3 aqpan. Jylnama
Kazinform oqyrman nazaryna 3 aqpanǵa arnalǵan ataýly kúnder men este qalar oqıǵalar kúntizbesin usynady.
ESTE QALAR OQIǴALAR
1925 jyly «Jas qaırat» aptalyq gazetiniń alǵashqy sany jaryq kórdi. Bastapqyda Orynborda, keıin Qyzylordada shyqqan basylymnyń taralymy 2000 danany quraǵan. Gazettiń «Sońǵy jetiniń ishinde» atty aıdarynda shet elderdegi, sovet odaǵyndaǵy jańalyqtarmen tanystyrsa, «Qazaqstan jastary» bóliminde jergilikti uıym ómirin, jeke jastardyń talap-tilekterin jarııalap turǵan. «Táni saýdyń – jany saý» aıdarymen dárigerlik keńester, sport jónindegi materıaldar berip otyrǵan. Qarjy tapshylyǵyna baılanysty basylym 1926 jyly qazannyń 30-ynda 57-shi sany jaryq kórgennen keıin toqtaǵan.
1990 jyly Qazaqstan Respýblıkasynyń Ulttyq Olımpıada komıteti quryldy jáne ony 1992 jyly naýryz aıynda Halyqaralyq Olımpıada komıteti moıyndady. Shtab-páteri Almatyda ornalasqan. Halyqaralyq Olımpıada komıtetiniń, Azııa Olımpıada keńesiniń jáne ózge de halyqaralyq sport uıymdarynyń múshesi. Qazaqstandaǵy sportty damytý qyzmetimen aınalysady.
2006 jyly Semeı polıgonynyń alǵashqy kartasy jaryqqa shyqty. Onda ákimshilik shekaralar, eldi mekender, ózender men joldardan basqa paıdalaný úshin qaýipti barlyq lastanǵan radıoaktıvti ýchaskeler kórsetilgen. Atalǵan joba Eýropadaǵy qaýipsizdik jáne yntymaqtastyq uıymynyń Qazaqstandaǵy mıssııasy, Nıderlandtyń Hivos qory kómegimen iske asty.
2007 jyly Kıevtegi Taras Shevchenko atyndaǵy Ulttyq opera jáne balet teatrynda Ýkraınadaǵy Qazaqstan jylynyń resmı ashylý saltanaty ótti.
2010 jyly Qazaqstannyń Germanııadaǵy elshiligi Ulttyq akademııalyq kitaphanaǵa nemis tilinde jaryq kórgen 65 kitapty syıǵa tartty. Kitaphanaǵa tartý etilgen kitaptardyń arasynda Nursultan Nazarbaevtyń, Abaıdyń, Muhtar Áýezovtiń, Ábish Kekilbaıdyń, Gerold Belgerdiń, t.b. tańdamaly shyǵarmalary boldy.
2014 jyly respýblıkanyń ǵalymdar jáne metsenattarynyń bir toby «Qazaqtar. Tarıh jáne mádenıet» atty biregeı kitapty jaryqqa shyǵardy. Kitap qazaq, orys jáne aǵylshyn tilderinde basylyp shyqqan. Kitapta XIX ǵasyrdaǵy Eýropa jáne Reseı fotograftary men sýretshileriniń qolynan shyqqanqazaq turmys-tirshiligi týraly sırek kezdesetin, tipti buryn belgisiz kóne sýretter, sheteldik kartograftar jasaǵan qazaq jeriniń eski kartalary bar. Etnograftar Nazgúl Baıǵabatova men Raqym Beknazarov ázirlegen mátinderde qazaq etnografııasynyń erekshelikteri tolyǵymen sıpattalǵan.
2017 jyly Qazaqstandyq shahmatshy Jansaıa Ábdimálik chess.pw saıtynda júrgizilgen saýalnamada Eýrazııanyń eń ádemi shahmatshysy atandy. Oǵan Polsha, Ázerbaıjan, Úndistan, Iran, Ózbekstan, Qyrǵyzstan, Tájikstan jáne Qazaqstan ókilderi qatysty. 17 jastaǵy halyqaralyq grossmeıster Jansaıa Ábdimálik 9136 daýyspen aıqyn jeńiske jetti.
2019 jyly qazaqstandyq tennısshi Elena Rybakına Lonsestonda (Aýstralııa) ótken ITF serııasy týrnırinde tıtýldy jeńip aldy. Onyń qarsylasy – reseılik Irına Hromacheva, fınaldyq matchty aıaqtaı almady.
2021 jyly Qazaqstanda «SOS batyrmasy» júıesi iske qosyldy. Olar saıabaq, adam kóp shoǵyrlanatyn qoǵamdyq oryndarda ornatylady. Batyrmany azamattardyń telefony óship qalǵan jaǵdaıda da basýǵa bolady.
Onyń vıdeo nemese aýdıo habarlamasy Jedel ortalyq basqarmasyna kelip túsedi. Kartada onyń mekenjaıy shyǵady. Arnaıy qyzmetkerler vıdeosy men aýdıosyn kóre alady. Shynymen de, azamatqa kómek kerek bolǵan jaǵdaıda polıtsııa jasaǵyn jiberedi.
