úgit jumystary júrgizilip jatyr. Aıta keterligi, úgit-nasıhat jumystary 28 naýryz kúni 24 saǵatta aıaqtalady.
«Máslıhattardan shyǵyp qalǵan depýtattardyń ornyna saılaý naýqanynyń barysymen tanysý maqsatynda 11-14 naýryz aralyǵynda Ortsaılaýkom músheleri M.A. Sársembaev, T.V. Ohlopkova men L.J. Súleımen Ońtústik Qazaqstan, Soltústik Qazaqstan jáne Atyraý oblystaryna baryp qaıtady. Sapar barysynda Ortsaılaýkom músheleri oblystyń aýmaqtyq jáne okrýgtik saılaý komıssııalarynyń múshelerimen saılaý zańnamasynyń normalaryn saqtaýdy qamtamasyz etý máseleleri, sondaı-aq daýys berý kúnine daıyndyq boıynsha saılaý organdarynyń mindetteri talqylanatyn kezdesýler ótkizedi. Buǵan qosa, óńirlerdegi saılaýshylar tizimderin qurý jáne túzetý jumystaryn uıymdastyrýdy saraptaýǵa erekshe kóńil bólinedi» delingen baspasóz qyzmeti taratqan habarlamada.
