27 jastaǵy túrkistandyq kelinshek qyrǵaýyl ósirýdi kásipke aınaldyrdy
Ordabasy aýdany, Kóltaǵan eldi mekenindegi Ashırovtar áýletin kópshilik «qyrǵaýyl ósirýshi» otbasy retinde tanıdy. Dala qusyn úı jaǵdaıynda kóbeıtýdi kásip etken januıanyń bıznesine búginde qyzyǵýshylar kóp. Qyrǵaýyldy kórý úshin jerlesteri bala-shaǵasyn ertip jıi keledi. Tipti, alys-jaqyn eldi mekennen arnaıy at basyn buratyndar da bar.
«Qazirgi kezde úıimizde 150-ge jýyq qyrǵaýyl bar. Barshasyna ýaqytyly jem-shóbin berip, ósirip jatyrmyz. Barlyǵy qolǵa úırengen. Qasymyzda erkin júre beredi» - deıdi úıdiń kelini Gúldana Jarylqadıeva.
Ashırovtar otbasynyń sırek kezdesetin bul kásipti qolǵa alǵanyna kóp bola qoıǵan joq. Alǵashqyda qarashańyraqqa kelin bolyp túsken Gúldanany mamandyǵy boıynsha qyzmetke ornalastyrý qıynǵa soqqan. Sodan jas kelin joldasy Nurbolmen aqyldasa kele, jeke kásip ashýdy qup kórgen. Úıdegi atalary Jańabyl da jastardyń bul oıyn qýana quptaıdy.
«Basynda birshama bıznes-jobalar jasap kórdik. Kóp izdendik. Tipti, taýyq, úırek, qaz sekildi ózge qustardy ósirýdi qolǵa alsaq degen oı da boldy. Sońynda sırek kezdesetin qyrǵaýyl ósirý kásibine toqtadyq. Atam qyrǵaýyldyń jumyrtqalaryn alyp kelip berdi. Sodan ony ınkýbatorda ashtyrdyq. Kishkentaı balapandar tez et alyp, úlkeıip ketti. 48 qyrǵaýyl kóbeıip 300-ge jetti», – deıdi ol.
Gúldananyń kásipker atanýyna memlekettik «Bastaý bıznes» jobasy da úlken septigin tıgizgen. Atalǵan joba aıasynda arnaıy kýrsty oqyǵan ol, bıznes josparyn sátti qorǵap 1 mln 225 myń 200 teńge qaıtarymsyz granttyń jeńimpazy atandy. Ol qarjyǵa grant talabyna saı qajetti qurylǵylardy satyp aldy. Máselen, ınkýbator men generator, broıler men akkýmýlıatorǵa grant esebinen qol jetkizdi. Sodan, «áreketke – bereket» qaǵıdatyn ustanyp, iske kiristi. Qazir qyrǵaýyldyń balapandaryn sol arqyly kóbeıtip otyr.
«Jalpy jylyna 5 mln teńgedeı tabys tabýǵa bolady. Kóktemde kóbeıtip, kúzde satamyz. Kóbinese etin em kórip alatyndar bar. Sondaı-aq ańshylyq sharýashylyǵymen aınalysatyndar arnaıy kelip, alyp ketedi. Bir qyrǵaýyldyń salmaǵy 1,5-2 keli aralyǵynda. Al, baǵasy 5-10 myń teńgeniń jobasynda satylady. Internet jelisi arqyly jarnama jasap jatyrmyz. Sodan kórgen adamdar, habarlasyp, kelip alyp ketedi» - deıdi ol.
Gúldananyń negizgi mamandyǵy – baǵdarlamashy. M.Áýezov atyndaǵy Ońtústik Qazaqstan memlekettik ýnıversıtetiniń túlegi. Degenmen, jastaıynan kásipke bet burǵan ol, búginde bul baǵytta kóp izdenýde. Ásirese, qazirgi kezde marketıng, menedjment salalary boıynsha bilimin jetildirip júr. Sondaı-aq qyrǵaýyl ósirýdiń qyr-syryn tereńinen zertteýde.
«Qyrǵaýyl uzaqqa usha almaıdy. Naýqastanbas úshin jıi-jıi qora-qopsyny zalalsyzdandyryp turamyz. Bir ınkýbatorǵa 300 jumyrtqa sııady. Bir aıǵa jýyq ýaqytta jaryp shyǵady. Biz qyrǵaýyldyń ańshylyqqa arnalǵan túrin ǵana ósiremiz. Sebebi olar óte tózimdi keledi. Al, basqa túri názik bolady. Eti men jumyrtqasy densaýlyqqa paıdaly, ári óte dámdi» - deıdi jas kásipker Gúldana Jarylqadıeva.
