27 sáýir. QazAqparat kúntizbesi
ATAÝLY KÚNDER
«Aqparattyq-kommýnıkatsııalyq tehnologııalar salasyndaǵy qyzdar» halyqaralyq kúni
Halyqaralyq elektr baılanysy odaǵynyń (HEO) bastamasymen sáýir aıynyń tórtinshi beısenbisinde atap ótiledi. Onyń negizgi mindeti – aqparattyq-kommýnıkatsııalyq tehnologııalar salasynda bilim alý jáne mansaptyq ósý turǵysynan qyzdardyń múmkindikterin keńeıtýge járdemdesý.
ESTE QALAR OQIǴALAR
1994 jyly Almatyda «Abylaı han» qory quryldy. Qor tóraǵasy bolyp Shota Ýálıhanov saılandy.
1996 jyly Almatyda Qazaqstan Respýblıkasy men Reseı Federatsııasynyń Prezıdentteri Kaspıı teńizi boıynsha birlesken málimdemege qol qoıdy. Onda Qazaqstannyń Kaspııdegi munaı-gaz resýrstaryn barlaý jáne óndirý jumystaryn júrgizý boıynsha quqyǵy jáne Reseıdiń osy saladaǵy yntymaqtastyqqa daıyndyǵy kórsetilgen.
2000 jyly Almatyda BUU-nyń Ortalyq Azııanyń ekonomıkalaryna arnalǵan Arnaýly baǵdarlamasyn (SPEKA) tanystyrý rásimi boldy. Oǵan Qazaqstannyń, Qyrǵyzstannyń, Tájikstannyń, BUU-nyń Eýropalyq ekonomıkalyq komıssııasynyń (EEK), sondaı-aq BUU-nyń Azııa men Tynyq muhıty óńirine arnalǵan Ekonomıkalyq jáne áleýmettik komıssııasynyń (ESKATO) delegatsııalary qatysty. Іs-sharanyń basty maqsaty – Ortalyq Azııa memleketteriniń ekonomıkalyq damý qarqynyn jáne Eýropa men Azııanyń ekonomıkasyna kirigýin jedeldetý maqsatynda olardyń arasyndaǵy yntymaqtastyqty nyǵaıta berý. Baǵdarlamany tanystyrý rásiminde uıymdastyrý kezeńiniń qorytyndysy shyǵarylyp, taıaý jyldary ony iske asyrýdyń naqty is-sharalary belgilendi. Basqosýǵa qatysqandar SPEKA, EEK jáne ESKATO-ǵa qatysýshy elderge Birlesken málimdeme qabyldap, sonymen Baǵdarlamanyń maqsaty men mindetterine yqylastylyq qýattaldy.
2010 jyly Astanada «Kórme» ortalyǵynda TMD-ǵa múshe memleketterdiń ustazdarynyń, bilim berý júıesi qyzmetkerleriniń І sezi ótti. Oǵan Armenııa, Ázerbaıjan, Belarýs, Qazaqstan, Qyrǵyzstan, Reseı jáne Tájikstannyń bilim berý júıesindegi 500 úzdik qyzmetkeri qatysty.
2011 jyly Túrkitildes memleketterdiń Parlamenttik Assambleıasyna tóraǵalyq Ázerbaıjan Respýblıkasynan Qazaqstan Respýblıkasyna resmı túrde ótti.
2015 jyly Qazaqstanda alǵash ret Halyqaralyq fýtbol jáne dostyq kúni atalyp ótti. Osyǵan oraı Almatydaǵy Ortalyq stadıonda «Dostyq úshin fýtbol» jobasynyń belgisi - Dostyq bilezigimen almasý saltanatty rásimi boldy.
2017 jyly Qazaqstanda І, ІІ dárejeli «El qorǵany» medali bekitildi. I dárejeli «El qorǵany» medalimen Qazaqstan Respýblıkasynyń qorǵanys qabiletin, áskerı qaýipsizdigin nyǵaıtýǵa zor úles qosqan QR Qarýly kúshteriniń ofıtserlik quramy jáne QR azamattary marapattalady; ІІ dárejeli «El qorǵany» medalimen – QR Qarýly kúshteriniń serjant jáne sarbazdar quramyndaǵy áskerı qyzmetshiler marapattalady.
2017 jyly QR Aqparat jáne kommýnıkatsııalar mınıstri Dáýren Abaev baspa, radıo- jáne ınternet-jýrnalıstıka salasynda «Úrker» alǵashqy ulttyq syılyǵy taǵaıyndalatyny týraly jarııalady.
2020 jyly Qazaqstanda eksporttaýshy qazaqstandyq kásiporyndarǵa kómek kórsetýdiń arnaıy baǵdarlamasy – QAZTRADE iske qosyldy. Ol satyp alýshylardy izdeýge jáne kelisimshart jasasýǵa deıin ótkizý naryqtaryn izdeýge kómektesedi.
2021 jyly Túrki akademııasy tatar halqynyń klassık aqyny Ǵabdolla Toqaıdyń 135 jyldyq mereıtoıyna arnalǵan «Ǵabdolla Toqaı jáne Túrki álemi» atty halyqaralyq konferentsııa ótkizdi. «Túrki áleminiń kórnekti tulǵalary» jobasyna tatar halqynyń Júsip Aqshora, Shıgabýtdın Marjanı syndy uly perzentterimen birge Tuqaıdyń esimin qostyq. «Ǵabdolla Toqaıdyń mereıtoıy - baýyrlas Tatarstan jurtshylyǵy úshin ǵana emes, búkil túrki halyqtary úshin de aıtýly oqıǵa», - dedi Halyqaralyq Túrki akademııasynyń prezıdenti Darhan Qydyráli.
2022 jyly Sh.Ýálıhanov atyndaǵy Kókshetaý ýnıversıtetiniń 60 jyldyq mereıtoıy aıasynda Halyqaralyq ǵarysh stantsııasyna (HǴS) joǵary oqý ornynyń vympeli jiberildi.
Ǵaryshkerler men astronavtardyń qoltańbasy bar vympelde ǵaryshta bolǵandyǵyn kórsetetin halyqaralyq ǵarysh stantsııasynyń arnaıy móri qoıylǵan. Mór obektiniń shynymen ǵaryshqa barǵandyǵyn dáleldeıdi.
