29 jeltoqsan. QazAqparat kúntizbesi
ATAÝLY KÚNDER
Halyqaralyq bıologııalyq áralýandyq kúni
BUU Bas Assambleıasy 49-sessııasynyń (1995) sheshimi boıynsha bıologııalyq áralýandyq (Jerdiń florasy men faýnasy, 1993) týraly halyqaralyq konventsııanyń kúshine engen kúninen bastap toılanady.
ESTE QALAR OQIǴALAR
1995 jyly QR Konstıtýtsııalyq keńesi (KK) quryldy. Ol - Qazaqstandaǵy konstıtýtsııalyq baqylaýdy júzege asyratyn ujymdyq organ. Qazaqstan Konstıtýtsııasynyń 72-babyna sáıkes, KK QR Prezıdenti saılaýynyń, Parlament depýtattary saılaýnyń jáne respýblıkalyq referendýmnyń durys ótýin qadaǵalaıdy.
2004 jyly Astananyń sol jaǵalaýyndaǵy Qazaqstan Respýblıkasy Parlamentiniń jańa ǵımaratynda Májilistiń birinshi jalpy otyrysy ótti.
2005 jyly Semeıde «Shákárim» ǵylymı-pedagogıkalyq jýrnaly jaryq kórdi. Ol qazaq, orys jáne aǵylshyn tilderinde basylyp shyǵady. Basylymnyń basty maqsaty - Shákárim Qudaıberdiulynyń shyǵarmashylyǵy arqyly ulttyq qundylyqtarymyzdy zertteý men jarııalaý. Basylym 1 myń dana taralymmen jylyna 4 ret shyǵady.
2012 jyly Jambyl oblysynyń Qordaı aýdanynda Qazaqstanda alǵashqy ónerkásiptik aýqymdaǵy Kún elektr stansasy iske qosyldy. Jekemenshik ınvestıtsııalar esebinen salynǵan stansa jalpy elektr jelilerine qosylǵan ári óndirgen energııasyn elimizdiń biryńǵaı energetıka júıesine bere alady.
2016 jyly «Jyl adamy-2016» basty syılyǵynyń «Jyl erligi» nomınatsııasyn 3 balany aman-esen órtten alyp shyqqan 8-synyp oqýshysy Ǵalymjan Kúzembaev aldy.
2016 jyly Mańǵystaý oblysynyń Mańǵystaý aýdanynda «Shóltóbe-Ushtaǵan-Basqudyq-Jarma» gaz qubyry iske qosylyp, Ushtaǵan, Basqudyq jáne Jarma aýyl turǵyndarynyń úıinde kógildir otyn paıda boldy.
Gaz qubyrynyń jalpy uzyndyǵy - 92,67 shaqyrym. Onyń qurylysyna «Samuryq Qazyna» Ulttyq ál-aýqat qorynan qarajat bólindi. Áleýmettik mańyzdy jobany oryndaýǵa bıýdjet qarjysynan 898 mln. 576 myń teńge jumsaldy.
2017 jyly Bolgarııanyń Halyq jınalysy Varna qalasynda Qazaqstannyń jańa qurmetti konsýldyǵyn ashý jóninde sheshim qabyldady. Qazaqstannyń qurmetti konsýlynyń mindetin atqarý Varna turǵyny Ivan Ivanovqa júkteldi.
2018 jyly Sofııa qalasynyń eń kórikti jerleriniń birinde, Bolgarııa dańǵylynyń janynda Astana kóshesi paıda boldy.
2020 jyly Qazaqstan ulttyq banki «Respýblıka ıgiligi» monetalar serııasynan nomınaly 500 teńgelik «MEDEÝ»kúmis kollektsııalyq monetalaryn aınalymǵa shyǵardy. Monetalar altyn jalatylǵan, salmaǵy 24 gramm, dıametri 37 mm, «proof» sapasymen, taralymy 3 000 (úsh myń) dana kúmisten daıyndalǵan.
2020 jyly Abaı Qunanbaıulynyń 175 jyldyǵy men Ábý Nasyr ál-Farabıdiń 1150 jyldyǵyn merekeleý aıasynda Gonkong baptıstik ýnıversıtetinde «Qazaqstan dalasynan shyqqan baǵa jetpes danalyq» ekspozıtsııasynyń ashylý rásimi ótti.
2020 jylyQazaqstan Respýblıkasynyń Tuńǵysh Prezıdenti - Elbasy atyndaǵy Ulttyq qorǵanys ýnıversıtetiniń jalpy áskerı fakýltetine aty ańyzǵa aınalǵan qolbasshy Baýyrjan Momyshulynyń esimi berildi.
2021 jyly Qazaqstan Respýblıkasy Prezıdentiniń Teleradıokeshenine 25 jyl toldy. Memleket basshysynyń qyzmetine qatysty aqparattyń jalǵyz jetkizýshisi bola otyryp, PTRK óziniń jeke ónim jelisin únemi keńeıtip otyrady. Bul derekti fılmder, qysqametrajdy fılmder, beınerolıkter, sondaı-aq qoǵamdyq-saıası mańyzy bar baǵdarlamalar.
Teleradıokeshen Táýelsizdigimizdiń damý tarıhynyń shejiresi – biregeı beınemuraǵat ıesi.
2021 jyly ólim jazasyn alyp tastaý týraly zańǵa qol qoıyldy, ony qabyldaý arqyly Qazaqstan ólim jazasyna zańdy túrde tyıym salynǵan elder tobyna qosyldy. Sonymen qatar, elimiz ólim jazasyn tolyǵymen joıýǵa baǵyttalǵan halyqaralyq qozǵalysty qoldaıtynyn dáleldep otyr. Álemde ólim jazasyn zań júzinde nemese is júzinde alyp tastaǵan 150-den astam memleket bar.
2021 jyly kópsalaly Aqmola balalar aýrýhanasynda kúıikke shaldyqqan, teri zaqymdanǵan jáne operatsııadan keıingi jaralary bar balalar men jasóspirimderdi emdeýge arnalǵan joǵary tehnologııalyq kúıikke qarsy biregeı medıtsınalyq kereýet paıda boldy. Onyń biregeıligi - qaıta paıdalanýǵa bolatyn paraqtyń astynda mıkrokrıstaldar bar, soda-kaltsıı ákiniń mıkrosferasy sýdyń ımıtatsııasyn jasaıdy. Naýqas onda, adam sýda qalqyp bara jatqandaı kórinedi, biraq bul jerde bári qurǵaq jáne teriniń qabattaryna qysym joq. Bul deneniń zaqymdalǵan jerleriniń regeneratsııasyn jáne qan aınalymyn jaqsartady, jaranyń jazylýyn tezdetedi.
